ಬೆಳಗದ ಹಬ್ಬ... ಬಯಲೇ ಆಲಯ...
ಮಸ್ಕಿ: ಪ್ರತಿವರ್ಷ ದೀಪಾವಳಿ ಹಬ್ಬ ವೆಂದರೆ ಎಲ್ಲರಿಗೂ ಸಂಭ್ರಮ. ಪ್ರತಿ ಮನೆ ಮನೆಯಲ್ಲೂ ದೀಪಗಳ ಬೆಳಕು. ಅಂಗಡಿ ಮುಂಗಟ್ಟುಗಳಿಗೆ ಭರ್ಜರಿ ವ್ಯಾಪಾರ. ಅದರೆ ಈ ವರ್ಷ ಹಬ್ಬದ ಅಬ್ಬರವೂ ಇಲ್ಲ. ಜನರಿಗೆ ಸಡಗರವೂ ಇಲ್ಲ. ಎಲ್ಲ ನೆರೆ ಹಾವಳಿಯಲ್ಲಿ ಕೊಚ್ಚಿಕೊಂಡು ಹೋಗಿವೆ.
ಉತ್ತರ ಕರ್ನಾಟಕದ ಎಂಟು ಜಿಲ್ಲೆಗಳ ಜನರಿಗೆ ದೀಪಾವಳಿ ಸಂತೋಷ ತರುವುದಕ್ಕಿಂತ ಕತ್ತಲೆಯ ಕಷ್ಟವನ್ನೆ ತಂದಿಟ್ಟಿದೆ. ಹಬ್ಬದ ಸಂತೋಷದ ಭಾವನೆಗಿಂತ ಮುಂದಿನ ದಿನ ಹೇಗೆ ಎಂಬ ಚಿಂತೆ ಎಲ್ಲೆಡೆ ಮನೆ ಮಾಡಿದೆ. ಒಂದೆಡೆ ಮನೆ-ಮಠ ಕಳೆದು ಕೊಂಡು ಜನ ಬೀದಿಗೆ ಬಂದಿದ್ದಾರೆ. ಭೂಮಿಯಲ್ಲಿ ಹಾಕಿದ ಬೀಜ ಫಸಲು ಬರುವ ಮುನ್ನವೆ ಭೂಮಿಯೆ ನಾಶವಾಗಿ ರೈತರು ದಿಕ್ಕು ತೊಚದಂತಾಗಿ ಅಕ್ಷರಶಃ ಅನಾಥರಾಗಿದ್ದಾರೆ.
ಸರ್ಕಾರ ದಿನ ದಿನವೂ ಪರಿಹಾರದ ಹಣ ಕಾಗದದಲ್ಲಿ ಘೋಷಣೆ ಯಾಗುತ್ತದೆ. ಆದರೆ ನೈಜ ನಿರಾಶ್ರಿತರಿಗೆ ತಲುಪುತ್ತಿಲ್ಲ. ಗ್ರಾಮ ಲೆಕ್ಕಾಧಿಕಾರಿಗಳಿಗೆ, ಅಧಿಕಾರಿಗಳಿಗೆ ರಾಜಕೀಯ ಹಿಂಬಾಲಕರ ಒತ್ತಡ, ಮನೆ ಬೀಳದಿದ್ದರೂ ಮನೆ ಬಿದ್ದಿದೆ ಎಂಬ ವರದಿ ಕೊಡಿ ಎಂಬ ಅಘೋಷಿತ ಆಜ್ಞೆ. ಗ್ರಾಮ ಲೆಕ್ಕಾಧಿ ಕಾರಿಗಳಿಗೆ ಪ್ರತಿನಿಧಿ ಮಾತು ಮೀರು ವಂತಿಲ್ಲ. ಸುಳ್ಳು ಬರೆದರೆ ನೌಕರಿ ಕಳೆದುಕೊಳ್ಳುವ ಭಯ. ಉಭಯ ಸಂಕಟದಲ್ಲಿ ಕೆಲಸ ಮಾಡಬೇಕಾದ ಅನಿವಾರ್ಯತೆ.
ಆಡಳಿತ ಪಕ್ಷದವರು, ವಿರೋಧ ಪಕ್ಷದವರು ನೆರೆಯಲ್ಲೂ ತಮ್ಮ ವೋಟ್ ಬ್ಯಾಂಕಿನ ಲೆಕ್ಕಚಾರ. ಸಂತ್ರಸ್ತರ ನೆರವಿಗೆ ಧಾವಿಸುವುದು ಬಿಟ್ಟು ಒಬ್ಬರ ಮೇಲೆ ಒಬ್ಬರು ಗೂಬೆ ಕೂರಿಸುತ್ತಿದ್ದಾರೆ. ಅದನ್ನೆಲ್ಲಾ ಪಕ್ಕ ಕಿಟ್ಟು ಮೂರಾಬಟ್ಟೆಯಾದ ಬದುಕ ನ್ನು ಮತ್ತೆ ಕಟ್ಟಿಕೊಳ್ಳಲು, ಬಿದ್ದ ಮನೆಗಳಲ್ಲಿ ಬೆಳಕಿನ ದೀಪ ಹಚ್ಚುವ ಕೆಲಸದಲ್ಲಿ ತೊಡಗಬೇಕಾಗಿದೆ.
ಬಡವರು ಶ್ರೀಮಂತರು ಎಂಬ ಭೇದ ಭಾವವಿಲ್ಲದೆ ನೆರೆ ಎಲ್ಲರಿಗೂ ತನ್ನ ರುಚಿ ತೋರಿಸಿದೆ. ಈಗಲಾದರು ಅಧಿಕಾರಿಗಳು, ಜನಪ್ರತಿನಿಧಿಗಳು ಮಾನವೀಯತೆ ಮೆರೆದು ಸಮಾನತೆ ಹಣತೆ ಬೆಳಗಲಿ ಎಂಬುದೇ ದೀಪಾವಳಿಯ ಹಬ್ಬದ ಸಂದರ್ಭದಲ್ಲಿ ನಿರಾಶ್ರಿತರ ಆಶಯ.
ಸರ್ಕಾರ ವಿಫಲ: ಕೆ.ನೀಲಾ
ಜಾಲಹಳ್ಳಿ: ಮಳೆಯಿಂದ ಹಾನಿ ಸಂಭವಿಸಿದ ಪ್ರದೇಶಗಳಿಗೆ ಕೇವಲ ಭೇಟಿ ನೀಡು ವುದು ಮುಖ್ಯಮಂತ್ರಿಗಳ ಪ್ರಚಾರ ಗಿಟ್ಟಿಸಿಕೊಳ್ಳುವ ನಾಟಕ ವಾಗಿದ್ದು, ಪರಿಹಾರ ವಿತರಣೆಯಲ್ಲಿ ತಾರತಮ್ಯ ನೀತಿ ಅನುಸರಿಸುತ್ತಿರುವ ಸರಕಾರ ಪ್ರವಾಹ ಪರಿಸ್ಥಿತಿಯನ್ನು ನಿಭಾಯಿ ಸುವಲ್ಲಿ ಸಂಪೂರ್ಣ ವಿಫಲ ವಾಗಿದೆ ಎಂದು ಸಿಪಿಐ(ಎಂ) ರಾಜ್ಯ ಮಖಂಡರಾದ ಕೆ.ನೀಲಾ ಆರೋಪಿಸಿದರು.
ಭಾನುವಾರ ದೇವದುರ್ಗದ ಪ್ರವಾಹ ಪೀಡಿತ ಪ್ರದೇಶಗಳಿಗೆ ಭೇಟಿ ನೀಡಿದ ಸಮಯ ದಲ್ಲಿ ವೀರಗೋಟ ಗ್ರಾಮ ದಲ್ಲಿ ‘ಪ್ರಜಾವಾಣಿ’ಯೊಂದಿಗೆ ಅವರು ಮಾತನಾಡಿದರು.
ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಲ್ಲಿ ಕೆಲಸ ಮಾಡಿದ ಕೂಲಿ ಕಾರ್ಮಿಕರಿಗೆ ಕೂಲಿ ಹಣ ವಿತರಣೆ ಮಾಡದ ಈ ಸರ್ಕಾರ ಪ್ರವಾಹಕ್ಕೆ ತುತ್ತಾದ ಜನರಿಗೆ ಸಹಾಯ ಮಾಡುವುದು ಯಾವಾಗ ಎಂದು ಅವರು ಆರೋಪಿಸಿದರು. ಕೇಂದ್ರ ಸರ್ಕಾರದಿಂದ ಹಾಗೂ ರಾಜ್ಯದ ಸಾರ್ವಜನಿಕರಿಂದ ಹಣ ಸಂಗ್ರಹ ಮಾಡಿ ಬಿಜೆಪಿ ಕಾರ್ಯ ಕರ್ತರಿಗೆ ಪ್ರವಾಹದ ಕಾಮಗಾರಿ ಕೆಲಸ ನೀಡುವುದರಲ್ಲಿ ಸ್ಥಳೀಯ ಸಚಿವರು ಮಗ್ನರಾಗಿದ್ದು ಪರಿಹಾರ ವಿತರಣೆಯಲ್ಲೂ ಕೂಡ ತಾರತಮ್ಯ ಅನುಸರಿಸುವುದು ಸರಿಯಲ್ಲ ಎಂದರು. ಪಕ್ಷದ ಮುಖಂಡರಾದ ತಿಪ್ಪಯ್ಯ ನಾಯಕ, ಶಿವಾನಂದ ಹಟ್ಟಿ, ಸರಸ್ವತಿ ಹಟ್ಟಿ ಇದ್ದರು.
ನಿಮ್ ಜಿಲ್ಲೆಗೆ ನಾನೇ ಉಸ್ತುವಾರಿ... ಸಂತೋಷಾನಾ...!
ರಾಯಚೂರು: ಈ ರಾಯಚೂರು ಜಿಲ್ಲೆ ಉಸ್ತುವಾರಿ ನಾನೇ... ಸಂತ್ರಸ್ತರ ಕಷ್ಟ ಕೇಳ್ಲಿಕ್ಕೆ ಬಂದಿದ್ದೇನೆ... ಉಸ್ತು ವಾರಿ ಸಚಿವರು ಇದ್ದರೇನು... ಇಲ್ಲದಿದ್ದರೇನು... ನಾನೇ ನಿಮ್ ಜಿಲ್ಲೆ ಉಸ್ತುವಾರಿ... ಸಂತೋಷಾನಾ?
ಇದು ಶನಿವಾರ ಜಿಲ್ಲೆಯ ಪ್ರವಾಹ ಪೀಡಿತ ಗ್ರಾಮಗಳಿಗ ಭೇಟಿ ನೀಡಿದ್ದ ಮುಖ್ಯಮಂತ್ರಿ ಬಿ.ಎಸ್ ಯಡಿ ಯೂರಪ್ಪ ಹೇಳಿದ ಮಾತು.
ಜಿಲ್ಲಾ ಉಸ್ತುವಾರಿ ಸಚಿವ ಸಿ.ಎಂ ಉದಾಸಿಯವರೂ ಇಂಥ ಸಂದರ್ಭ ದಲ್ಲಿ ಸರಿಯಾಗಿ ಭೇಟಿ ಸಂತ್ರಸ್ತರ ಕಷ್ಟ ಕೇಳುತ್ತಿಲ್ಲ ಎಂಬ ಸುದ್ದಿಗಾರರ ಪ್ರಶ್ನೆಗೆ ಉತ್ತರಸಿದ್ದು ಹೀಗೆ.
ಅವರ್ಯಾಕೆ. ನಾನೇ ನಿಮ್ ಜಿಲ್ಲೆ ಉಸ್ತುವಾರಿ ಅಂಥ ತಿಳ್ಕೋಳ್ಳಿ. ಎಲ್ಲ ಜಿಲ್ಲೆಗೂ ಭೇಟಿ ಕೊಡುತ್ತಿದ್ದೇನೆ. ನಾನೇ ಸಂತ್ರಸ್ತರ ಕಷ್ಟ ಕೇಳ್ತಾ ಇದ್ದೇನಲ್ಲ. ನಿಮ್ ಜಿಲ್ಲೆಗೂ ಪ್ರತಿವಾರ ಬಂದು ಸಂತ್ರಸ್ತ ಕುಟುಂಬಗಳ ಏನೇನೂ ಪರಿಹಾರ ಕಾರ್ಯ ಕೈಗೊಳ್ಳಬೇಕು ಅವುಗಳ ಬಗ್ಗೆ ಪರಿಶೀಲನೆ ನಡೆಸುತ್ತೇನೆ ಎಂದು ಚಟಾಕಿ ಹಾರಿಸಿದರು.
ಮನೆ ನಿರ್ಮಾಣಕ್ಕೆ 50 ಸಾವಿರ: ಸಿಎಂ
ರಾಯಚೂರು: ಪ್ರವಾಹ ಪರಿಸ್ಥಿತಿ ಯಲ್ಲಿ ಮನೆ ಕಳೆದುಕೊಂಡವರಿಗೆ ಮನೆ ನಿರ್ಮಿಸಿಕೊಳ್ಳಲು ರಾಜ್ಯ ಸರ್ಕಾರ ಒಟ್ಟು 50 ಸಾವಿರ ರೂ ದೊರಕಿಸುತ್ತಿದೆ. ಪ್ರಥಮ ಹಂತವಾಗಿ 35 ಸಾವಿರ ದೊರಕಿಸಲಾಗುವುದು. ನಂತರ 15 ಸಾವಿರ ರೂಗಳನ್ನು ಎರಡನೇ ಹಂತದಲ್ಲಿ ದೊರಕಿಸಲಾ ಗುವುದು. ಈ ಹಣದಲ್ಲಿ ಪಕ್ಕಾ ಮನೆಗಳನ್ನು ನಿರ್ಮಿಸಿಕೊಳ್ಳಬೇಕು. ಅಲ್ಲದೇ ಸಂತ್ರಸ್ತರಿಗೆ ಬಟ್ಟೆಗಾಗಿ 1 ಸಾವಿರ, ಪಾತ್ರೆ ಪಡಗಕ್ಕೆ 1 ಸಾವಿರ ರೂಗಳನ್ನು ದೊರಕಿಸಲಾಗುತ್ತಿದೆ ಎಂದು ಮುಖ್ಯಮಂತ್ರಿ ಬಿ.ಎಸ್ ಯಡಿಯೂರಪ್ಪ ಹೇಳಿದರು.
ಪ್ರವಾಹಪೀಡಿತ ಜಿಲ್ಲೆಯ ಗಡಿ ಗ್ರಾಮವಾದ ಚಿಕ್ಕಮಂಚಾಲಿ ಗ್ರಾಮಕ್ಕೆ ಶನಿವಾರ ಅಧಿಕಾರಿ ಗಳೊಂದಿಗೆ ಭೇಟಿ ನೀಡಿದ ಅವರು, ಗ್ರಾಮದ ಈರಮ್ಮ ಎಂಬುವವರಿಗೆ 35 ಸಾವಿರ ರೂಗಳ ಚೆಕ್ನ್ನು ಮನೆ ನಿರ್ಮಾಣಕ್ಕೆ ನೀಡಿದ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದರು.
ಪ್ರವಾಹದಲ್ಲಿ ಮನೆ ಕಳೆದು ಕೊಂಡವರಿಗೆ, ತೊಂದರೆಯಲ್ಲಿರು ವವರಿಗೆ ಸರ್ಕಾರ ನೆರವು ದೊರಕಿ ಸುತ್ತಿದೆ. ಸಂತ್ರಸ್ತರು ಮನೆ ನಿರ್ಮಿಸಿ ಕೊಳ್ಳಲು ಅಥವಾ ಇನ್ಯಾವುದೇ ರೀತಿ ಪರಿಹಾರದ ಚೆಕ್ ಪಡೆಯುವಾಗ ಅಧಿಕಾರಿಗಳಿಗಾಗಲಿ, ಪುಢಾರಿಗಳಿ ಗಾಗಲಿ ಲಂಚ ಕೊಡಬಾರದು. ಅಧಿಕಾರಿ ಗಳೂ ಸಹ ಸಂತ್ರಸ್ತರಿಗೆ ತುರ್ತು ಪರಿಹಾರದ ಚೆಕ್ ವಿತರಿಸಬೇಕು. ಇದರಲ್ಲಿ ಯಾರೇ ಜನಪ್ರತಿನಿಧಿಗಳ ಅನವಶ್ಯಕ ಕಿರಿ ಕಿರಿಗೆ ಕಿವಿಗೊಡಬಾರದು ಎಂದು ಸೂಚಿಸಿರುವುದಾಗಿ ಹೇಳಿದರು.
ಸಂತ್ರಸ್ತರಿಗೆ ಈಗ ತಾತ್ಕಾಲಿಕವಾಗಿ ಶೆಡ್ ನಿರ್ಮಿಸಲಾಗಿದೆ. ಒಂದು ತಿಂಗಳವರೆಗೆ ಆಹಾರ ಧಾನ್ಯ ವಿತರಿಸುತ್ತಿದೆ. ಪರಿಹಾರ ಕಾಮ ಗಾರಿಯಲ್ಲಿ ಕೆಲಸ ಮಾಡುವವರಿಗೆ ದಿನಕ್ಕೆ 100 ರೂಗಳನ್ನು ದೊರಕಿಸುವ ಕೆಲಸ ಮಾಡುತ್ತಿದೆ ಎಂದು ಹೇಳಿದರು.
200 ಗ್ರಾಮ ಸ್ಥಳಾಂತರ: ಅನೇಕ ವರ್ಷಗಳಿಂದ ಪ್ರವಾಹ ಭೀತಿ ಎದುರಿಸುತ್ತಿರುವ ರಾಜ್ಯದ ಸುಮಾರು 200 ಗ್ರಾಮಗಳಲ್ಲಿ ಎತ್ತರ ಸ್ಥಳಕ್ಕೆ ಸ್ಥಳಾಂತರಿಸಿ ನವ ಗ್ರಾಮ ನಿರ್ಮಿಸುವ ಯೋಜನೆ ಇದೆ. ಈ ನವಗ್ರಾಮದಲ್ಲಿ 1 ಲಕ್ಷ ಮೊತ್ತದಲ್ಲಿ ಮನೆ ನಿರ್ಮಿಸ ಲಾಗುವುದು. ಈ ನವಗ್ರಾಮ ನಿರ್ಮಾ ಣಕ್ಕೆ ಬೇಕಾದ ಅಗತ್ಯ ಭೂಮಿ ದೊರಕಿಸುವ ರೈತರಾಗಲಿ ಅಥವಾ ಇನ್ಯಾರೇ ಆಗಲಿ ಅವರಿಗೆ ಸೂಕ್ತ ಪರಿಹಾರ ಧನ ನೀಡಲಾಗುವುದು. ಅಲ್ಲದೇ ಈ ನವಗ್ರಾಮದಲ್ಲಿಯೇ ಅವರಿಗೆ ಒಂದು ಮನೆ ನಿರ್ಮಿಸಿ ಕೊಡಲಾಗುವುದು ಎಂದು ತಿಳಿಸಿದರು.
ರಸ್ತೆ, ಉದ್ಯಾನವನ, ಶಾಲೆ, ಕುಡಿಯುವ ನೀರು, ವಿದ್ಯುತ್ ಸೇರಿದಂತೆ ಎಲ್ಲ ಮೂಲಭೂತ ಸೌಲಭ್ಯ ದೊರಕಿಸಲಾಗುವುದು ಎಂದು ಹೇಳಿದ ಅವರು, ಪ್ರವಾಹ ಪೀಡಿತ ಪ್ರದೇಶದಲ್ಲಿ 500 ಪ್ರಾಥಮಿಕ ಮತ್ತು 500 ಪ್ರೌಢ ಶಾಲೆಗಳನ್ನು ನಿರ್ಮಿಸಲಾಗುವುದು. ಈಗ ಶಾಲೆ ಆರಂಭಗೊಳ್ಳುತ್ತಿದ್ದು, ಮಕ್ಕಳ ಶಿಕ್ಷಣಕ್ಕೆ ತೊಂದರೆಯಾಗದಂತೆ ನೋಡಿಕೊಳ್ಳಲಾಗುವುದು. ಪಠ್ಯ ಪುಸ್ತಕ, ಸಮವಸ್ತ್ರ ಸೇರಿದಂತೆ ಎಲ್ಲ ಅಗತ್ಯ ಸೌಲಭ್ಯ ದೊರಕಿಸಲಾಗುವುದು ಎಂದು ಹೇಳಿದರು.
ರೈತರ ಸಾಲ ಮನ್ನಾಗೆ ಒತ್ತಾಯ: ರಾಜ್ಯದಲ್ಲಿ ಸುಮಾರು 800 ಕೋಟಿಗೂ ಅಧಿಕ ರೈತರ ಸಾಲವಿದೆ. ಈ ಸಾಲ ಮನ್ನಾ ಮಾಡಲು ಕೇಂದ್ರಕ್ಕೆ ಮನವಿ ಮಾಡಲಾಗುವುದು. ಪರಿ ಹಾರ ಮೊತ್ತ ದ್ವಿಗುಣಗೊಳಿಸಲು ಕೋರಲಾಗುವುದು. ಕೇಂದ್ರ ಸೂಕ್ತ ರೀತಿಯಲ್ಲಿ ಸ್ಪಂದಿಸದೇ ಇದ್ದಲ್ಲಿ ಮತ್ತೆ ಜನತೆಯ ಬಳಿ ಜೋಳಿಗೆ ಹಿಡಿದು ರೈತರ ನೆರವಿಗೆ ಧಾವಿಸುತ್ತೇನೆ. ರೈತರು ಆತಂಕ ಪಡಬೇಕಿಲ್ಲ ಎಂದರು.
ಆತ್ಮಹತ್ಯೆ ದಾರಿ ಅಲ್ಲ: ಪ್ರವಾಹ ಬಂತು, ಹಾಳಾಯಿತು ಎಂದು ರೈತರು ಧೃತಿಗೆಡಬೇಕಿಲ್ಲ. ಅನ್ನ ಕೊಡುವ ರೈತ ಕಣ್ನೀರು ಹಾಕಬಾರದು. ಆತ್ಮಹತ್ಯೆ ಯಂಥ ಪ್ರಯತ್ನ ಮಾಡಲೇಬಾರದು. ಸರ್ಕಾರ ಸೂಕ್ತ ರೀತಿಯಲ್ಲಿ ನೆರವಿಗೆ ಧಾವಿಸುತ್ತಿವೆ ಎಂದು ಯಡಿಯೂರಪ್ಪ ಹೇಳಿದರು.
