ನವದೆಹಲಿ (ಪಿಟಿಐ): ರಾಜ್ಯ ಸರ್ಕಾರ ಸ್ವಾಮ್ಯದ ಕಂಪೆನಿಗಳ (ಎಸ್‌ಎಲ್‌ಪಿಇ) ಸಂಖ್ಯೆಗೆ ಹಾಗೂ ಹೂಡಿಕೆ ಪ್ರಮಾಣ ಸಮವಾಗಿಲ್ಲ ಎನ್ನುವುದು ರಾಷ್ಟ್ರೀಯ ಸಮೀಕ್ಷೆಯಲ್ಲಿ ತಿಳಿದುಬಂದಿದೆ.

ಕೇರಳದಲ್ಲಿ ಅತಿ ಹೆಚ್ಚು 89 ರಾಜ್ಯ ಸರ್ಕಾರ ಸ್ವಾಮ್ಯದ ಕಂಪೆನಿಗಳಿವೆ. ಅದಾಗ್ಯೂ, ಹೂಡಿಕೆ ವಿಷಯದಲ್ಲಿ ಈ ರಾಜ್ಯ ತೀರ ಹಿಂದುಳಿದಿದೆ ಎಂದು  ಸಾರ್ವಜನಿಕ ಕಂಪೆನಿಗಳ ಇಲಾಖೆ ಪ್ರಕಟಿಸಿದ ಸಮೀಕ್ಷೆ ಹೇಳಿದೆ.

ಕ್ಷೇತ್ರವಾರು ಪರಿಶೀಲಿಸಿದರೆ ಅತಿ ಹೆಚ್ಚು ರೂ 2,23,771 ಕೋಟಿ ಹೂಡಿಕೆ ಆಗಿರುವುದು ವಿದ್ಯುತ್ ವಲಯದ ಕಂಪೆನಿಗಳಲ್ಲಿ. ನಂತರದ ಸ್ಥಾನ ಕೈಗಾರಿಕೆ(ರೂ 31,979 ಕೋಟಿ)ಗೆ ದೊರೆತಿದೆ.

ಮೂರನೇ ಸ್ಥಾನದಲ್ಲಿ ಹಣಕಾಸು ಸೇವಾ ವಲಯ (ರೂ 26,968 ಕೋಟಿ) ಇದೆ.

‘ಹಲವಾರು ರಾಜ್ಯ ಸರ್ಕಾರ ಸ್ವಾಮ್ಯದ ಕಂಪೆನಿಗಳು ಲಾಭದಲ್ಲಿವೆ. ಇನ್ನುಳಿದ ಕೆಲವು ಕಂಪೆನಿಗಳು ನಷ್ಟದಲ್ಲಿವೆ. ಇವುಗಳ ಪುನಃಶ್ಚೇತನಕ್ಕೆ ಕ್ರಮಕೈಗೊಳ್ಳಲಾಗುವುದು’ ಎಂದು ಭಾರಿ ಕೈಗಾರಿಕೆಗಳು ಹಾಗೂ ಸರ್ಕಾರಿ ಸ್ವಾಮ್ಯದ ಕಂಪೆನಿಗಳ ಸಚಿವ ವಿಲಾಸ್‌ರಾವ್ ದೇಶಮುಖ್ ಪ್ರತಿಕ್ರಿಯಿಸಿದ್ದಾರೆ.

2007ರ ಮಾರ್ಚ್ 31ರವರೆಗೆ ಸರ್ಕಾರಿ ಸ್ವಾಮ್ಯದ 837 ಕಂಪೆನಿಗಳು ಕಾರ್ಯನಿರ್ವಹಿಸುತ್ತಿದ್ದವು. ಇವುಗಳಲ್ಲಿ 18 ಲಕ್ಷ ನೌಕರರು ಸೇವೆ ಸಲ್ಲಿಸುತ್ತಿದ್ದಾರೆ.