ಬೆಂಗಳೂರು: 4,2,6,6,4,4 ಇದು ರಾಬಿನ್ ಉತ್ತಪ್ಪ ಅವರು ಪಂದ್ಯದ ಹನ್ನೊಂದನೇ ಓವರ್‌ನಲ್ಲಿ ಶಾಮನೂರು ದಾವಣಗೆರೆ ಡೈಮಂಡ್ಸ್ ತಂಡದ ಬೌಲರ್ ಎಸ್.ಟಿ. ಶರತ್ ಅವರನ್ನು ದಂಡಿಸಿದ ರೀತಿ. ಅನುಭವದ ಖಣಿಯಾದ ಕೊಡಗಿನ ಕುವರ ರಾಬಿನ್ ಉತ್ತಪ್ಪ ಅವರು ಕ್ರೀಡಾಂಗಣದ ಎಲ್ಲಾ ಮೂಲೆಗಳಿಗೂ ಚೆಂಡನ್ನು ಅಟ್ಟಿ ತಮ್ಮ ಭುಜ ಬಲದ ಪರಾಕ್ರಮ ತೋರಿದರು. ಅಷ್ಟೇ ಅಲ್ಲ ಬೆಂಗಳೂರು ಬ್ರಿಗೇಡಿಯರ್ಸ್ ತಂಡಕ್ಕೆ ಎಂಟು ವಿಕೆಟ್ ಗೆಲುವು ತಂದುಕೊಟ್ಟರು.

ಇದರೊಂದಿಗೆ ಕರ್ನಾಟಕ ಪ್ರೀಮಿಯರ್ ಲೀಗ್ (ಕೆಪಿಎಲ್) ಟ್ವೆಂಟಿ-20 ಟೂರ್ನಿಯ ಲೀಗ್ ಹಂತದಲ್ಲಿ ತನ್ನ ಖಾತೆಯಲ್ಲಿ 12 ಪಾಯಿಂಟ್ ಹೊಂದಿದ ಬ್ರಿಗೇಡಿಯರ್ಸ್ ಸೆಮಿಫೈನಲ್ ಪ್ರವೇಶಿಸಿತು. ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಶಾಮನೂರು ದಾವಣಗೆರೆ ಡೈಮಂಡ್ಸ್ ನಿಗದಿತ 20 ಓವರುಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 118 ರನ್‌ಗಳಿಸಿತು.

ಇದಕ್ಕೆ ಉತ್ತರವಾಗಿ ಬೆಂಗಳೂರು ಬ್ರಿಗೇಡಿಯರ್ಸ್ ಎರಡು ವಿಕೆಟ್  ನಷ್ಟಕ್ಕೆ 121 ರನ್ ಗಳಿಸಿತು. ಅದೂ ಕೇವಲ 13.4 ಓವರುಗಳಲ್ಲಿ.

ರಾಬಿನ್ (ಔಟಾಗದೇ 69; 43 ನಿ., 32 ಎ., 6 ಬೌಂಡರಿ, 4 ಸಿಕ್ಸರ್) ಅಬ್ಬರದ ಎದುರು ದಾವಣಗೆರೆ ಕಳೆಗುಂದಿತು. ದೀಪಕ್ ಚೌಗುಲೆ (ಔಟಾಗದೇ 9; 21 ನಿ., 14 ಎ.,) ಹೆಚ್ಚು ರನ್ ಗಳಿಸದಿದ್ದರೂ, ಮತ್ತೊಂದು ತುದಿಯಲ್ಲಿದ್ದ ಉತ್ತಪ್ಪಗೆ ಉತ್ತಮ ಸಾಥ್ ನೀಡಿದರು. 

ಮೊದಲು ಬ್ಯಾಟ್ ಮಾಡುವ ಅವಕಾಶ ಪಡೆದ ಶಾಮನೂರು ದಾವಣಗೆರೆ ಡೈಮಂಡ್ಸ್ ತಂಡಕ್ಕೆ ಆರಂಭ ಆಟಗಾರರಾದ ಮಯಾಂಕ್ ಅಗರ್ವಾಲ್ (7) ಹಾಗೂ ಕೆ.ಬಿಪಿನ್ (19) ಭದ್ರ ಬುನಾದಿ ಹಾಕುವ ಪ್ರಯತ್ನದಲ್ಲಿ ವಿಫಲರಾದರು. ಇವರು ಭಾರಿ ಮೊತ್ತ ಕಲೆ ಹಾಕುವ ಸೂಚನೆ ನೀಡಿತ್ತಾದರೂ, ಡೇವಿಡ್ ಮಥಾಯಿಸ್ ಬೌಲಿಂಗ್‌ನಲ್ಲಿ ಮಯಾಂಕ್ ಅವರು ರಾಬಿನ್‌ಗೆ ಕ್ಯಾಚಿತ್ತು ನಿರ್ಗಮಿಸಿದರು. ಬಳಿಕ ಮಯಾಂಕ್ ಜೊತೆಗೂಡಿದ ನಿಧೀಶ್ ರನ್ ವೇಗವನ್ನು ಹೆಚ್ಚಿಸುವ ಸಾಹಸ ಮಾಡಿದರು.

ನಿಧೀಶ್ (54; 74 ನಿ., 45 ಎ., 1 ಬೌಂಡರಿ, 3 ಸಿಕ್ಸರ್) ಹಾಗೂ ಪವನ್ ದೇಶಪಾಂಡೆ (20; 31 ನಿ., 24 ಎ.,) ಅವರು ಐದನೇ ವಿಕೆಟ್ ಜೊತೆಯಾಟದಲ್ಲಿ 50 ರನ್ ಕಲೆಹಾಕಿದರು. ಡೈಮಂಡ್ಸ್ ತಂಡವನ್ನು ನೂರರ ಗಡಿಯತ್ತ ತಂದು ನಿಲ್ಲಿಸಿದರು.

ಪವನ್ ತಮ್ಮ ವೈಯಕ್ತಿಕ ಮೊತ್ತ 16 ರನ್ ಆಗಿದ್ದಾಗ ಸ್ಟೀವ್ ಲಾಜರಸ್ ದಾಳಿಯಲ್ಲಿ ನಿಶಾಂತ್ ಚೆಂಡನ್ನು ಕೈಚೆಲ್ಲಿ ಪ್ರಮಾದ ಮಾಡಿದರು. ಆಗ ತಂಡದ ಮೊತ್ತ 85 ರನ್‌ಗಳಾಗಿತ್ತು. ಆದರೆ ಇದರಿಂದ ದಾವಣಗೆರೆ ತಂಡಕ್ಕೆ ಹೆಚ್ಚಿನ ಲಾಭವೇನು ಆಗಲಿಲ್ಲ. ನಾಯಕ ಸುನೀಲ್ ಜೋಶಿ ಜೊತೆಗೂಡಿದ ನಿಧೀಶ್ ಚುರುಕು ತೋರಿದರು. ಆರನೇ ವಿಕೆಟ್ ಜೊತೆಯಾಟದಲ್ಲಿ 28 ರನ್ ಸೇರಿಸಿದರು.