ಶೇ 7.25 ರಷ್ಟಿದ್ದ ರೆಪೊ ದರ ಮತ್ತು ಶೇ 4ರಷ್ಟಿದ್ದ ನಗದು ಮೀಸಲು ಅನುಪಾತದಲ್ಲಿ (ಸಿಆರ್‌ಆರ್‌) ದರದಲ್ಲಿ ಯಾವುದೇ ವ್ಯತ್ಯಾಸ ಮಾಡಿಲ್ಲ. ಹೀಗಾಗಿ ಸಾಲದ ಸಮಾನ ಮಾಸಿಕ ಕಂತಿನಲ್ಲಿ (ಇಎಂಐ) ಯಾವುದೇ ಬದಲಾವಣೆಯಾಗಿಲ್ಲ.
ಉದ್ಯಮ ವಲಯ ಆರ್‌ಬಿಐ ನಡೆಗೆ ಅಸಮಾಧಾನ ವ್ಯಕ್ತಪಡಿಸಿದೆ. ಆದರೆ, ಆರ್ಥಿಕ ಚೇತರಿಕೆ, ಹಣದುಬ್ಬರ ಮತ್ತು ಮುಂಗಾರು ನೋಡಿಕೊಂಡು ಮುಂದಿನ ಹಣಕಾಸು ನೀತಿ ಪರಾಮರ್ಶೆಯಲ್ಲಿ ಬಡ್ಡಿ ದರ ಕಡಿತ ಮಾಡುವ ಸುಳಿವನ್ನು ಆರ್‌ಬಿಐ ಗವರ್ನರ್‌ ರಘುರಾಂ ರಾಜನ್‌ ನೀಡಿದ್ದಾರೆ.
ಬ್ಯಾಂಕುಗಳ ಹಿಂದೇಟು: ಕಳೆದ ಜನವರಿಯಿಂದ ಇಲ್ಲಿಯವರೆಗೆ ಆರ್‌ಬಿಐ ಒಟ್ಟಾರೆ ಶೇ 0.75ರಷ್ಟು ಬಡ್ಡಿ ದರ ಇಳಿಕೆ ಮಾಡಿದೆ. ಆದರೆ, ಬ್ಯಾಂಕುಗಳು ಇದರಲ್ಲಿ ಶೇ 0.3ರಷ್ಟನ್ನು ಮಾತ್ರ ಗ್ರಾಹಕರಿಗೆ ವರ್ಗಾಯಿಸಿವೆ. ಈ ಅಂಶವನ್ನು ಕೂಡ ಉದ್ಯಮ ವಲಯ ಮತ್ತು ಸರ್ಕಾರ ಗಮನಿಸಬೇಕು ಎಂದು ಗವರ್ನರ್‌ ಹೇಳಿದ್ದಾರೆ.
2015–16ನೇ ಸಾಲಿನಲ್ಲಿ ಶೇ 7.6ರಷ್ಟು ಜಿಡಿಪಿ ಪ್ರಗತಿಯನ್ನು ಆರ್‌ಬಿಐ ಅಂದಾಜು ಮಾಡಿದೆ. ಮುಂದಿನ ದ್ವೈಮಾಸಿಕ ಹಣಕಾಸು ನೀತಿ ಪರಾಮರ್ಶೆ ಸೆಪ್ಟೆಂಬರ್‌ 29ರಂದು ಪ್ರಕಟಗೊಳ್ಳಲಿದೆ.
