ಇಂದು ಯದುವೀರ–ತ್ರಿಷಿಕಾ ಮದುವೆ

ಮೈಸೂರು: ರಾಜವಂಶಸ್ಥ ಯದುವೀರ ಕೃಷ್ಣದತ್ತ ಚಾಮರಾಜ ಒಡೆಯರ್‌ ಹಾಗೂ ರಾಜಸ್ತಾನದ ಡುಂಗರಪುರದ ರಾಜಮನೆತನದ ತ್ರಿಷಿಕಾ ಕುಮಾರಿ ಮದುವೆ ಮುಹೂರ್ತಕ್ಕೆ ಕ್ಷಣಗಣನೆ ಶುರುವಾಗಿದೆ. ಸೋಮವಾರ ಬೆಳಿಗ್ಗೆ 9.05 ರಿಂದ 9.35ರೊಳಗೆ ಸಲ್ಲುವ ಕರ್ಕಾಟಕ ಲಗ್ನದ ಸಾವಿತ್ರ ಮುಹೂರ್ತದಲ್ಲಿ ಈ ಯುವ ಜೋಡಿ ದಾಂಪತ್ಯ ಜೀವನಕ್ಕೆ ಕಾಲಿಡಲಿದೆ.

ಅರಮನೆಯ ಕಲ್ಯಾಣ ಮಂಟಪದಲ್ಲಿ ವಿಶೇಷವಾಗಿ ಸಿದ್ಧಪಡಿಸಿರುವ ವೇದಿಕೆಯಲ್ಲಿ ಮಾಂಗಲ್ಯ ಧಾರಣೆ ನಡೆಯಲಿದೆ. ಇಲ್ಲಿ ಸ್ಥಳಾವಕಾಶದ ಕೊರತೆಯಿಂದಾಗಿ ಬಂಧುಗಳಿಗೆ, ಆಪ್ತರಿಗೆ ಮಾತ್ರ ಅವಕಾಶ ನೀಡಲಾಗುತ್ತಿದೆ. ಕೇವಲ 500 ಮಂದಿಗೆ ಆಸನ ವ್ಯವಸ್ಥೆ ಕಲ್ಪಿಸಲಾಗಿದೆ. ಅರಮನೆ ಆವರಣದಲ್ಲಿ ಎಲ್‌ಇಡಿ ಪರದೆ ಅಳವಡಿಸಿ ಅತಿಥಿಗಳು ಹಾಗೂ ಗಣ್ಯರಿಗೆ ಈ ಕಾರ್ಯಕ್ರಮ ಕಣ್ತುಂಬಿಕೊಳ್ಳಲು ಅವಕಾಶ ಮಾಡಿಕೊಡಲಾಗುತ್ತಿದೆ. 

ಯದುವೀರ ಅವರ ಸಾಕುತಾಯಿ ಪ್ರಮೋದಾದೇವಿ ಒಡೆಯರ್‌ ಮಾರ್ಗದರ್ಶನದಲ್ಲಿ, ರಾಜಪುರೋಹಿತರು ಹಾಗೂ ಕುಲಪುರೋಹಿತರು ಮುಹೂರ್ತ ಕಾರ್ಯಕ್ರಮ ನಡೆಸಿಕೊಡಲಿದ್ದಾರೆ. ಯದುವೀರ ಅವರು ‘ಅಂಗರಕ’ ವಿನ್ಯಾಸದ ಪೋಷಾಕು ಧರಿಸಿ ಕಂಗೊಳಿಸಲಿದ್ದಾರೆ. ಬೆಳಿಗ್ಗೆ 6.30ಕ್ಕೆ ದಿಬ್ಬಣ ಹೊರಡುವುದು. ಯದುವೀರ 7 ಗಂಟೆಗೆ ಹಸೆಮಣೆಯಲ್ಲಿ ಆಸೀನರಾಗುವರು

ವಧು–ವರರನ್ನು ಎದುರುಬದುರು ನಿಲ್ಲಿಸಿ ‘ಕನ್ಯಾ ನಿರೀಕ್ಷಣೆ’ ಶಾಸ್ತ್ರ ನೆರವೇರಿಸಲಾಗುವುದು. ನಂತರ ಕನ್ಯಾದಾನ, ಕಂಕಣ ಧಾರಣೆ ಹಾಗೂ ಮಾಂಗಲ್ಯ ಧಾರಣೆ ನಡೆಯಲಿದೆ. ಮಧ್ಯಾಹ್ನ 12.30ಕ್ಕೆ ಭೋಜನ ಶುರುವಾಗಲಿದೆ. ರಾತ್ರಿ 7.30ರಿಂದ 8.30ರ ವರೆಗೆ ದರ್ಬಾರ್‌ ಸಭಾಂಗಣದ ಸಜ್ಜೆಯಲ್ಲಿ ‘ಉಯ್ಯಾಲೆ ಮೇಲೆ ಉರುಟನೆ’ (ಉಯ್ಯಾಲೆಯಲ್ಲಿ ನವದಂಪತಿ ಕೂರಿಸಿ ತೂಗುವುದು) ಜರುಗಲಿದೆ. 

ಮುಂದುವರಿದ ಶಾಸ್ತ್ರಗಳು: ವಿವಾಹ ಮಹೋತ್ಸವದ ಮೂರನೇ ದಿನವಾದ ಭಾನುವಾರ ಕೂಡ ಅರಮನೆಯಲ್ಲಿ ವಿವಿಧ ಪೂಜಾ ಕೈಂಕರ್ಯಗಳು, ಧಾರ್ಮಿಕ ಚಟುವಟಿಕೆಗಳು ಸಾಂಗವಾಗಿ ನೆರವೇರಿದವು. ಬೆಳಿಗ್ಗೆ 10 ಗಂಟೆಗೆ ಕನ್ನಡಿ ತೊಟ್ಟಿಯಲ್ಲಿ ಗಣಪತಿ ಪೂಜೆ ನಡೆಯಿತು. ಬಳಿಕ ವ್ರತ ಸಮಾವರ್ತನೆ ಹೋಮ ನೆರವೇರಿತು.

ಇದಾದ ನಂತರ ವಧುವಿನ ಕುಟುಂಬದವರು ವರನಿಗೆ ಕಾಶಿಯಾತ್ರೆ ಪರಿಕರಗಳನ್ನು (ಕಾಶಿಯಾತ್ರೆ ಖಿಲ್ಲತ್‌) ಒಪ್ಪಿಸಿದರು. ಈ ಸಂದರ್ಭದಲ್ಲಿ ಫಲಪೂಜೆ ಮಾಡಿ ಆರತಿ ಬೆಳಗಿದರು. ಸಂಜೆ 6.15ಕ್ಕೆ ಮಂಗಳ ವಾದ್ಯಘೋಷ ಸಮೇತ ಮದನವಿಲಾಸ ಬಾಗಿಲ ಮಾರ್ಗದಿಂದ ಅರಮನೆಯ ಸುತ್ತ ಕಾಶಿಯಾತ್ರೆ ಮೆರವಣಿಗೆ ನಡೆಯಿತು.

ವರನ ಪಾದಪೂಜೆ: ಅರಮನೆಯ ಟ್ರೋಫಿ ಕೊಠಡಿಯಲ್ಲಿ ಸಂಜೆ, ತ್ರಿಷಿಕಾ ಪೋಷಕರಾದ ಹರ್ಷವರ್ಧನ್‌ ಸಿಂಗ್‌ ಮತ್ತು ಮಹೇಶ್ರೀಕುಮಾರಿ ಅವರು ಯದುವೀರ ಅವರ ಪಾದಪೂಜೆ ಮಾಡಿದರು. ಈಡು ಶಾಸ್ತ್ರದಂತೆ ತ್ರಿಷಿಕಾ ಅವರನ್ನು ಅರಮನೆಗೆ ಬರಮಾಡಿಕೊಳ್ಳಲಾಯಿತು. ಈ ಸಂದರ್ಭದಲ್ಲಿ ರಾಜವಂಶಸ್ಥರು ವಧುವಿಗೆ ಆಭರಣ, ಸೀರೆ ಹಾಗೂ ಬಳೆ ಒಪ್ಪಿಸಿದರು.

ಅರಮನೆ ಪ್ರವೇಶಿಸಿರುವ ತ್ರಿಷಿಕಾ ಹಾಗೂ ಅವರ ಕುಟುಂಬದವರು ವಿವಿಧ ಶಾಸ್ತ್ರಗಳಲ್ಲಿ ಪಾಲ್ಗೊಂಡರು. ಕುಟುಂಬದವರಿಗೆ ಅರಮನೆಯಲ್ಲೇ ಪ್ರತ್ಯೇಕ ವ್ಯವಸ್ಥೆ ಮಾಡಿಕೊಡಲಾಗಿದೆ. ಜೂನ್‌ 28ರಂದು ರಾತ್ರಿ 7.30ರಿಂದ 8.30ರ ವರೆಗೆ ದರ್ಬಾರ್‌ ಸಭಾಂಗಣದಲ್ಲಿ ಆರತಕ್ಷತೆ, ಸಂಗೀತ ಕಾರ್ಯಕ್ರಮ ಹಾಗೂ 29ಕ್ಕೆ ನವದಂಪತಿ ಮೆರವಣಿಗೆ ನಡೆಯಲಿದೆ.

ಇಂದು ಉರುಟನೆ ಉಯ್ಯಾಲೆ: ವೈವಾಹಿಕ ಜೀವನಕ್ಕೆ ಕಾಲಿಡಲಿರುವ ಯದುವೀರ ಹಾಗೂ ತ್ರಿಷಿಕಾ ಅವರು ದರ್ಬಾರ್‌ ಸಭಾಂಗಣದಲ್ಲಿ ವಿಶೇಷವಾಗಿ ಅಲಂಕರಿಸಿರುವ ಉಯ್ಯಾಲೆಯಲ್ಲಿ ಕುಳಿತು ಹೂವಿನ ಚೆಂಡಿನ ಆಟವಾಡಲಿದ್ದಾರೆ.

ಮಂಟಪ ಸಜ್ಜು
ಹಲವು ಕಾರ್ಯಕ್ರಮಗಳಿಗೆ ಸಾಕ್ಷಿಯಾಗಿರುವ ಅರಮನೆಯ ಕಲ್ಯಾಣ ಮಂಟಪದಲ್ಲಿಯೇ ಯದುವೀರ ಹಾಗೂ ತ್ರಿಷಿಕಾ ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ. ಅದಕ್ಕಾಗಿ ಮಂಟಪವನ್ನು ವಿಶೇಷವಾಗಿ ಸಿದ್ಧಪಡಿಸಲಾಗಿದೆ.

ಯದುವಂಶಕ್ಕೆ ಯದುವೀರ್‌ ಅವರನ್ನು ದತ್ತು ಪಡೆದಿದ್ದು ಹಾಗೂ ಪಟ್ಟಾಭಿಷೇಕ ನಡೆದಿದ್ದು ಇಲ್ಲಿಯೇ. ಅಷ್ಟೇ ಅಲ್ಲ; ರಾಜವಂಶಸ್ಥರ 15ಕ್ಕೂ ಹೆಚ್ಚು ಮದುವೆಗಳು ಹಾಗೂ ಇನ್ನಿತರ ಕಾರ್ಯಕ್ರಮಗಳು ಇಲ್ಲಿ ನಡೆದಿವೆ.

1976ರಲ್ಲಿ ಶ್ರೀಕಂಠದತ್ತ ನರಸಿಹರಾಜ ಒಡೆಯರ್‌ ಹಾಗೂ ಪ್ರಮೋದಾದೇವಿ ಅವರ ವಿವಾಹ ಇಲ್ಲಿಯೇ ಜರುಗಿತ್ತು. ಯದುವೀರ ಅವರ ಮೂಲ ಪೋಷಕರಾದ ತ್ರಿಪುರಸುಂದರಿದೇವಿ ಹಾಗೂ ಸ್ವರೂಪ್ ಆನಂದ ಗೋಪಾಲರಾಜೇಅರಸ್ ವಿವಾಹವೂ 1992ರಲ್ಲಿ ಇದೇ ಕಲ್ಯಾಣ ಮಂಟಪದಲ್ಲಿ ನಡೆದಿತ್ತು.

ಯದುವೀರ, ತ್ರಿಷಿಕಾ ಪರಿಚಯ
ಯದುವೀರ ಅವರು ಶ್ರೀಕಂಠದತ್ತ ನರಸಿಂಹರಾಜ ಒಡೆಯರ್ ಅವರ ಹಿರಿಯ ಸಹೋದರಿ ಗಾಯತ್ರಿದೇವಿ ಮೊಮ್ಮಗ.  ತ್ರಿಪುರಸುಂದರಿದೇವಿ ಹಾಗೂ ಸ್ವರೂಪ್ ಆನಂದ ಗೋಪಾಲರಾಜೇಅರಸ್ ಅವರೇ ಯದುವೀರ ತಾಯಿ, ತಂದೆ. 24 ವರ್ಷ ವಯಸ್ಸಿನ ಅವರು ಬಾಲ್ಯದ ದಿನಗಳನ್ನು ಕಳೆದಿದ್ದು ಬೆಂಗಳೂರಿನಲ್ಲಿ.