ಹೈದರಾಬಾದ್‌ (ಪಿಟಿಐ): ‘ಇ’ ಸಚಿವ ಸಂಪುಟ ಸಭೆಯಲ್ಲಿದ್ದವರ ಕೈಯಲ್ಲಿ ಪೆನ್ನು ಪೇಪರ್‌ ಇರಲಿಲ್ಲ. ಬದಲಾಗಿ ಐ–ಪಾಡ್‌ಗಳಿದ್ದವು. ಸಭೆಯ ವಿವರಗಳೆಲ್ಲ ಐ–ಪಾಡ್‌ನಲ್ಲೇ ದಾಖಲಾಗುತ್ತಿದ್ದವು.
‘ಇ’ ಸಂಪುಟ ಸಭೆ ನಡೆದಿದ್ದು ಸೋಮವಾರ ಆಂಧ್ರಪ್ರದೇಶದಲ್ಲಿ. ಇ– ಆಡಳಿತದ ಮುಂದುವರಿದ ಭಾಗವಾಗಿ ಆಂಧ್ರಪ್ರದೇಶದಲ್ಲಿ ಕಾಗದ ರಹಿತ ಸಚಿವ ಸಂಪುಟ ಸಭೆ ನಡೆಯಿತು.
ಮುಖ್ಯಮಂತ್ರಿ ಚಂದ್ರಬಾಬು ನಾಯ್ಡು ಸೇರಿದಂತೆ ಇತರೆ ಸಚಿವರು ಐ–ಪಾಡ್‌ನಲ್ಲಿ ಸಭೆಯ ವಿವರಗಳನ್ನು ದಾಖಲಿಸಿಕೊಂಡು, ಕಾಗದರಹಿತ ಸಭೆ ನಡೆಸಿದರು.
ಸಭೆಯು ಸಂಪೂರ್ಣ ‘ಇ’ ಮಯವಾಗಿತ್ತು. ಸಂಪುಟದ ಸಚಿವರು ತಮ್ಮ ಯೋಜನೆಗಳನ್ನು ಹೇಳಿಕೊಳ್ಳಲು ಪವರ್‌ಪಾಯಿಂಟ್‌ ಪ್ರೆಸೆಂಟೇಷನ್‌ ಬಳಸಿಕೊಂಡರು ಎಂದು ಮುಖ್ಯಮಂತ್ರಿ ಕಾರ್ಯಾಲಯದ ಮೂಲಗಳು ತಿಳಿಸಿವೆ.
