ನವದೆಹಲಿ (ಐಎಎನ್ಎಸ್): ವಿಶಿಷ್ಟ ಗುರುತಿನ ಚೀಟಿ ‘ಆಧಾರ್’ ವ್ಯವಸ್ಥೆಯನ್ನು ಮತ್ತಷ್ಟು ಸರಳ ಹಾಗೂ ಬಳಕೆದಾರರ ಸ್ನೇಹಿಯನ್ನಾಗಿ ರೂಪಿಸಲು ಮುಂದಾಗಿರುವ ಕೇಂದ್ರ ಸರ್ಕಾರ ‘ಆಧಾರ್’ ಯೋಜನೆ ಜತೆ ಮೊಬೈಲ್ ‘ಸಿಮ್’ ತಳಕು ಹಾಕುವ (ಲಿಂಕ್ ನೀಡುವ) ಹೊಸ ಆಲೋಚನೆ ಮಾಡಿದೆ.
‘ಮೊಬೈಲ್ ಸಿಮ್ ಹಾಗೂ ಆಧಾರ್ ಕಾರ್ಡ್ ಜತೆ ಸಂಪರ್ಕ ಕಲ್ಪಿಸುವಂತೆ ಪ್ರಧಾನಿ ನರೇಂದ್ರ ಮೋದಿ ನಿರ್ದೇಶನ ನೀಡಿದ್ದು, ಅಧಿಕಾರಿಗಳು ಈ ಯೋಜನೆ ಕಾರ್ಯಗತಗೊಳಿಸುವಲ್ಲಿ ಮಗ್ನರಾಗಿದ್ದಾರೆ’ ಎಂದು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಇಲಾಖೆಯ ಕಾರ್ಯದರ್ಶಿ ಆರ್.ಎಸ್. ಶರ್ಮಾ ತಿಳಿಸಿದರು.
ಮೊಬೈಲ್ ಗ್ರಾಹಕರ ಮಾಹಿತಿಗಳನ್ನು ಆಧಾರ್ಗೆ ಬಳಸಿಕೊಳ್ಳುವ ಈ ಯೋಜನೆ ಯಶಸ್ವಿಯಾದರೆ ಕ್ರಾಂತಿಯಾಗಲಿದೆ ಎಂದು ಅವರು ತಿಳಿಸಿದರು. ಡಿಜಿಟಲ್ ಇಂಡಿಯಾ ಕಾರ್ಯಕ್ರಮದ ಅಡಿ ಕೈಗೆತ್ತಿಕೊಳ್ಳಲಾಗಿರುವ ಯೋಜನೆ ಕಾರ್ಯಗತಗೊಳಿಸುವ ಕುರಿತು ದೂರಸಂಪರ್ಕ ಇಲಾಖೆಯ ಕಾರ್ಯದರ್ಶಿ, ವಿವಿಧ ಇಲಾಖೆಗಳ ಮುಖ್ಯಸ್ಥರ ಜತೆ ಈಗಾಗಲೇ ಚರ್ಚೆ ನಡೆಸಿದ್ದಾರೆ ಎಂದು ಶರ್ಮಾ ತಿಳಿಸಿದರು.