ಉಗ್ರರಿಂದ ಪಾರಂಪರಿಕ ನಗರ ಧ್ವಂಸ
ಬಾಗ್ದಾದ್‌ (ಎಎಫ್‌ಪಿ): ಇಸ್ಲಾಮಿಕ್‌ ಸ್ಟೇಟ್‌ (ಐ.ಎಸ್‌) ಉಗ್ರರು ಇರಾಕ್‌ನ ಪ್ರಾಚೀನ ಅಸ್ಸಿರಿಯನ್‌ ನಿಮೃದ್‌ ನಗರಮತ್ತು ಅಲ್ಲಿನ ಪುರಾತತ್ವ ಕಟ್ಟಡಗಳನ್ನು ನೆಲಸಮಗೊಳಿಸಿರುವುದಾಗಿ ಸರ್ಕಾರ ಶುಕ್ರವಾರ ದೃಢಪಡಿಸಿದೆ.
ಇರಾಕ್‌ನ ಐತಿಹಾಸಿಕ ಪಾರಂಪರಿಕ ನಗರದ ಮೇಲೆ ಜಿಹಾದಿಗಳು ನಡೆಸಿದ ಇತ್ತೀಚಿನ ಭೀಕರ ದಾಳಿ ಇದಾಗಿದೆ. ಉಗ್ರರು ಕಳೆದ ವಾರವಷ್ಟೇ ಪಾರಂಪರಿಕ ನಗರ ಮತ್ತು ಕಟ್ಟಡಗಳನ್ನು ನಾಶಪಡಿಸುವ ಪ್ರಕಟಣೆ ಹೊರಡಿಸಿದ್ದರು. ಐ.ಎಸ್‌ ಉಗ್ರರ ಪ್ರಮುಖ ತಾಣವಾದ ಇರಾಕ್‌ನ ಎರಡನೇ ಬೃಹತ್‌ ನಗರ ಮೋಸುಲ್‌ನ ಆಗ್ನೇಯ ದಿಕ್ಕಿನಿಂದ 30 ಕಿ.ಮೀ. ದೂರದ ಟಿಗ್ರಿಸ್‌ ನದಿ ದಂಡೆಯಲ್ಲಿ ನಿಮೃದ್‌ ನಗರವಿದೆ.
ಗುರುವಾರ ಮಧ್ಯಾಹ್ನದ ಪ್ರಾರ್ಥನೆ ನಂತರ ಉಗ್ರರು ಆರಂಭಿಸಿದ ನೆಲಸಮ ದಾಳಿ, ಶುಕ್ರವಾರವೂ ನಡೆದಿರುವುದಾಗಿ ಪುರಾತತ್ವ ಅಧಿಕಾರಿಗಳು ಹೇಳಿದ್ದಾರೆ.
ನಿಮೃದ್‌ ನಗರ 13ನೇ ಶತಮಾನ ಬಿ.ಸಿ.ಯ ಅಸ್ಸಿರಿಯನ್‌ ಯುಗದ ರತ್ನಾಭರಣಗಳು ಪತ್ತೆಯಾದುದಕ್ಕೆ ಪ್ರಸಿದ್ಧಿ. 1988ರಲ್ಲಿ ಆಭರಣ ಮತ್ತು ಬೆಲೆಬಾಳುವ ಕಲ್ಲುಗಳು ಇಲ್ಲಿ ಪತ್ತೆಯಾಗಿ, ಇದು 20ನೇ ಶತಮಾನದ ಮಹಾನ್‌ ಸಂಶೋದನೆ ಎನಿಸಿತ್ತು. ಇವುಗಳನ್ನು ಕೆಲಕಾಲ ಇರಾಕ್‌ನ ರಾಷ್ಟ್ರೀಯ ವಸ್ತು ಸಂಗ್ರಹಾಲಯದಲ್ಲಿ ಪ್ರದರ್ಶನಕ್ಕಿಡಲಾಗಿತ್ತು.
ಆದರೆ 2003ರಲ್ಲಿ ನಡೆದ ಅಮೆರಿಕ ಆಕ್ರಮಣದಿಂದ ಲೂಟಿಯಾಗಿದ್ದು, ಬಳಿಕ ಸೆಂಟ್ರಲ್‌ ಬ್ಯಾಂಕ್‌ ಕಟ್ಟಡದಲ್ಲಿಡಲಾಯಿತು. ನಿಮೃದ್‌ ನಗರದ ಮೌಲ್ಯಯುತ ಕಲಾಕೃತಿಗಳನ್ನು ಮೋಸುಲ್‌, ಬಾಗ್ದಾದ್‌, ಪ್ಯಾರಿಸ್‌, ಲಂಡನ್‌ ಮತ್ತಿತರ ಕಡೆಗಳ ವಸ್ತು ಸಂಗ್ರಹಾಲಯಗಳಿಗೆ ರವಾನಿಸಲಾಯಿತು.
ನ್ಯೂಯಾರ್ಕ್‌ನ ಸ್ಟೋನಿ ಬ್ರೂಕ್‌ ವಿಶ್ವವಿದ್ಯಾಲಯದಲ್ಲಿರುವ ಇರಾಕ್‌ನ ಪುರಾತತ್ವಜ್ಞ ಅಬ್ದುಲಮೀರ್‌ ಹಮ್ದಾನಿ ಅವರ ಪ್ರಕಾರ, ಪ್ರಾಚೀನ ಪಾರಂಪರಿಕ ನಗರಗಳನ್ನು ನಾಶಪಡಿಸುವ ಗುರಿ ಹೊಂದಿದ ಐ.ಎಸ್‌ ಉಗ್ರರು, ಮುಂದೆ 2,000 ವರ್ಷಗಳಷ್ಟು ಹಳೆಯ ನೈನ್ವೆಹ್‌ ಪ್ರಾಂತ್ಯದಲ್ಲಿರುವ ಸುಂದರ ವಿಶ್ವ ಪಾರಂಪರಿಕ ನಗರ ಹತ್ರವನ್ನು ಹಾನಿಗೊಳಿಸುವ ಆತಂಕವಿದೆ ಎಂದು ಹೇಳಿದ್ದಾರೆ.
ವಿಶ್ವಸಂಸ್ಥೆಯ ಸಾಂಸ್ಕೃತಿಕ ಅಂಗವಾದ ಎಸ್ಕೋದ ನಿರ್ದೇಶಕ ಅಲೆಕ್ಸ್‌ ಪ್ರಾಥೆ, ಇರಾಕ್‌ನ ಪಾರಂಪರಿಕ ಶ್ರೀಮಂತಿಕೆ ನಾಶಪಡಿಸುವ ಉಗ್ರರ ಯತ್ನ ಎಂದಿದ್ದಾರೆ.
ಕ್ರಮಕ್ಕೆ ಯುನೆಸ್ಕೊ ಒತ್ತಾಯ
ಈ ಮಧ್ಯೆ, ಯುನೆಸ್ಕೊ ಮಹಾಪ್ರಧಾನ ನಿರ್ದೇಶಕ ಐರಿನಾ ಬೊಕೊವಾ ಅವರು ತುರ್ತಾಗಿ ವಿಶ್ವಸಂಸ್ಥೆ ಭದ್ರತಾ ಮಂಡಳಿ ಸಭೆ ಕರೆದು, ಮೋಸುಲ್‌ ವಸ್ತು ಸಂಗ್ರಹಾಲಯ ನಾಶದ ಕುರಿತು ಅಂತರರಾಷ್ಟ್ರೀಯ ಅಪರಾಧ ನ್ಯಾಯಾಲಯದಲ್ಲಿ ವಿಚಾರಣೆ ನಡೆಸಲು ಕ್ರಮ ಕೈಗೊಳ್ಳಬೇಕು ಒತ್ತಾಯಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.