ಅಗರ್ತಲ/ ಗುವಾಹಟಿ (ಪಿಟಿಐ): ಒಂಬತ್ತು ಹಂತಗಳ ಲೋಕಸಭಾ ಚುನಾವಣೆಯ ಮೊದಲ ಹಂತವಾಗಿ ಸೋಮವಾರ ತ್ರಿಪುರಾದ ಒಂದು ಕ್ಷೇತ್ರ ಹಾಗೂ ಅಸ್ಸಾಂನ ಐದು ಕ್ಷೇತ್ರಗಳಲ್ಲಿ ಬಿರುಸಿನ ಶಾಂತಿಯುತ ಮತದಾನ ನಡೆಯಿತು.
ಪ್ರಾಥಮಿಕ ವರದಿಗಳ ಪ್ರಕಾರ, ತ್ರಿಪುರಾದಲ್ಲಿ ಶೇ 80ಕ್ಕಿಂತ ಹೆಚ್ಚು ಮತ್ತು ಅಸ್ಸಾಂನಲ್ಲಿ ಶೇ 72ರಷ್ಟು ಮತದಾನವಾಗಿದೆ. ಈ ಪ್ರಮಾಣ ಇನ್ನಷ್ಟು ಹೆಚ್ಚಬಹುದು ಎಂದು ಮೂಲಗಳು ಅಭಿಪ್ರಾಯಪಟ್ಟಿವೆ. ಅಸ್ಸಾಂನಲ್ಲಿನ ಒಟ್ಟು 64.4 ಲಕ್ಷ ಮತದಾರರಿಗಾಗಿ 8,588 ಮತಗಟ್ಟೆಗಳನ್ನು ಸ್ಥಾಪಿಸಲಾಗಿತ್ತು. ತೇಜ್‌ಪುರದಲ್ಲಿ ಶೇ 73, ಜೋರ್ಹಟ್‌ನಲ್ಲಿ ಶೇ 75, ಲಖಿಂಪುರದಲ್ಲಿ ಶೇ 67, ದಿಬ್ರುಗಡದಲ್ಲಿ ಶೇ 70 ಕೊಲಿಯಾಬೋರ್‌ನಲ್ಲಿ ಶೇ 72ರಷ್ಟು ಜನ ಮತ ಚಲಾಯಿಸಿದರು.
ಅಸ್ಸಾಂನಲ್ಲಿ ಒಟ್ಟು 92 ಎಲೆಕ್ಟ್ರಾನಿಕ್‌ ಮತಯಂತ್ರಗಳು ಕೈಕೊಟ್ಟವು. ಅಧಿಕಾರಿಗಳು ತಕ್ಷಣವೇ ಬೇರೆ ಮತಯಂತ್ರಗಳಿಗೆ ವ್ಯವಸ್ಥೆ ಮಾಡಿದರು. ಮುಖ್ಯಮಂತ್ರಿ ತರುಣ್‌ ಗೊಗೊಯ್‌ ಅವರ ಕ್ಷೇತ್ರವಾದ ಜೋರ್ಹಟ್‌ನಲ್ಲಿ ಅತಿ ಹೆಚ್ಚು ಸಂಖ್ಯೆಯಲ್ಲಿ ಮತಯಂತ್ರಗಳು ಕೈಕೊಟ್ಟವು.
2009ರ ಲೋಕಸಭಾ ಚುನಾವಣೆಯಲ್ಲಿ 14 ಕ್ಷೇತ್ರಗಳ ಪೈಕಿ ಕಾಂಗ್ರೆಸ್‌ 7 ಸ್ಥಾನಗಳಲ್ಲಿ, ಕಾಂಗ್ರೆಸ್‌ನ ಮಿತ್ರ ಪಕ್ಷ ಬಿಪಿಎಎಫ್‌್‌ 1 ಸ್ಥಾನದಲ್ಲಿ ವಿಜಯಿಯಾಗಿದ್ದರೆ, ಬಿಜೆಪಿ 4 ಹಾಗೂ ಎಐಯುಡಿಎಫ್‌ 1 ಸ್ಥಾನದಲ್ಲಿ ಗೆದ್ದಿದ್ದವು.
