ಸಿಗರೇಟುಗಳನ್ನು ಬಿಡಿಯಾಗಿ ಮಾರಾಟ ಮಾಡುವುದಕ್ಕೆ ನಿಷೇಧ ಹಾಗೂ ತಂಬಾಕು ಉತ್ಪನ್ನಗಳ ಖರೀದಿಗೆ ವಯಸ್ಸಿನ ಕನಿಷ್ಠ ಮಿತಿ ಏರಿಸುವ ತಜ್ಞರ ವರದಿಯನ್ನು ಕೇಂದ್ರ ಸರ್ಕಾರದ ಆರೋಗ್ಯ ಸಚಿವಾಲಯ ಅಂಗೀಕರಿಸಿದೆ. ರಾಜ್ಯಸಭೆಯಲ್ಲಿ ಈ ವಿಷಯ ತಿಳಿಸಿರುವ ಕೇಂದ್ರ ಆರೋಗ್ಯ ಸಚಿವ ಜೆ.ಪಿ.ನಡ್ಡಾ, ಸಂಸತ್ತಿನ ಒಪ್ಪಿಗೆ ಪಡೆದ ನಂತರ ಇದು ಕಾನೂನಾಗಿ ಜಾರಿಯಾಗಲಿದೆ ಎಂದಿದ್ದಾರೆ. ತಂಬಾಕು ಬಳಕೆಯ ನಿಯಂತ್ರಣಕ್ಕೆ ಸಂಬಂಧಪಟ್ಟಂತೆ, ವಿಶ್ವ ಆರೋಗ್ಯ ಸಂಸ್ಥೆಯ ಒಪ್ಪಂದಕ್ಕೆ ಭಾರತ ಸಹಿ ಹಾಕಿದೆ. ಆರೋಗ್ಯ ಸಚಿವಾಲಯವು ತಜ್ಞರ ವರದಿಯನ್ನು ಅಂಗೀಕರಿಸಿರುವುದು ಇದಕ್ಕೆ ಅನುಗುಣವಾಗಿಯೇ ಇದೆ.
ದೇಶದಲ್ಲಿ ಮಾರಾಟವಾಗುವ ಸಿಗರೇಟುಗ ಪೈಕಿ ಶೇಕಡ 70ರಷ್ಟು ಬಿಡಿ ಬಿಡಿಯಾಗಿಯೇ ಮಾರಾಟವಾಗುತ್ತವೆ ಎಂಬುದು ಒಂದು ಅಂದಾಜು. ಹೀಗಾಗಿ ಆರೋಗ್ಯ ಸಚಿವಾಲಯದ ಈ ಶಿಫಾರಸು ಮುಖ್ಯವಾದದ್ದು. ಇದರಿಂದ ಸಿಗರೇಟು ಮಾರಾಟ ಪ್ರಮಾಣದಲ್ಲಿ ಶೇಕಡ 10ರಿಂದ 20ರಷ್ಟು ಇಳಿಕೆ ಸಾಧ್ಯವಾಗಬಹುದು. ಸಿಗರೇಟು ಹಾಗೂ ತಂಬಾಕು ಉತ್ಪನ್ನಗಳ ಮಾರಾಟದಿಂದ ಸರ್ಕಾರದ ಬೊಕ್ಕಸಕ್ಕೆ ತೆರಿಗೆ ರೂಪದಲ್ಲಿ ಸದ್ಯಕ್ಕೆ ₨ 25 ಸಾವಿರ ಕೋಟಿ ಬರುತ್ತಿದೆ. ಪ್ರಸಕ್ತ ಶಿಫಾರಸು ಜಾರಿಯಾದಲ್ಲಿ ಬೊಕ್ಕಸಕ್ಕೆ ಬರುತ್ತಿರುವ ಈ ಭಾರಿ ಮೊತ್ತದ ತೆರಿಗೆ ಹಣಕ್ಕೆ ಕುತ್ತು ಬರಲಿದೆ.
ತಂಬಾಕಿನಿಂದ ಬರುವ ಆದಾಯ ಹಾಗೂ ಸಾರ್ವಜನಿಕ ಆರೋಗ್ಯದ ನಡುವೆ ಆಯ್ಕೆ ಮಾಡಿಕೊಳ್ಳಬೇಕಾದ ಪರಿಸ್ಥಿತಿ ಸರ್ಕಾರದ ಎದುರಿಗಿದೆ. ಅನಾರೋಗ್ಯದಿಂದ ಬಳಲುವ ವಯಸ್ಕ ನಾಗರಿಕರು ಸಮಾಜಕ್ಕೆ ಹೊರೆಯಾಗಿರುತ್ತಾರೆ. ನಿಜ ಹೇಳಬೇಕೆಂದರೆ, ತಂಬಾಕಿನಿಂದ ಬರುವ ಕಾಯಿಲೆಗಳಿಂದ ಭಾರತಕ್ಕೆ ಆದ ನಷ್ಟ ₨ 1.04 ಲಕ್ಷ ಕೋಟಿ. ಪಬ್ಲಿಕ್‌ ಹೆಲ್ತ್‌ ಫೌಂಡೇಷನ್‌ ಆಫ್‌ ಇಂಡಿಯಾ ನೀಡಿರುವ ಈ ಅಂಕಿಸಂಖ್ಯೆ ಕೇವಲ 2011ಕ್ಕೆ ಮಾತ್ರ ಸೀಮಿತವಾದದ್ದು ಎಂಬುದನ್ನು ನೋಡಿದಾಗ, ಭಾರತದಲ್ಲಿ ಸಿಗರೇಟ್‌ ಚಟ ಆರೋಗ್ಯ ಕ್ಷೇತ್ರಕ್ಕೆ ಎಷ್ಟು ದೊಡ್ಡ ಹೊರೆಯಾಗಿದೆ ಎನ್ನುವುದರ ಅಂದಾಜಾಗುತ್ತದೆ.
ಕೆಲವು ವರ್ಷಗಳ ಹಿಂದೆ ಕೇಂದ್ರ ಸರ್ಕಾರ ಸಾರ್ವಜನಿಕ ಸ್ಥಳಗಳಲ್ಲಿ ಧೂಮಪಾನ ಮಾಡುವುದನ್ನು ನಿಷೇಧಿಸುವ ಕಾನೂನು ಜಾರಿಗೆ ತಂದಿತ್ತು. ಆದರೆ ಈ ಕಾನೂನನ್ನು ಅನುಷ್ಠಾನಗೊಳಿಸುವಲ್ಲಿ ಇಚ್ಛಾಶಕ್ತಿ ಕೊರತೆ ಎದ್ದು ಕಾಣುತ್ತದೆ. ಹೀಗಾಗಿ, ಸಾರ್ವಜನಿಕ ಆರೋಗ್ಯವನ್ನು ಉತ್ತಮಪಡಿಸುವ, ಆ ಮೂಲಕ ದೇಶದ ನಿವ್ವಳ ಉತ್ಪನ್ನವನ್ನು ಹೆಚ್ಚಿಸಬಲ್ಲ ಕಾನೂನುಗಳ ಅನುಷ್ಠಾನದಲ್ಲಿ ಬದ್ಧತೆ ಅಗತ್ಯ. ಇದರಿಂದ, ದೇಶದ ಮೇಲಿನ ಅನಗತ್ಯ ಆರ್ಥಿಕ ಹೊರೆ ತಪ್ಪುವುದಲ್ಲದೆ, ಆರೋಗ್ಯವಂತ ಮಾನವ ಸಂಪನ್ಮೂಲದ ವೃದ್ಧಿಗೂ ಸಹಾಯಕವಾಗುತ್ತದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.