ಅಮೆರಿಕದಲ್ಲೂ ಮೋದಿ ಉಪವಾಸ ವ್ರತ
ನವದೆಹಲಿ (ಪಿಟಿಐ): ಅಮೆರಿಕಕ್ಕೆ ಆರು ದಿನಗಳ ಪ್ರವಾಸ ತೆರಳುವ ಸಂದರ್ಭದಲ್ಲಿ ನವರಾತ್ರಿ ಉಪವಾಸ ವ್ರತದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ಅಧ್ಯಕ್ಷ ಬರಾಕ್‌ ಒಬಾಮ ನೀಡಲಿರುವ ಔತಣಕೂಟದಲ್ಲಿ ಕೇವಲ ಹಣ್ಣು ಮತ್ತು ನಿಂಬೆ ನೀರನ್ನು ಮಾತ್ರ ಸೇವಿಸಲಿದ್ದಾರೆ.
ನವರಾತ್ರಿ ಸಂದರ್ಭದಲ್ಲಿ ಮೋದಿ ಹಲವಾರು ವರ್ಷಗಳಿಂದ ಉಪವಾಸ ವ್ರತವನ್ನು ಪಾಲಿಸಿಕೊಂಡು ಬಂದಿದ್ದಾರೆ. ಆಕಸ್ಮಿಕವಾಗಿ ಅವರ ಅಮೆರಿಕ ಪ್ರವಾಸ ಸಂದರ್ಭದಲ್ಲಿಯೇ ನವರಾತ್ರಿಯೂ ಬಂದಿದೆ.
ಸೆಪ್ಟೆಂಬರ್ 29ರಂದು ಮೋದಿ ಗೌರವಾರ್ಥ ಒಬಾಮ ಔತಣಕೂಟ ಏರ್ಪಡಿಸಿದ್ದಾರೆ. ಔತಣಕೂಟದಲ್ಲಿ ಭಾಗವಹಿಸಿದರೂ ಹಲವು ವರ್ಷಗಳಿಂದ ಪಾಲಿಸಿಕೊಂಡು ಬಂದಿರುವ ವ್ರತ ಯಾವುದೇ ಕಾರಣಕ್ಕೂ ಭಂಗವಾಗದಂತೆ ಎಚ್ಚರವಹಿಸಿದ್ದಾರೆ.
ಪ್ರವಾಸದ ವೇಳೆ ಮೋದಿ ವಾಷಿಂಗ್ಟನ್‌ನಲ್ಲಿರುವ 190 ವರ್ಷಗಳಷ್ಟು ಪುರಾತನವಾದ ಅಮೆರಿಕ ಅಧ್ಯಕ್ಷರ ಅಧಿಕೃತ ಅತಿಥಿಗೃಹ ‘ಬ್ಲೇರ್‌ಹೌಸ್‌’ನಲ್ಲಿ ತಂಗಲಿದ್ದಾರೆ.
ಅಮೆರಿಕಕ್ಕೆ ಭೇಟಿ ನೀಡಿದಾಗಲೆಲ್ಲ ಹೋಟೆಲ್‌ಗಳಲ್ಲಿ ತಂಗುತ್ತಿದ್ದ ಹಿಂದಿನ ಪ್ರಧಾನಿ ಮನಮೋಹನ್‌ ಸಿಂಗ್‌ 9 ವರ್ಷಗಳ ಹಿಂದೆ 2005ರಲ್ಲಿ ಅಮೆರಿಕಕ್ಕೆ ಭೇಟಿ ನೀಡಿದಾಗ ಅಪರೂಪಕ್ಕೆ ಬ್ಲೇರ್‌ಹೌಸ್‌ನಲ್ಲಿ ತಂಗಿದ್ದರು.
1824ರಲ್ಲಿ ಕಟ್ಟಲಾದ ಬ್ಲೇರ್‌ಹೌಸ್‌ ಅಮೆರಿಕ ವಿದೇಶಾಂಗ ನೀತಿಯಲ್ಲಿ ಬಹುಮಹತ್ವದ ಪಾತ್ರ ವಹಿಸಿದೆ. ಅನೇಕ ವಿದೇಶಿ ಗಣ್ಯರು ಇಲ್ಲಿ ತಂಗಿದ್ದಾರೆ. ನ್ಯೂಯಾರ್ಕ್‌ನಲ್ಲಿ ಮ್ಯಾನ್‌ಹಟನ್‌ ಹೋಟೆಲ್‌ನಲ್ಲಿ ತಂಗಲಿರುವ ಮೋದಿ ಬಿಡುವಿಲ್ಲದ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲಿದ್ದಾರೆ. ಅಲ್‌ಕೈದಾ ದಾಳಿಯಲ್ಲಿ ನೆಲಸಮವಾದ ಗ್ರೌಂಡ್‌ಜಿರೋ ಸ್ಥಳಕ್ಕೆ ಭೇಟಿ ನೀಡುವರು. ನಂತರ ವಿಶ್ವಸಂಸ್ಥೆಯ ಮಹಾಅಧಿವೇಶನದಲ್ಲಿ ಪಾಲ್ಗೊಳ್ಳುವರು.
ಅಮೆರಿಕ ಭೇಟಿ: ಗಾಂಧಿ ಪ್ರತಿಮೆಗೆ ಮೋದಿ ನಮನ
ವಾಷಿಂಗ್ಟನ್‌ (ಪಿಟಿಐ): ಅಮೆರಿಕ ಭೇಟಿ ವೇಳೆ ರಾಜಧಾನಿ ವಾಷಿಂಗ್ಟನ್‌ನಲ್ಲಿರುವ ಮಹಾತ್ಮ ಗಾಂಧೀಜಿ ಅವರ ಪ್ರತಿಮೆ ಪುಷ್ಪ ನಮನ ಸಲ್ಲಿಸಲಿರುವ ಪ್ರಧಾನಿ ನರೇಂದ್ರ ಮೋದಿ ಅವರು, ಐತಿಹಾಸಿಕ ಲಿಂಕನ್‌ ಸ್ಮಾರಕ ಹಾಗೂ ಇತ್ತೀಚೆಗೆ ಸ್ಥಾಪನೆಗೊಂಡ ಮಾರ್ಟಿನ್‌ ಲೂಥರ್‌ ಕಿಂಗ್‌ (ಜೂ) ಅವರ ಸ್ಮಾರಕಗಳಿಗೆ ಭೇಟಿ ನೀಡಲಿದ್ದಾರೆ.
9/11ರ ದಾಳಿ ನಡೆದ ನ್ಯೂಯಾರ್ಕ್‌ನ ಸ್ಥಳಕ್ಕೂ ಮೋದಿ ಭೇಟಿ ನೀಡಲಿದ್ದಾರೆ ಎಂದು ಮೂಲಗಳು ತಿಳಿಸಿದ್ದು, ಈ ಕುರಿತು ಅಧಿಕೃತ ಘೋಷಣೆ ಇನ್ನೂ ಹೊರಬಂದಿಲ್ಲ.
ಮೋದಿ ಅವರು ಸೆ. 29ರಂದು ನಗರಕ್ಕೆ ಭೇಟಿ ನೀಡಲಿದ್ದಾರೆ. ಅವರ ಬಿಡುವಿಲ್ಲದ ವೇಳಾಪಟ್ಟಿಯ ನಡುವೆಯೂ ಈ ಸ್ಮಾರಕಗಳು ಹಾಗೂ ಗಾಂಧಿ ಪ್ರತಿಮೆಗೆ ಭೇಟಿ ನೀಡುವ ಕಾರ್ಯಕ್ರಮ ಯೋಜಿಸಲಾಗಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.