ಸೆಂಚೂರಿಯನ್: ಸೆಂಚೂರಿಯನ್‌ನ ಸೂಪರ್ ಸ್ಪೋರ್ಟ್ಸ್ ಕ್ರೀಡಾಂಗಣದಲ್ಲಿ ಭಾನವಾರ ರಾತ್ರಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ 50 ಓವರ್‌ಗಳಲ್ಲಿ 8 ವಿಕೆಟ್‌ಗೆ 323 ರನ್ ಪೇರಿಸಿತು. ಒವೇಸ್ ಶಾ (98), ಪಾಲ್ ಕಾಲಿಂಗ್‌ವುಡ್ (82) ಮತ್ತು ಇಯೊನ್ ಮಾರ್ಗನ್ (67) ಅವರ ಜವಾಬ್ದಾರಿಯುವ ಬ್ಯಾಟಿಂಗ್ ತಂಡದ ಬೃಹತ್ ಮೊತ್ತಕ್ಕೆ ಕಾರಣ.

ಕೊನೆಯವರೆಗೆ ಹೋರಾಟ ನಡೆಸಿದ ದಕ್ಷಿಣ ಆಫ್ರಿಕಾಕ್ಕೆ 50 ಓವರ್‌ಗಳಲ್ಲಿ 9 ವಿಕೆಟ್‌ಗೆ 301 ರನ್ ಗಳಿಸಲು ಮಾತ್ರ ಸಾಧ್ಯವಾಯಿತು. ನಾಯಕ ಗ್ರೇಮ್ ಸ್ಮಿತ್ (141) ಅವರ ಭರ್ಜರಿ ಶತಕ ವ್ಯರ್ಥವಾಯಿತು. ಇದರೊಂದಿಗೆ ಆಡಿದ ಮೂರು ಪಂದ್ಯಗಳಲ್ಲಿ ಎರಡರಲ್ಲೂ ಸೋಲು ಅನುಭವಿಸಿದ ಆತಿಥೇಯರು ಟೂರ್ನಿಯಿಂದ ಹೊರಬಿದ್ದರು.

ದಕ್ಷಿಣ ಆಫ್ರಿಕಾ 314 ರನ್ ಗಳಿಸಿದ್ದರೆ ರನ್‌ರೇಟ್‌ನಲ್ಲಿ ಶ್ರೀಲಂಕಾ ತಂಡವನ್ನು ಹಿಂದಕ್ಕುತ್ತಿತ್ತು. ಹಾಗಾದಲ್ಲಿ ತಂಡದ ಸೆಮಿಫೈನಲ್ ಪ್ರವೇಶದ ಕನಸು ಜೀವಂತವಾಗಿರುತ್ತಿತ್ತು. ಆದರೆ ಇಂಗ್ಲೆಂಡ್ ಬೌಲರ್‌ಗಳು ಅದಕ್ಕೆ ಅವಕಾಶ ನೀಡಲಿಲ್ಲ. ಜೇಮ್ಸ್ ಆ್ಯಂಡರ್‌ಸನ್ (42ಕ್ಕೆ 3) ಮತ್ತು ಸ್ಟುವರ್ಟ್ ಬ್ರಾಡ್ (67ಕ್ಕೆ 3) ಇಂಗ್ಲೆಂಡ್ ಗೆಲುವಿಗೆ ತಮ್ಮ ಕೊಡುಗೆ ನೀಡಿದರು.

ಐಸಿಸಿ ನಡೆಸುವ ಪ್ರಮುಖ ಟೂರ್ನಿಗಳಲ್ಲಿ ನಿರ್ಣಾಯಕ ಹಂತದಲ್ಲಿ ಸೋಲು ಅನುಭವಿಸುವ ದಕ್ಷಿಣ ಆಫ್ರಿಕಾ ತಂಡದ ದುರಂತ ಕತೆ ಮತ್ತೆ ಮುಂದುವರಿಯಿತು. ಒಂದು ಕಡೆಯಿಂದ ವಿಕೆಟ್ ಉರುಳುತ್ತಿದ್ದರೂ ಕ್ರೀಸ್ ಬಳಿ ನೆಲೆಯೂರಿ ನಿಂತ ಸ್ಮಿತ್ ಅದ್ಭುತ ಆಟ ತೋರಿದರಾದರೂ ತಂಡವನ್ನು ಗೆಲುವಿನ ದಡ ಮುಟ್ಟಿಸಲು ವಿಫಲರಾದರು.

47ನೇ ಓವರ್‌ನಲ್ಲಿ ಸ್ಟುವರ್ಟ್ ಬ್ರಾಡ್ ಎಸೆತದಲ್ಲಿ ಸ್ಮಿತ್ ಔಟಾಗುವುದರೊಂದಿಗೆ ಆತಿಥೇಯ ತಂಡದ ಗೆಲುವಿನ ಕನಸು ಕೂಡಾ ಅಸ್ತಮಿಸಿತು. 134 ಎಸೆತಗಳನ್ನು ಎದುರಿಸಿದ ಈ ಆರಂಭಿಕ ಬ್ಯಾಟ್ಸ್ ಮನ್ 16 ಬೌಂಡರಿ ಸಿಡಿಸಿದರು. ಅವರಿಗೆ ಮತ್ತೊಂದು ಕಡೆಯಿಂದ ಉತ್ತಮ ಬೆಂಬಲ ಲಭಿಸಲಿಲ್ಲ. ಒಂದೆರಡು ದೊಡ್ಡ ಜೊತೆಯಾಟ ಗಳೂ ಮೂಡಿ ಬರಲಿಲ್ಲ.

ದಕ್ಷಿಣ ಆಫ್ರಿಕಾಕ್ಕೆ ಕೊನೆಯ 10 ಓವರ್‌ಗಳಲ್ಲಿ ಗೆಲುವಿಗೆ 94 ರನ್ ಗಳಿಸಬೇಕಿತ್ತು. ಮಾತ್ರವಲ್ಲ ಆರು ವಿಕೆಟ್‌ಗಳೂ ಕೈಯಲ್ಲಿದ್ದವು. ಆದರೆ ತಂಡ 71 ರನ್ ಗಳಿಸಲಷ್ಟೇ ಶಕ್ತವಾಯಿತು. ಮಾರ್ಕ್ ಬೌಷರ್ (8), ಅಲ್ಬಿ ಮಾರ್ಕೆಲ್ (17) ಮತ್ತು ಜೋಹಾನ್ ಬೋಥಾ (0) ಒತ್ತಡದಲ್ಲಿ ವಿಕೆಟ್ ಒಪ್ಪಿಸಿದ್ದು ತಂಡಕ್ಕೆ ಮುಳುವಾಗಿ ಪರಿಣಮಿಸಿತು.

ಇದಕ್ಕೂ ಮೊದಲು ಒವೇಸ್ ಶಾ ಮತ್ತು ಪಾಲ್ ಕಾಲಿಂಗ್‌ವುಡ್ ಮೂರನೇ ವಿಕೆಟ್‌ಗೆ ಪೇರಿಸಿದ 163 ರನ್‌ಗಳ ಜೊತೆಯಾಟದ ನೆರವಿನಿಂದ ಇಂಗ್ಲೆಂಡ್‌ಗೆ ಸವಾಲಿನ ಮೊತ್ತ ಪೇರಿಸಲು ಸಾಧ್ಯ ವಾಯಿತು. 89ಎಸೆತಗಳನ್ನು ಎದುರಿಸಿದ ಶಾ ಐದು ಬೌಂಡರಿ ಹಾಗೂ ಆರು ಸಿಕ್ಸರ್ ಸಿಡಿಸಿದರು. ಆದರೆ ಅವರು ಅರ್ಹ ಶತಕವನ್ನು ಕೇವಲ ಎರಡು ರನ್‌ಗಳಿಂದ ತಪ್ಪಿಸಿಕೊಂಡರು. ಕಾಲಿಂಗ್‌ವುಡ್ 94 ಎಸೆತಗಳನ್ನು ಎದುರಿಸಿ ಆರು ಬೌಂಡರಿ ಹಾಗೂ ಒಂದು ಸಿಕ್ಸರ್ ಸಿಡಿಸಿದರು.