ಲಂಡನ್ (ಪಿಟಿಐ): ಇನ್ನು ಎರಡು ವರ್ಷಗಳಲ್ಲಿ ಅನಿರೀಕ್ಷಿತ ಘಟನೆಗಳಿಂದ ಭೂಮಿ ನಾಶವಾಗುವುದೇ? ಹಾಗೆಂದು ವೈಜ್ಞಾನಿಕ ಸಿನಿಮಾಗಳು ಕಥೆಕಟ್ಟಿವೆ. ಆದರೆ ‘ ಅದು ಕಟ್ಟು ಕಥೆಯೇನಲ್ಲ, ಭೂಮಿಯ ನಾಶ ನಿಜವಾಗಬಹುದು’  ಎಂದು ಈಗ ವಿಜ್ಞಾನಿಗಳು ಕೂಡ ಹೇಳತೊಡಗಿದ್ದಾರೆ.

’ಭೂಮಿಯಿಂದ 3,260  ಜ್ಯೋತಿರ್ವರ್ಷ ಅಂತರದಲ್ಲಿರುವ  ನಕ್ಷತ್ರವೊಂದು ‘ಘಟ ಸ್ಫೋಟ’  ( ಸೂಪರ್ ನೋವ)ಗೊಳ್ಳುವ ಹಂತ ತಲುಪಿದೆ. ಹಾಗೇನಾದರೂ ಸಂಭವಿಸಿದರೆ ಭೂಮಿ ಕೂಡ ನಾಶವಾಗಬಹುದು’ ಎಂದು ಫಿಲಿಡೆಲ್ಫಿಯಾದ ವಿಲ್ಲನೊವಾ ವಿಶ್ವವಿದ್ಯಾಲಯದ  ಬಾಹ್ಯಾಕಾಶ ವಿಜ್ಞಾನಿಗಳು ಹೇಳಿದ್ದಾರೆ.

ಸ್ಫೋಟಕ್ಕೆ ಸಿದ್ಧವಾಗಿರುವ ನಕ್ಷತ್ರವನ್ನು  ‘ಟಿಫಿಕ್ಸಿಡಿಸ್’ ಎಂದು ಹೆಸಲಾಗಿದೆ. ಇದು ಸ್ಫೋಟಗೊಂಡರೆ 20 ಮುಮ್ಮಡಿ ಶತಕೋಟಿ ಮೆಗಾಟನ್ ಟಿಎನ್‌ಟಿ  (ಸಾರಜನಕ ಯುಕ್ತ ಪ್ರಬಲ ಸ್ಫೋಟಕ) ಸಾಮರ್ಥ್ಯ ಹೊಂದಿರುತ್ತದೆ. ಸ್ಫೋಟ ಸಂಭವಿಸಿದರೆ ಅಪಾರ ಶಕ್ತಿಯಿಂದಾಗಿ ಭೂಮಿ ಹಾಗೂ ಅದರಲ್ಲಿರುವ ಜೀವಜಾಲಗಳು  ನಾಶವಾಗುವುದು ಖಚಿತ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

’ಟಿಫಿಕ್ಸಿಡಿಸ್’ ನಕ್ಷತ್ರದಂತೆ ಕಂಡುಬಂದರೂ ಅದು ನಕ್ಷತ್ರ ಅಲ್ಲ. ಅದು ಶ್ವೇತಕುಬ್ಜ (ಜೋಡಿ ನಕ್ಷತ್ರ). ನಕ್ಷತ್ರವೊಂದು ಉರಿದು ಮುಗಿದಾಗ  ಗುರುತ್ವಾಕರ್ಷಣೆ ಕಳೆದು ಕೊಂಡು ಸಂಕುಚಿತಗೊಳ್ಳುತ್ತದೆ. ಕಪ್ಪು ರಂಧ್ರ (ಬ್ಲ್ಯಾಕ್ ಹೋಲ್) ಎಂದು ಕರೆಯಲ್ಪಡುವ ಇದನ್ನು ಇತರ ಪ್ರಬಲ ನಕ್ಷತ್ರಗಳು ಆಕರ್ಷಿಸಿ ವಿಲೀನಗೊಳಿಸುತ್ತವೆ. ಇಂತಹವುಗಳನ್ನು ‘ಶ್ವೇತ ಕುಬ್ಜ’ ಎಂದು ಕರೆಯಲಾಗುವ ಈ ಜೋಡು ನಕ್ಷತ್ರ  ಸ್ವತಃ ದ್ರವ್ಯರಾಶಿಯ ಬಿಗುವು ಹಾಗೂ ಅನಿಲಗಳ ಹೀರುವಿಕೆಯಿಂದ ಉಬ್ಬ ತೊಡಗುತ್ತದೆ.

ಹೀಗೆ ಉಬ್ಬಿದ ’ಶ್ವೇತ ಕುಬ್ಜ ನಕ್ಷತ್ರ’ ದ ದ್ರವ್ಯರಾಶಿ ಒಂದು ನಿರ್ದಿಷ್ಟ ಹಂತದಲ್ಲಿ ಪೂರ್ಣ ಶಕ್ತಿಯೊಂದಿಗೆ ಸ್ಫೋಟಗೊಳ್ಳುತ್ತದೆ. ಇದನ್ನು ಸೂಪರ್ ನೋವ ಅನ್ನುತ್ತಾರೆ. ಇದರಿಂದ ಸೌರವ್ಯೆಹದಲ್ಲಿ ಅಲ್ಲೋಲಕಲ್ಲೋಲ ಆಗುತ್ತದೆ. ಗ್ರಹಗಳು, ಉಪಗ್ರಹಗಳು ಧ್ವಂಸವಾಗುತ್ತವೆ. ಟಿಫಿಕ್ಸಿಡಿಸ್ ನಕ್ಷತ್ರಕ್ಕೆ ಹತ್ತಿರವಾಗಿರುವುದರಿಂದ ಭೂಮಿಯೂ ನಾಶವಾಗಬಹುದು ಎಂಬುದು ವಿಜ್ಞಾನಿಗಳ ಸಂಶಯ.

ನಕ್ಷತ್ರಗಳ ಸ್ಫೋಟ (ಸೂಪರ್‌ನೋವಾ) ಪ್ರಕ್ರಿಯೆಯು 1890ರಿಂದೀಚಿಗೆ ಪ್ರತಿ 20 ವರ್ಷಗಳಿಗೊಮ್ಮೆ ನಡೆಯುತ್ತಿದೆ. ಆದರೆ 1967ರಿಂದ ಇಂತಹ ಘಟನೆ ನಡೆದಿಲ್ಲ. ಇದೀಗ ಬಾಕಿ ಇರುವ ಸ್ಫೋಟದ ಸರದಿ ಹತ್ತಿರವಾಗುತ್ತಿದೆ.

‘ಇಪ್ಪತ್ತು ವರ್ಷಗಳ ನಿರ್ದಿಷ್ಟ ಅವಧಿ ಹತ್ತಿರವೇ ಇದೆ’ ಎಂದು ವಿಜ್ಞಾನಿಗಳ ತಂಡದ ಎಡ್ವರ್ಡ್ ಎಂ ಸಿಯಾನ್ ಅಮೆರಿಕದ ಖಗೋಳ ವಿಜ್ಞಾನಿಗಳ ಸಮಾವೇಶ (ಎಎಎಸ್)ಗೆ ಸಲ್ಲಿಸಿದ ವರದಿಯಲ್ಲಿ ತಿಳಿಸಿದ್ದಾರೆ.

ಈ ನಕ್ಷತ್ರವು ಅಂತಿಮ ಸ್ಫೋಟದ ಪೂರ್ವಭಾವಿಯಾಗಿ ಸಣ್ಣಸ್ಫೋಟ (ನೋವಾ)ಗಳು ನಡೆಯುತ್ತಿದೆ. ಇದನ್ನು ಹಬಲ್ ದೂರದರ್ಶಕ ಗುರುತಿಸಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.