ನವದೆಹಲಿ(ಪಿಟಿಐ): ನ್ಯಾಯಮೂರ್ತಿ ರಾಜೇಂದ್ರ ಮಲ್ ಲೋಧಾ ಅವರನ್ನು ಭಾರತದ ಮುಂದಿನ ಮುಖ್ಯ ನ್ಯಾಯಮೂರ್ತಿಯಾಗಿ (ಸಿಜೆಐ) ನೇಮಿಸಲಾಗಿದ್ದು, ಅವರು ಏ.27ರಂದು ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.
64 ವರ್ಷದ ಆರ್.ಎಂ.ಲೋಧಾ ಅವರು ಮುಖ್ಯ ನ್ಯಾಯಮೂರ್ತಿ ಪಿ.ಸದಾಶಿವಂ ನಂತರದ ಅತ್ಯಂತ ಹಿರಿಯ ನ್ಯಾಯಮೂರ್ತಿಯಾಗಿದ್ದಾರೆ. ಐದು ತಿಂಗಳ ಕಾಲ ಮಹತ್ವದ ಹುದ್ದೆ ನಿರ್ವಹಿಸಲಿರುವ ಅವರು ಸೆ.27ರಂದು ನಿವೃತ್ತರಾಗುವರು. ಮುಖ್ಯ ನ್ಯಾಯಮೂರ್ತಿ ಸದಾಶಿವಂ ಅವರು ಲೋಧಾ ಹೆಸರನ್ನು ಮುಂದಿನ ಮುಖ್ಯ ನ್ಯಾಯಮೂರ್ತಿ ಹುದ್ದೆಗೆ ಸೂಚಿಸಿದ್ದರು.
ಜೋಧಪುರದಲ್ಲಿ ಜನಿಸಿದ ಲೋಧಾ ಅವರು 1973ರಲ್ಲಿ ರಾಜಸ್ತಾನದಲ್ಲಿ ವಕೀಲ ವೃತ್ತಿ ಆರಂಭಿಸಿದರು.ರಾಜಸ್ತಾನ ಹೈಕೋರ್ಟ್ನಲ್ಲಿ –ಸಾಂವಿಧಾನಿಕ, ಸಿವಿಲ್, ಕಂಪೆನಿ, ಕ್ರಿಮಿನಲ್, ತೆರಿಗೆ, ಕಾರ್ಮಿಕ– ಹೀಗೆ ವಿವಿಧ ಬಗೆಯ ವ್ಯಾಜ್ಯಗಳನ್ನು ನಿರ್ವಹಿಸಿದ ಅನುಭವ ಅವರದ್ದಾಗಿದೆ.
1994ರ ಜನವರಿಯಲ್ಲಿ ರಾಜಸ್ತಾನ ಹೈಕೋರ್ಟ್ನ ಕಾಯಂ ನ್ಯಾಯಮೂರ್ತಿಯಾಗಿ ನೇಮಕವಾದ ಅವರು ಅದೇ ಫೆಬ್ರುವರಿಯಲ್ಲಿ ಬಾಂಬೆ ಹೈಕೋರ್ಟ್ಗೆ ವರ್ಗಾವಣೆಗೊಂಡರು ನಂತರ, 2008ರ ಮೇ 13ರಲ್ಲಿ ಪಟ್ನಾ ಹೈಕೋರ್ಟ್ ಮುಖ್ಯ ನ್ಯಾಯಮೂರ್ತಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ ಅವರು ಅದೇ ವರ್ಷದ ಡಿ.17ಕ್ಕೆ ಸುಪ್ರೀಂಕೋರ್ಟ್ ನ್ಯಾಯಮೂರ್ತಿಯಾಗಿ ಬಡ್ತಿ ಪಡೆದರು.