ಕೊಲಂಬೊ: ಆತಿಥೇಯ ಲಂಕಾ ವಿರುದ್ಧ ಇಲ್ಲಿನ ಪ್ರೇಮದಾಸ ಕ್ರೀಡಾಂಗಣದಲ್ಲಿ ತ್ರಿಕೋನ ಏಕದಿನ ಕ್ರಿಕೆಟ್ ಸರಣಿಯ ಫೈನಲ್ನಲ್ಲಿ ಆಡಲು ಸೋಮವಾರ ಕಣಕ್ಕಿಳಿಯಲಿರುವ ಭಾರತಕ್ಕೆ ಈ ಪಂದ್ಯ ಪ್ರತಿಷ್ಠೆಯ ಪ್ರಶ್ನೆಯಾಗಿ ಪರಿಣಮಿಸಿದೆ.
ಸರಣಿಯ ಮೊದಲ ಪಂದ್ಯದಲ್ಲಿ ತಿಣುಕಾಡುತ್ತಲೇ ನ್ಯೂಜಿಲೆಂಡ್ ತಂಡ ವನ್ನು ಮಣಿಸಿದ್ದ ‘ಮೆನ್ ಇನ್ ಬ್ಲೂ’ ಪಡೆ ಏಕದಿನ ರ್ಯಾಂಕಿಂಗ್ನಲ್ಲಿ ಅಗ್ರಸ್ಥಾ ನ ಕ್ಕೇರಿತ್ತು. ಆದರೆ ಶ್ರೀಲಂಕಾ ಎದು ರಿನ ಸೋಲು ಮತ್ತೆ ಯಥಾಸ್ಥಿತಿಗೆ ಮರಳಿಸಿದೆ. 139 ರನ್ಗಳ ಪರಾಭವ ಒಮ್ಮೆಲೇ ಆಘಾತಕ್ಕೆ ಕಾರಣವಾಗಿದೆ. ಬ್ಯಾಟಿಂಗ್ ವೈಫಲ್ಯವೇ ಭಾರತದ ಪರದಾಟಕ್ಕೆ ಪ್ರಮುಖ ಕಾರಣ. ದಿನೇಶ್ ಕಾರ್ತಿಕ್ ಹಾಗೂ ಯುವರಾಜ್ ಸಿಂಗ್ ಎರಡೂ ಪಂದ್ಯಗಳಲ್ಲಿ ವಿಫಲರಾಗಿದ್ದಾರೆ.
ಭಾರತ ಇತ್ತೀಚಿನ ದಿನಗಳಲ್ಲಿ ಲಂಕಾ ನೆಲದಲ್ಲಿ ಅತ್ಯುತ್ತಮ ಪ್ರದರ್ಶನವನ್ನೇ ತೋರಿದೆ. ಅದಕ್ಕೆ ಸಾಕ್ಷಿ ಈ ಹಿಂದೆ ನಡೆದ
ಎರಡೂ ಸರಣಿಗಳಲ್ಲಿ ಲಭಿಸಿದ ಗೆಲುವು. ಆದರೆ ಗೌತಮ್ ಗಂಭೀರ್, ವೀರೇಂದ್ರ ಸೆಹ್ವಾಗ್ ಹಾಗೂ ವೇಗಿ ಜಹೀರ್ ಖಾನ್ ಅನುಪಸ್ಥಿತಿ ಈಗ ಕಾಡುತ್ತಿದೆ.
ಸಚಿನ್ ತೆಂಡೂಲ್ಕರ್ ಜೊತೆ ಲೀಗ್ನ ಎರಡು ಪಂದ್ಯಗಳಲ್ಲಿ ಇನಿಂ ಗ್ಸ್ ಆರಂಭಿಸಿದ್ದ ದಿನೇಶ್ ಕಾರ್ತಿಕ್ ‘ಕ್ಲಿಕ್’ ಆಗಲೇ ಇಲ್ಲ. ಜೊತೆಗೆ ಇದು ತೆಂಡೂಲ್ಕರ್ ತಮ್ಮ ಸಹಜ ಆಟವಾಡಲು ಅಡ್ಡಿಯಾಗುತ್ತಿದೆ. ಅವರು ಎರಡೂ ಪಂದ್ಯಗಳಲ್ಲಿ ಉತ್ತಮ ಇನಿಂಗ್ಸ್ ಕಟ್ಟಲು ಪ್ರಯತ್ನಿಸಿದ್ದಾರೆ. ಮೊದಲ ಪಂದ್ಯದಲ್ಲಿ 46 ರನ್ ಗಳಿಸಿದ್ದ ಮಾಸ್ಟರ್ ಬ್ಲಾಸ್ಟರ್ ಮತ್ತೊಂದರಲ್ಲಿ 27 ರನ್ ಪೇರಿಸಿದ್ದರು. ಕಾರ್ತಿಕ್ ಬದಲಿಗೆ ವಿರಾಟ್ ಕೊಹ್ಲಿಗೆ ಸ್ಥಾನ ನೀಡಿದರೆ ಅಚ್ಚರಿಪಡಬೇಕಾಗಿಲ್ಲ.
ಬೌಲಿಂಗ್ನಲ್ಲಿ ಮಿಂಚುತ್ತಿರುವ ಯುವರಾಜ್ ಬ್ಯಾಟಿಂಗ್ನಲ್ಲಿ ಏಕೋ ಎಡವುತ್ತಿದ್ದಾರೆ. ಕಿವೀಸ್ ಪಡೆ ಎದುರು ಪರಿಣಾಮಕಾರಿಯಾಗಿದ್ದ ಬೌಲಿಂಗ್ ಒಮ್ಮೆಲೆ ಕೈಕೊಟ್ಟಿದೆ. ಇಶಾಂತ್ ಶರ್ಮ ‘ಕ್ಲಿಕ್’ ಆಗುತ್ತಿಲ್ಲ. ಹಾಗಾಗಿ ಅವರ ಬದಲು ಪ್ರವೀಣ್ ಕುಮಾರ್ ಸ್ಥಾನ ಪಡೆಯಬಹುದು ಅಥವಾ ಮೊದಲೆರಡು ಪಂದ್ಯಗಳಲ್ಲಿ ಆಡಿದ ತಂಡವನ್ನೇ ಉಳಿಸಿಕೊಳ್ಳಲು ನಾಯಕ ದೋನಿ ಬಯಸಬಹುದು.
ಶ್ರೀಲಂಕಾ ಲೀಗ್ನಲ್ಲಿ ಎರಡೂ ಪಂದ್ಯಗಳಲ್ಲಿ ಪ್ರಬುದ್ಧ ಪ್ರದರ್ಶನ ನೀಡಿದೆ. ಬ್ಯಾಟಿಂ ಗ್ ಹಾಗೂ ಬೌಲಿಂ ಗ್ ನಲ್ಲಿ ಪ್ರಭಾವಿ ಆಟ ತೋರುತ್ತಿದೆ. ಸನತ್ ಜಯ ಸೂರ್ಯ ಒಮ್ಮೆಲೆ ಫಾರ್ಮ್ ಕಂಡು ಕೊಂಡಿರು ವುದು ಭಾರತದ ಬೌಲರ್ ಗಳ ಆತಂಕಕ್ಕೆ ಕಾರಣವಾಗಿದೆ. ಉಭಯ ತಂಡಗಳ ನಡುವಿನ ಕಳೆದ 7 ಫೈನಲ್ಗಳಲ್ಲಿ ಭಾರತ ಗೆದ್ದಿಲ್ಲ. ಹಾಗಾಗಿ ದೋನಿ ಪಡೆಗೆ ಇದೊಂದು ಸವಾಲು.
