ಬೆಂಗಳೂರು: ನಗರದ ಆರ್.ಟಿ.ನಗರ ಸಮೀಪದ ಚಾಮುಂಡಿನಗರದಲ್ಲಿ ಹನ್ನೆರೆಡು ವರ್ಷದ ಬಾಲಕಿ ಮೇಲೆ ಆಕೆಯ ಚಿಕ್ಕಪ್ಪ ಅತ್ಯಾಚಾರ ಎಸಗಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.
ಚಾಮುಂಡಿನಗರ ನಿವಾಸಿ, ಆರೋಪಿ ಅಮ್ಜದ್ನನ್ನು (32) ಪೊಲೀಸರು ಗುರುವಾರ ಬಂಧಿಸಿದ್ದಾರೆ. ಬಡಗಿಯಾದ ಅಮ್ಜದ್ನ ಅಣ್ಣ, ಅತ್ತಿಗೆ 4 ವರ್ಷಗಳ ಹಿಂದೆ ಸಾವನ್ನಪ್ಪಿದ್ದರು. ಅಣ್ಣನ ಮಗಳನ್ನು ಈತನೇ ಸಾಕುತ್ತಿದ್ದ. ಅಮ್ಜದ್ನ ಪತ್ನಿ ಶನಿವಾರ (ಆ.16) ತವರು ಮನೆಗೆ ಹೋಗಿದ್ದರು. ಆಗ ಆರೋಪಿ ಕೃತ್ಯ ಎಸಗಿದ್ದಾನೆ. ಮನೆಯಲ್ಲಿದ್ದ ಬಾಲಕಿ ಜ್ವರದಿಂದ ಬಳಲುತ್ತಿದ್ದಳು. ಬಾಲಕಿಗೆ ಔಷಧ ಕೊಟ್ಟಿರುವ ಆತ ಆಕೆ ಮಲಗಿದ ಮೇಲೆ ಅತ್ಯಾಚಾರ ಎಸಗಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.
ನಿದ್ದೆಯಿಂದ ಎಚ್ಚರಗೊಂಡ ಬಾಲಕಿ ಮೇಲೆ ಬಟ್ಟೆಗಳು ಅಸ್ತವ್ಯಸ್ತವಾಗಿದ್ದವು. ಈ ವಿಷಯವನ್ನು ಆಕೆ ತನ್ನ ಅಜ್ಜಿಗೆ ತಿಳಿಸಿದಾಗ ಕೃತ್ಯ ಬೆಳಕಿಗೆ ಬಂದಿದೆ. ಬಾಲಕಿಯ ಸಂಬಂಧಿಕರು ನೀಡಿರುವ ದೂರು ಆಧರಿಸಿ ಅಮ್ಜದ್ನನ್ನು ಬಂಧಿಸಲಾಗಿದೆ ಎಂದು
ಪೊಲೀಸರು ಹೇಳಿದ್ದಾರೆ.
ಆರೋಪಿ ವಿರುದ್ಧ ಲೈಂಗಿಕ ಅಪರಾಧಗಳಿಂದ ಮಕ್ಕಳನ್ನು ರಕ್ಷಿಸುವ ಕಾಯ್ದೆಯಡಿ (ಪೋಕ್ಸೊ) ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದು ಆರ್.ಟಿ.ನಗರ ಪೊಲೀಸರು ತಿಳಿಸಿದ್ದಾರೆ.