ಅತ್ಯಾಚಾರ ನಡೆದ ಮೇಲಷ್ಟೇ ಕ್ರಮ ಸಾಧ್ಯ

ಭೋಪಾಲ್‌ (ಪಿಟಿಐ): ಅತ್ಯಾಚಾರ ಪ್ರಕರಣಗಳ ತಡೆಗೆ ಯಾವುದೇ ಸರ್ಕಾರ ಖಾತ್ರಿ ನೀಡಲು ಸಾಧ್ಯವಿಲ್ಲ. ಘಟನೆಯ ಬಳಿಕವಷ್ಟೇ ಕ್ರಮ ಜರುಗಿಸ­ಬಹುದು ಎಂದು ಮಧ್ಯ ಪ್ರದೇಶದ ಗೃಹ ಸಚಿವ ಬಾಬುಲಾಲ್‌ ಗೌರ್‌ ಅವರು ಗುರುವಾರ ಇಲ್ಲಿ ಹೇಳಿಕೆ ನೀಡಿದರು.

ಅವರ ಈ ಹೇಳಿಕೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಕಾಂಗ್ರೆಸ್‌, ಬಾಬು­ಲಾಲ್‌ ಅವರು ಹುದ್ದೆಯಲ್ಲಿ ಮುಂದು­ವರಿಯುವ ಹಕ್ಕು ಕಳೆದುಕೊಂಡಿದ್ದಾರೆ ಎಂದಿದೆ.

‘ಇದೊಂದು ಸಾಮಾಜಿಕ ಅಪರಾಧ­ವಾಗಿದ್ದು, ಇದು ಪುರುಷ ಮತ್ತು ಮಹಿಳೆಯನ್ನು ಅವಲಂಬಿಸಿದೆ. ಕೆಲವು ಬಾರಿ ಇದು ಸರಿಯಾಗಿದ್ದರೆ ಕೆಲ ಸಲ ತಪ್ಪು ಆಗುತ್ತದೆ. ದೂರು ದಾಖಲಿಸದೇ ಇದ್ದರೆ ಏನೂ ಆಗುವುದಿಲ್ಲ’ ಎಂದು ಗೌರ್‌ ಹೇಳಿದರು.

ಮಹಿಳೆಯರು ಆತ್ಮ ರಕ್ಷಣೆಗೆ ಜೂಡೊ, ಕರಾಟೆ ಕಲಿಯಬೇಕು. ‘ವ್ಯಕ್ತಿ­ಯೊಬ್ಬ ಬಯಸದ ಹೊರತು ಅವರನ್ನು ಮುಟ್ಟಲು ಯಾರು ಕೂಡ ಧೈರ್ಯ ತೋರುವುದಿಲ್ಲ. ಚಲನಚಿ­ತ್ರಗಳ ಲ್ಲಿರುವ ಅಶ್ಲೀಲ ನೃತ್ಯ ವಾತಾವ­ರಣವನ್ನು ಹಾಳು ಮಾಡುತ್ತಿದೆ’ ಎಂದು ಅವರು ಅಭಿಪ್ರಾಯಪಟ್ಟರು.

2007ರಲ್ಲಿ ದೆಹಲಿಯಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಬಾಲಿ­ವುಡ್‌ನ ಹೆಸರಾಂತ ನಟಿಯೊ­ಬ್ಬರಿಗೆ ಹಾಲಿವುಡ್‌ ನಟರೊಬ್ಬರು ಮುತ್ತು ನೀಡಿದ್ದರು. ಆದರೆ, ಅದು ಅವರಿಗೆ ತಪ್ಪು ಎನಿಸಿರಲಿಲ್ಲ ಎಂದೂ ಘಟನೆಯನ್ನು ಉಲ್ಲೇಖಿಸಿದರು.

ಸಚಿವರ ಹೇಳಿಕೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಕಾಂಗ್ರೆಸ್‌ ಮುಖಂಡ ಮನಕ್‌ ಅಗರವಾಲ್‌, ಸಚಿವರು ಅವರ ಹುದ್ದೆಯಲ್ಲಿ ಮುಂದುವರಿ­ಯುವ ಹಕ್ಕು ಕಳೆದುಕೊಂಡಿದ್ದಾರೆ ಎಂದರು.

ಸಚಿವರ ಈ ಹೇಳಿಕೆಯಿಂದ ಅತ್ಯಾ­ಚಾರಿ­ಗಳಿಗೆ ಪ್ರೋತ್ಸಾಹ ನೀಡಿದಂತಾ­ಗಿದೆ. ಸಚಿವರ ಕರ್ತವ್ಯ ಮಹಿಳೆಯರಿಗೆ ರಕ್ಷಣೆ ಒದಗಿಸುವುದೇ ಹೊರತು  ಅತ್ಯಾಚಾರಿಗಳಿಗಲ್ಲ ಎಂದಿದ್ದಾರೆ.

ಸಮಾಜವಾದಿ ಪಕ್ಷದ ಮುಖ್ಯಸ್ಥ ಮುಲಾಯಂ ಸಿಂಗ್‌ ಯಾದವ್‌ ಮತ್ತು ಉತ್ತರ ಪ್ರದೇಶದ ಮುಖ್ಯಮಂತ್ರಿ ಅಖಿಲೇಶ್‌ ಯಾದವ್‌ ಅವರ ಬೆಂಬ­ಲಕ್ಕೆ ಬಂದಿರುವ ಸಚಿವರು, ‘ಉತ್ತರ ಪ್ರದೇಶದಲ್ಲಿ ನಡೆಯುತ್ತಿರುವ ಅತ್ಯಾ­ಚಾರ ಪ್ರಕರಣಗಳನ್ನು ತಡೆಯಲು ಅವರಿಂದ ಸಾಧ್ಯವಿಲ್ಲ’ ಎಂದು ಹೇಳಿ­ದರು.

ಬದಾಯೂಂ ಅತ್ಯಾಚಾರ ಪ್ರಕರಣಕ್ಕೆ ಸಂಬಂಧಿಸಿ ಉತ್ತರ ಪ್ರದೇಶ ಸರ್ಕಾರ ವ್ಯಾಪಕ ಟೀಕೆಗೆ ಗುರಿಯಾಗಿರುವುದನ್ನು ಉಲ್ಲೇಖಿಸಿ ಸಚಿವರು ಹೀಗೆ ಹೇಳಿದರು.

ಸಚಿವರ ಹೇಳಿಕೆಯಿಂದ ಬಿಜೆಪಿ ಅಂತರ ಕಾಯ್ದುಕೊಂಡಿದೆ. ಇದು ಅವರ ವೈಯಕ್ತಿಯ ನಿಲುವು ಎಂದು ಪಕ್ಷದ ನಾಯಕಿ ಲಲಿತಾ ಕುಮಾರಮಂಗಲಂ ಹೇಳಿದ್ದಾರೆ.