ಅಹಮದಾಬಾದ್ (ಪಿಟಿಐ): ಗುಜರಾತ್ ಮುಖ್ಯಮಂತ್ರಿಯಾಗಿ ನರೇಂದ್ರ ಮೋದಿ ಅವರ ಆಪ್ತರಲ್ಲಿ ಒಬ್ಬರಾದ ಕಂದಾಯ ಸಚಿವೆ ಆನಂದಿ ಬೆನ್ ಒಮ್ಮತದಿಂದ ಆಯ್ಕೆಯಾಗಿದ್ದಾರೆ. ಇದರೊಂದಿಗೆ, ರಾಜ್ಯದ ಮೊತ್ತಮೊದಲ ಮಹಿಳಾ ಮುಖ್ಯಮಂತ್ರಿ ಎಂಬ ಹೆಗ್ಗಳಿಕೆಯೂ ಅವರದ್ದಾಗಿದೆ.
ಪ್ರಧಾನಿಯಾಗಲು ದೆಹಲಿಯತ್ತ ಮುಖಮಾಡಿರುವ ಮೋದಿ ಅವರ ಸ್ಥಾನಕ್ಕೆ ಯಾರು ನಿಯೋಜಿತರಾಗುತ್ತಾರೆ ಎಂಬುದರ ಕುರಿತ ಹಲವು ದಿನಗಳ ಕುತೂಹಲಕ್ಕೂ ತೆರೆಬಿದ್ದಿದೆ.
ಕೇಂದ್ರ ವೀಕ್ಷಕರಾದ ತಾವರ್ಚಂದ್ ಗೆಹ್ಲೋಟ್ ಮತ್ತು ಗುಜರಾತ್ನಲ್ಲಿ ಪಕ್ಷದ ಉಸ್ತುವಾರಿ ಹೊತ್ತಿರುವ ಓಂ ಮಾಥುರ್ ಅವರ ನೇತೃತ್ವದಲ್ಲಿ ಗಾಂಧಿನಗರದಲ್ಲಿ ಬುಧವಾರ ನಡೆದ ಶಾಸಕಾಂಗ ಪಕ್ಷದ ಸಭೆಯಲ್ಲಿ 72 ವರ್ಷದ ಆನಂದಿ ಬೆನ್ ಹೆಸರು ಒಕ್ಕೊರಲಿನಿಂದ ಅನುಮೋದನೆಗೊಂಡಿತು.
ಮುಖ್ಯಮಂತ್ರಿ ಸ್ಥಾನಕ್ಕೆ ಆನಂದಿ ಬೆನ್ ಜತೆ ಕೈಗಾರಿಕಾ ಸಚಿವ ಸೌರಭ್ ಪಟೇಲ್ ಮತ್ತು ನಿತಿನ್ ಪಟೇಲ್ ಹೆಸರುಗಳು ಮುಂಚೂಣಿಯಲ್ಲಿದ್ದವು.
ಇಂದು ಪ್ರಮಾಣ ವಚನ: ರಾಜ್ಯದ 15ನೇ ಮುಖ್ಯಮಂತ್ರಿಯಾಗಲಿರುವ ಆನಂದಿ ಬೆನ್ ಅವರು, ಗುರುವಾರ (ಮೇ 22) ನಡೆಯಲಿರುವ ಅದ್ದೂರಿ ಸಮಾರಂಭದಲ್ಲಿ ಪ್ರಮಾಣ ವಚನ ಸ್ವೀಕರಿಸುವರು.