ಅನಂತ್‌: ಚಿಗುರು ಮುದ್ದಿಸುವ ಬೇರು

ಕಳೆದ ಒಂದು ವರುಷದಲ್ಲಿ ಭಿನ್ನವಾದ ಹತ್ತು ಪಾತ್ರಗಳನ್ನು ಮಾಡಿದ್ದೇನೆ. ಸುನೀಲ್ ಕುಮಾರ್ ದೇಸಾಯಿ ಅವರ ‘ತಂದಾನ ತಂದಾನ’, ‘ಐರಾವತ’, ‘ಗೋಧಿ ಬಣ್ಣ ಸಾಧಾರಣ ಮೈಕಟ್ಟು’, ‘ಪರಪಂಚ’, ‘ಮದುವೆಯ ಮಮತೆಯ ಕರೆಯೋಲೆ’ ಚಿತ್ರಗಳಲ್ಲಿ ನನ್ನದು ಭಿನ್ನ ಪಾತ್ರಗಳು. ವಯಸ್ಸಾದ ಮೇಲೆ ಚಾಲೆಂಜಿಂಗ್ ಪಾತ್ರಗಳು ಬರುತ್ತಿವೆ! ಸುನೀಲ್ ಕುಮಾರ್ ಹೊರತುಪಡಿಸಿ ಬಹುತೇಕ ಮಂದಿ ಹೊಸಬರು. ಬೇರೆ ಬೇರೆ ಕ್ಷೇತ್ರಗಳಲ್ಲಿನ ಅನುಭಗಳನ್ನು ಜತೆಯಲ್ಲಿಟ್ಟುಕೊಂಡವರು. ಅವರಿಗೆ ಐಡಿಯಾಲಜಿಗಳು ಇವೆ. ನಾನು ಹೊಸ ಹುಡುಗರನ್ನು ಬೆಂಬಲಿಸುವೆ’ ಎಂದು ಅನಂತ ಯುವಮುಖಿಯಾದರು.

ದೇಹದಂಡನೆ
ಗಡ್ಡ ವಿಜಿ ನಿರ್ದೇಶನದ ‘ಪ್ಲಸ್’ ಚಿತ್ರದಲ್ಲಿ ವಿವಿಧ ಲುಕ್‌ ಮತ್ತು ದಂಡ (ಪುಷ್‌ಅಪ್‌) ಹೊಡೆಯುವ ಮೂಲಕ ಗಮನ ಸೆಳೆದಿದ್ದಾರೆ. ಈ ಬಗ್ಗೆ ಅವರು ಹೇಳಿದ್ದು ಹೀಗೆ: ‘ನಾನು ನಟನಾಗಿರುವುದರಿಂದ ವಾಕ್ ಹೋಗಲು ಸಾಧ್ಯವಿಲ್ಲ. ಮನೆಯಲ್ಲಿ ವ್ಯಾಯಾಮ ಮಾಡುವೆ. ವಾಕ್‌ಗಿಂತ ಇದು ಸುಲಭ. ಅರ್ಧ ಗಂಟೆ ಯೋಗ ಮಾಡುತ್ತೇನೆ. ನಿತ್ಯವೂ ಪುಷ್‌ಅಪ್ಸ್‌ ಹೊಡೆಯುವುದರಿಂದ ಸಿನಿಮಾದಲ್ಲೂ ಅದು ಸುಲಭವಾಯಿತು. ನಟರು ಫಿಟ್ ಆಗಿರಬೇಕು ಎನ್ನುವುದು ನನ್ನ ಅಭಿಪ್ರಾಯ.

ಆರೋಗ್ಯದ ದೃಷ್ಟಿಯಿಂದ ಎಲ್ಲರೂ ಫಿಟ್ ಆಗಿರಬೇಕು. ಸಾಮಾನ್ಯವಾಗಿ ಎಷ್ಟೆಲ್ಲಾ ಮೇಕಪ್–ಗೆಟಪ್ಪು ಮಾಡಿದರೂ ಇದು ಬೇಕಾಗಿದೆಯೇ? ಎನ್ನುವ ಭಾವನೆ ಬರುವುದು ಸಹಜ. ‘ಪ್ಲಸ್‌’ ಚಿತ್ರದವರು ಅವರಿಗೆ ಬೇಕಾದ ಲುಕ್‌ನಂತೆಯೇ ಆಲೋಚನೆ ಮಾಡಿಕೊಂಡು ಬಂದಿದ್ದರು. ನಾನು ಹೇಳಿದ್ದನ್ನು ಅವರು ಮಾಡುವುದಕ್ಕಿಂತ ಅವರು ಹೇಳಿದ್ದನ್ನು ಮಾಡೋಣ ಎನಿಸಿತು’.

ಸಂದೇಶ, ಮನರಂಜನೆಯ ಹೆದ್ದಾರಿ
‘ಇತ್ತೀಚೆಗೆ ತೆರೆಗೆ ಬಂದ ಆಟಗಾರ ಸಿನಿಮಾದಲ್ಲಿ ಸಣ್ಣ ಪಾತ್ರ ಮಾಡಿದ್ದೇನೆ. ಅದು ವ್ಯವಸ್ಥೆಯನ್ನು ಬದಲಾಯಿಸುವಂಥ ಪಾತ್ರ.  ಕಳೆದ 50 ವರುಷಗಳಿಂದಲೂ ಶಿಕ್ಷಣ, ರಾಜಕಾರಣ, ರೈತರು, ಮಧ್ಯಮ ವರ್ಗದ ಜನರ ಜೀವನದ ಇತ್ಯಾದಿ ಬದಲಾವಣೆ ಬಗ್ಗೆ ಮಾತನಾಡಿದರೂ ಅದು ಸಾಧ್ಯವಾಗುತ್ತಿಲ್ಲ. ಆಟಗಾರ ಚಿತ್ರದಲ್ಲಿ ಜನರ ಬಗ್ಗೆ ವ್ಯವಸ್ಥೆ ಆಸಕ್ತಿ ತೋರಿಸಲಿಲ್ಲ ಎಂದರೆ ಜನರೇ ಕಾನೂನು ಕೈಗೆತ್ತಿಕೊಳ್ಳುವ ವಾತಾವರಣ ಬಂದೀತು ಎನ್ನುವುದನ್ನು ನನ್ನ ಪಾತ್ರ ಹೇಳುತ್ತದೆ. ಇದನ್ನು ವ್ಯವಸ್ಥೆಗೆ ಒಂದು ಎಚ್ಚರ ಎನ್ನುವಂತೆಯೂ ನೋಡಬಹುದು. ‘

ಪ್ರೇಮಪಲ್ಲಕ್ಕಿ’ ಚಿತ್ರದಲ್ಲಿ ಪಟ್ಟಣಕ್ಕೆ ಹೋಗುವ ಹಳ್ಳಿಯ ಯುವಕರನ್ನು ತಡೆಯುವ ಪಾತ್ರ ನನ್ನದು. ಆದರೆ ಸ್ವಂತ ಮಗನೇ ಅಪ್ಪನ ಮಾತು ಕೇಳುವುದಿಲ್ಲ. ಕಾರ್ಪೊರೇಟ್ ಕಂಪೆನಿಗಳು 50 ಸಾವಿರ ಕೋಟಿ, ಲಕ್ಷ ಕೋಟಿಗಳ ಬಗ್ಗೆ ಮಾತನಾಡುತ್ತವೆ. ಆದರೆ ಎರಡು ಲಕ್ಷ ರೂಪಾಯಿ ಸಾಲಕ್ಕೆ ರೈತರು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದಾರೆ. ಸಿನಿಮಾಗಳಲ್ಲಿ ಸಂದೇಶ ಮತ್ತು ರಂಜನೆ ಎರಡೂ ಇರಬೇಕು’ ಎಂದು ಅಭಿಪ್ರಾಯ ವ್ಯಕ್ತಪಡಿಸುವರು.‘ಅವಸ್ಥೆ’ ಚಿತ್ರದ ನಂತರ ರಾಜಕಾರಣಿಯೊಬ್ಬರ ಬದುಕು ಕನ್ನಡದಲ್ಲಿ ಸಿನಿಮಾ ರೂಪು ಪಡೆಯಲಿಲ್ಲ. ‘ಅವಸ್ಥೆ’ಯಲ್ಲಿ ಮುಖ್ಯಪಾತ್ರವಹಿಸಿದ್ದ ಅನಂತ್ ನಾಗ್‌, ಈ ರೀತಿ ಚಿತ್ರಗಳು ಬರಲಿ ಎಂದು ಬಯಸುತ್ತಾರೆ.

ಪೋಷಕಪಾತ್ರಗಳ ಸ್ಟಾರ್‌ಗಿರಿ
ಅನಂತ್‌ನಾಗ್ ಇಂದು ಪೋಷಕ ಪಾತ್ರಗಳ ಸ್ಟಾರ್ ಎನಿಸಿಕೊಂಡವರು. ವಿಶಿಷ್ಟ ಪೋಷಕ ಪಾತ್ರಗಳಲ್ಲಿ ರಂಜನೆಯ ಜತೆಗೆ ಸಂದೇಶವನ್ನೂ ಅವರ ಪಾತ್ರಗಳು ಮಿಳಿತಗೊಳಿಸಿಕೊಂಡಿವೆ. ಇದನ್ನು ಸ್ವತಃ ಅವರೇ ಒಪ್ಪುವರು. ‘ನಾನು 25 ವರುಷಗಳ ಕಾಲ ನಾಯಕ ನಟನಾಗಿದ್ದೆ. ಈಗ ಸಿಗುವ ವೈವಿಧ್ಯ ಅಲ್ಲಿಲ್ಲ. ಪೋಷಕ ನಟನಾಗಿ ಯಾವುದೇ ಪಾತ್ರ ಮಾಡಬಲ್ಲೆ ಎನ್ನುವುದನ್ನು ಇಲ್ಲಿ ತೋರಿಸಿದೆ. ಪೋಷಕ ನಟನಾಗಿಯೇ ಭಿನ್ನ ಪಾತ್ರಗಳು ಸಿಕ್ಕುತ್ತವೆ. ಬಾಲಿವುಡ್‌ಗೆ ಕರೆಯುತ್ತಾರೆ.

ನನಗೆ ಮನೆಯಲ್ಲಿರುವುದು ಇಷ್ಟ. 70ರಿಂದ 80ರ ಅವಧಿಯಲ್ಲಿ ಅಲ್ಲಿ ಕೆಲಸ ಮಾಡಿದ್ದೇನೆ. ನಾನು ಮುಂಬೈ ನೋಡಿದಾಗ ಒಂದು ರೀತಿ ಇತ್ತು. ಈಗ ಜನ ಜಾತ್ರೆ ಎನ್ನುವಂತಿದೆ. ಆ ಕಾರಣಕ್ಕೆ ಬಾಲಿವುಡ್ ಬೇಡ ಎಂದು ಸುಮ್ಮನಾದೆ’ ಎನ್ನುವರು. ಅನಂತ್‌ನಾಗ್ ಅವರಿಗೆ ಬರವಣಿಗೆಯ ಶಕ್ತಿಯೂ ಇದೆ. ನೀವು ಏಕೆ ಬರೆವಣಿಗೆ ಬಿಟ್ಟಿರಿ ಎಂದರೆ ‘ಬರವಣಿಗೆಯಲ್ಲಿ ದುಡ್ಡಿಲ್ಲ’ ಎಂದು ಮುಗುಳ್ನಗುತ್ತಾರೆ.