ಇದು ಹೃದಯದ ವಿಷಯ

ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ  ಪ್ರತಿಯೊಬ್ಬರೂ ಪ್ರತಿ ದಿನ ಕನಿಷ್ಠ 30 ನಿಮಿಷ ದಷ್ಟಾದರೂ ವ್ಯಾಯಾಮ ಮಾಡಲೇಬೆಕೆಂದಿದೆ. ಆದರೆ ವಿಶ್ವದಲ್ಲಿ ಶೇ. 60 ಮಂದಿ ಇದನ್ನು ಅನುಸರಿಸುತ್ತಿಲ್ಲ ಎಂಬುದು ವಿಷಾದದ ಸಂಗತಿ.

ವಿಶ್ವದಲ್ಲಿ ಅತಿ ಹೆಚ್ಚು ಜನರು ಹೃದ್ರೋಗದಿಂದ ಬಲಿಯಾಗುತ್ತಿದ್ದಾರೆ. ಕಳೆದ ಎರಡು ದಶಕಗಳಲ್ಲಿ 30-50 ವರ್ಷ ವಯಸ್ಸಿನವರಲ್ಲಿ ಹೃದಯಾಘಾತ ಹೆಚ್ಚುತ್ತಿದೆ. ಇದಕ್ಕೆ ಕಾರಣ ಔದ್ಯೊಗೀಕರಣ, ಐಷಾರಾಮಿ ಜೀವನಶೈಲಿ, ಬೊಜ್ಜು, ಮಧುಮೇಹ, ಅಧಿಕ ರಕ್ತದೊತ್ತಡ, ಮಾನಸಿಕ ಒತ್ತಡ, ಧೂಮಪಾನ, ಮದ್ಯಪಾನದಂತಹ ದುರಭ್ಯಾಸಗಳು.
                                                           
ದಾಖಲೆಗಳ ಪ್ರಕಾರ ಚಿಕ್ಕ ವಯಸ್ಸಿನಲ್ಲಿ ಬೊಜ್ಜು ಇರುವಂತಹವರಿಗೆ 65 ವಯಸ್ಸಿನೊಳಗೆ ಮಧುಮೇಹ ಮತ್ತು ಹೃದಯಾಘಾತವಾಗುವ ಸಾಧ್ಯತೆಗಳು ಅತಿ ಹೆಚ್ಚು. ಇವೆಲ್ಲವುಗಳನ್ನು ಗಮನದಲ್ಲಿಟ್ಟು ಕೊಂಡು ಚಿಕ್ಕ ವಯಸ್ಸಿನಲ್ಲಿಯೇ ನಿತ್ಯ ವ್ಯಾಯಾಮ, ಹಾಗೂ ಆರೋಗ್ಯಕರ ಹವ್ಯಾಸ ಗಳಿಗೆ ಆದ್ಯತೆ ನೀಡುವುದರಿಂದ  ಹೆಚ್ಚುವರಿ ಕೊಬ್ಬು ಶೇಖರಿಸುವುದನ್ನು ಸಾಧ್ಯವಾದಷ್ಟರ ಮಟ್ಟಿಗೆ ತಡೆಗಟ್ಟಬಹುದು. ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ  ಪ್ರತಿಯೊಬ್ಬರೂ ಪ್ರತಿ ದಿನ ಕನಿಷ್ಠ 30 ನಿಮಿಷ ದಷ್ಟಾದರೂ ವ್ಯಾಯಾಮ ಮಾಡಲೇಬೆಕೆಂದಿದೆ. ಆದರೆ ವಿಶ್ವದಲ್ಲಿ ಶೇ. 60 ಮಂದಿ ಇದನ್ನು ಅನುಸರಿಸುತ್ತಿಲ್ಲ ಎಂಬುದು ವಿಷಾದದ ಸಂಗತಿ.

ಬಹಳಷ್ಟು ಮಂದಿ ಹೃದಯಾಘಾತ ಕೇವಲ ಪುರುಷರಿಗೆ ಮಾತ್ರ ಆಗುವಂಥದ್ದು ಎಂದುಕೊಂಡಿದ್ದಾರೆ. ಆದರೆ ವಾಸ್ತವದಲ್ಲಿ ಇಡೀ ಜಗತ್ತಿನ ಹೃದ್ರೋಗಿಗಳ ಸಂಖ್ಯೆಯಲ್ಲಿ ಶೇ.15ರಷ್ಟು ಭಾರತೀಯ ಮಹಿಳೆಯರಿದ್ದಾರೆ. ಇದಕ್ಕೆ ಕಾರಣ ಇತ್ತೀಚಿನ ದಿನಗಳಲ್ಲಿ ದುಡಿಯುವ ಮಹಿಳೆಯರು ಹೆಚ್ಚಿನ ಉದ್ವಿಗ್ನತೆ, ಅಧಿಕ ರಕ್ತದೊತ್ತಡ, ಮಧುಮೇಹ, ಹಾಗು ಮಾನಸಿಕ ಒತ್ತಡಕ್ಕೆ ಒಳಗಾಗುತ್ತಿರುವುದು. ಸದ್ದಿಲ್ಲದೇ ಹೃದ್ರೋಗವು ಮಹಿಳೆಯರನ್ನು ಬಲಿ ತಗೆದುಕೊಳ್ಳುತ್ತಿದೆ. ಇವರಲ್ಲಿ ಪುರುಷರಂತೆ ತೀವ್ರ ನೋವು ಇರುವುದಿಲ್ಲ. ಆದರೆ ಅತಿಯಾದ ಬಳಲಿಕೆ ಇರುತ್ತದೆ. ಆದ್ದರಿಂದ ಈ ಕೆಳಗಿನ ಲಕ್ಷಣಗಳು ಅರಿವಿಗೆ ಬಂದ ತಕ್ಷಣ ಚಿಕಿತ್ಸೆ ಪಡೆಯುವುದು ಉತ್ತಮ.

ಯಾವುದೇ ರೀತಿಯ ಎದೆ ನೋವು ಅಂದರೆ ಎದೆಯಲ್ಲಿ ಉರಿದ ಹಾಗೆ, ಎದೆಯ ಮೇಲೆ ಭಾರವಿಟ್ಟಂತೆ ಅನಿಸುತ್ತದೆ. ಇದು ಸಾಮಾನ್ಯವಾಗಿ ಮಾಂಸ ಖಂಡಗಳಿಗೆ ಸಂಬಂಧಿಸಿದ ಅಥವಾ ಜೀರ್ಣಕ್ರಿಯೆಗೆ (ಆಸಿಡಿಟಿ) ಗೆ ಸಂಬಂಧಿಸಿದ ನೋವಿನಂತಿರುತ್ತದೆ. ಹೃದಯದ ನೋವು ಒಂದು ಬಾರಿ ಬಂದರೆ  ಬಿಡದಂತೆ ಬಾಧಿಸುತ್ತದೆ ಆದರೆ ಜೀರ್ಣಾಂಗದ ನೋವು ಬರುತ್ತ- ಹೋಗುತ್ತ ಇರುತ್ತದೆ. ಇನ್ನಿತರ ಲಕ್ಷಣಗಳೆಂದರೆ- ಉಸಿರಾಟ  ಕಷ್ಟಕರವಾಗುತ್ತದೆ, ಬೆನ್ನು, ಕತ್ತು, ಭುಜ, ಹಲ್ಲುಗಳಲ್ಲೂ ನೋವು ಕಾಣಿಸಬಹುದು, ಅತಿಯಾದ ಬೆವರು ವಾಂತಿಯೂ ಆಗಬಹುದು.

ಹೃದಯದ ಮಾಂಸಖಂಡಗಳಿಗೆ ರಕ್ತ ಸಂಚಾರ ಇದ್ದಕ್ಕಿದ್ದಂತೆ ನಿಂತುಹೋದರೆ ಹೃದಯಾಘಾತವಾಗುತ್ತದೆ. ಇದಕ್ಕೆ ಕಾರಣ ಗಳನ್ನು ನೋಡುವುದಾದರೆ- ರಕ್ತನಾಳಗಳಲ್ಲಿ ಕೊಬ್ಬಿನಾಂಶ ಶೇಖರಣೆಗೊಂಡಿರಬಹುದು ಅಥವಾ ರಕ್ತ ಗಡ್ಡೆ ಕಟ್ಟಿಕೊಂಡಿರಲೂಬಹುದು, ಹೃದಯದ ಮಾಂಸಪೇಶಿಗಳ ಕಾಯಿಲೆ, ದೀರ್ಘಕಾಲಿಕ ಅನಿಯಂತ್ರಿತ ರಕ್ತದೊತ್ತಡ, ಹೃದಯ ಕವಾಟ ಕಿರಿದಾಗುವಿಕೆ ಮುಂತಾದವು. ಇನ್ನು ಚಿಕಿತ್ಸೆಯನ್ನು ನೋಡುವುದಾದರೆ- ಅಧಿಕ ರಕ್ತದೊತ್ತಡ-ಮಧುಮೇಹಗಳ ನಿಯಂತ್ರಣ, ರಕ್ತನಾಳಗಳು ಕಿರಿದಾಗಿದ್ದರೆ ಆಂಜಿಯೋಪ್ಲಾಸ್ಟಿ, ಅಡೆತಡೆಗಳಿದ್ದರೆ ಶಸ್ತ್ರಚಿಕಿತ್ಸೆ ಅತ್ಯಗತ್ಯ.

ಸಮಸ್ಯೆ ಕಡಿಮೆ ಆಗಬೇಕೆಂದರೆ
* ರಕ್ತದೊತ್ತಡ - 120/80  ರ ಆಸುಪಾಸಿರಲಿ.
* ಕೆಟ್ಟ ಕೊಲೆಸ್ಟ್ರಾಲ್ (ಎಲ್.ಡಿ.ಎಲ್) -100 ಮಿ.ಗ್ರಾಂ./ಡಿ.ಎಲ್ ಗಿಂತ ಕಡಿಮೆ ಇರಬೇಕು.
* ಉತ್ತಮ ಕೊಲೆಸ್ಟ್ರಾಲ್ (ಎಚ್.ಡಿ.ಎಲ್) -ಪುರುಷರಲ್ಲಿ 45 ಮಿ.ಗ್ರಾಂ./ಡಿ.ಎಲ್ ಗಿಂತ ಹೆಚ್ಚಿರಬೇಕು ಹಾಗು ಮಹಿಳೆಯರಲ್ಲಿ 55 ಮಿ.ಗ್ರಾಂ./ಡಿ.ಎಲ್ ಗಿಂತ ಹೆಚ್ಚಿರಬೇಕು.

ಹೃದಯದ ಆರೋಗ್ಯಕ್ಕೆ ಸಲಹೆಗಳು
ಹೃದ್ರೋಗಕ್ಕೆ ಪ್ರಮುಖ ಕಾರಣವಾದ ಬೊಜ್ಜು, ಅಧಿಕ ರಕ್ತದೊತ್ತಡ ಹಾಗು ಮಧುಮೇಹ ಗಳನ್ನು ಸೂಕ್ತ ಸಮತೋಲಿತ ಆಹಾರ, ವ್ಯಾಯಾಮಗಳಿಂದ ಹಾಗು ಮಾನಸಿಕ ಒತ್ತಡಗಳನ್ನು ಯೋಗ-ಪ್ರಾಣಾಯಾಮಗಳಿಂದ ನಿಯಂತ್ರಿಸಿ ಹತೋಟಿಗೆ ತರಲು ಸಾಧ್ಯ.