ನವದೆಹಲಿ (ಪಿಟಿಐ): ಗೋಪಿನಾಥ್ ಮುಂಡೆ ಮತ್ತು ಪ್ರಮೋದ್ ಮಹಾಜನ್ ಅವರ ಕುಟುಂಬಕ್ಕೆ 3ನೇ ಸಂಖ್ಯೆ ಮತ್ತು ತಾರೀಖು ಅಶುಭಕರವಾಗಿ ಪರಿಣಮಿಸಿದೆಯೇ?
ಈ ಕುಟುಂಬಗಳ ಮೂವರು ಸದಸ್ಯರು ಹಾಗೂ ಈ ಕುಟುಂಬದ ಆಪ್ತರೊಬ್ಬರು ಮೂರನೇ ತಾರೀಖಿನಂದೇ ಸಾವನ್ನಪ್ಪಿದ್ದಾರೆ.
ಮೇ 3, 2006ರಲ್ಲಿ ಪ್ರಮೋದ್ ಮಹಾಜನ್ ಅವರು ಮುಂಬೈ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದರು. ಅವರ ಸೋದರ ಪ್ರವೀಣ್ ಮಹಾಜನ್ ಅವರೇ ಅಣ್ಣನ ಮೇಲೆ ಪಾಯಿಂಟ್ 32 ಪಿಸ್ತೂಲ್ನಿಂದ ಏಪ್ರಿಲ್ 22ರಂದು ಗುಂಡು ಹಾರಿಸಿದ್ದರು. ಮೊದಲ ಗುಂಡು ಪ್ರಮೋದ್ ಅವರಿಗೆ ತಾಗಲಿಲ್ಲ. ಆದರೆ, ಉಳಿದ ಮೂರು ಗುಂಡುಗಳು ಪ್ರಮೋದ್ ಉದರ ಹೊಕ್ಕಿದ್ದವು.
ಕೌಟುಂಬಿಕ ಕಲಹದಲ್ಲಿ ಗುಂಡೇಟಿನಿಂದ ಗಂಭೀರವಾಗಿ ಗಾಯಗೊಂಡಿದ್ದ ಪ್ರಮೋದ್ 13 ದಿನಗಳ ಕಾಲ ಸಾವು– ಬದುಕಿನ ನಡುವೆ ಹೋರಾಟ ನಡೆಸಿದ್ದರು.
ಪ್ರಮೋದ್ ಸಾವನ್ನಪ್ಪಿದ ಒಂದು ತಿಂಗಳ ನಂತರ (ಜೂನ್ 3) ಪ್ರಮೋದ್ ಅವರ ಆಪ್ತ ಸಹಾಯಕ ವಿವೇಕ್ ಮೊಯಿತ್ರಾ ಅವರ ಶವವು ದೆಹಲಿಯಲ್ಲಿನ ಅವರ ನಿವಾಸದಲ್ಲಿ ಪತ್ತೆಯಾಗಿತ್ತು. ಪ್ರಮೋದ್ ಹತ್ಯೆ ಪ್ರಕರಣದಲ್ಲಿ ಶಿಕ್ಷೆಗೆ ಗುರಿಯಾಗಿದ್ದ ಪ್ರವೀಣ್ ಮಹಾಜನ್ ಅವರು ಮಿದುಳಿನ ತೀವ್ರ ರಕ್ತಸ್ರಾವದ ಕಾರಣ ಠಾಣೆಯ ಆಸ್ಪತ್ರೆಯಲ್ಲಿ 2010ರ ಮಾರ್ಚ್ 3 ರಂದು ಸಾವನ್ನಪ್ಪಿದರು.