ಇಸ್ಲಾಮಾಬಾದ್(ಐಎಎನ್ ಎಸ್): ಪಾಕಿಸ್ತಾನದ ಪೇಶಾವರದ ಸೈನಿಕ ಶಾಲೆ ಮೇಲೆ ಆತ್ಮಹತ್ಯಾ ದಾಳಿ ನಡೆಸಿ 132 ಮಕ್ಕಳನ್ನು ಹತ್ಯೆಗೈದಿದ್ದ ತೆಹ್ರಿಕ್-ಎ-ತಾಲಿಬಾನ್ ಪಾಕಿಸ್ತಾನ(ಟಿಟಿಪಿ) ಸಂಘಟನೆ ಇಂಥದ್ದೇ ಮಾದರಿಯ ಇನ್ನಷ್ಟು ದಾಳಿಗಳನ್ನು ನಡೆಸುವುದಾಗಿ ಬೆದರಿಕೆಯೊಡ್ಡಿದೆ.
ಇದಕ್ಕೆ ಸಂಬಂಧಿಸಿದಂತೆ ಟಿಟಿಪಿ ತನ್ನ ವೆಬ್ ಸೈಟ್ ನಲ್ಲಿ ವಿಡಿಯೊ ತುಣುಕೊಂದನ್ನು ಪ್ರಸಾರ ಮಾಡಿದೆ. ಪೇಶಾವರ್ ನ ದಾಳಿಯ ಸೂತ್ರದಾರ ಹಾಗೂ ಟಿಟಿಪಿನ ಸ್ಥಳೀಯ ಕಮಾಂಡರ್ ಉಮರ್ ಮನ್ಸೂರ್ ವಿಡಿಯೊ ದೃಶ್ಯದಲ್ಲಿ, ‘ನಾವು ಸೈನಿಕರು ನಡೆಸುತ್ತಿರುವ ಭಯೋತ್ಪಾದನಾ ನಿಗ್ರಹ ಕ್ರಮಕ್ಕೆ ಬಗ್ಗುವುದಿಲ್ಲ. ಇಂಥಹದ್ದೇ ಮಾದರಿಯ ಇನ್ನಷ್ಟು ದಾಳಿಗಳನ್ನು ನಡೆಸುತ್ತೇವೆ’ ಎಂದು ಬೆದರಿಕೆಯೊಡ್ಡಿದ ಸಂದೇಶವನ್ನು ವಿಡಿಯೊದಲ್ಲಿ ಹೇಳಿದ್ದಾನೆ.
