ಶ್ರೀಹರಿಕೋಟಾ (ಆಂಧ್ರಪ್ರದೇಶ) (ಐಎಎನ್ಎಸ್): ‘ಭಾರತೀಯ ಪ್ರಾದೇಶಿಕ ನ್ಯಾವಿಗೇಷನಲ್ (ಸಮುದ್ರ ಮತ್ತು ವಾಯು ಸಂಚಾರ ಮಾರ್ಗಕ್ಕೆ ನೆರವು ನೀಡುವ) ಉಪಗ್ರಹ ವ್ಯವಸ್ಥೆ’ (ಐಆರ್ಎನ್ಎಸ್ಎಸ್) ಸರಣಿಯ ಎರಡನೇ ಉಪಗ್ರಹ ‘ಐಆರ್ಎನ್ಎಸ್ಎಸ್– 1ಬಿ’ ಇಲ್ಲಿನ ಸತೀಶ್ ಧವನ್ ಉಡ್ಡಯನ ಕೇಂದ್ರದಿಂದ ನಿಗದಿಯಂತೆ ಶುಕ್ರವಾರ ಸಂಜೆ 5.14 ನಿಮಿಷಕ್ಕೆ ಉಡಾವಣೆಗೊಂಡಿದೆ.
ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೊ) ಅಭಿವೃದ್ಧಿ ಪಡಿಸಿರುವ ಈ ಉಪಗ್ರಹವನ್ನು ಹೊತ್ತ 44.4 ಮೀಟರ್ ಉದ್ದದ, ಸುಮಾರು 320 ಟನ್ ತೂಕದ ‘ಪಿಎಸ್ಎಲ್ವಿ– 24’ (ಉಪಗ್ರಹ ಉಡಾವಣಾ ವಾಹನ) ರಾಕೆಟ್ ನಭಕ್ಕೆ ಚಿಮ್ಮಿತು. ಈ ಸಮಯದಲ್ಲಿ ಹಾಜರಿದ್ದ ‘ಇಸ್ರೊ’ ವಿಜ್ಞಾನಿಗಳು, ಇನ್ನಿತರ ಆಹ್ವಾನಿತರು ಈ ರಾಕೆಟ್ ಭೂಮಿಯ ಗುರುತ್ವಾಕರ್ಷಣ ಶಕ್ತಿಯ ಪರಿಧಿ ದಾಟಿಕೊಂಡು ಮುನ್ನುಗ್ಗಿದ್ದನ್ನು ನಿಯಂತ್ರಣ ಕೇಂದ್ರದಲ್ಲಿ ಗಮನಿಸಿದರು.
ಈ ರಾಕೆಟ್ 1,432 ಕಿ.ಲೊ. ತೂಕದ ‘ಐಆರ್ಎನ್ಎಸ್ಎಸ್– 1ಬಿ’ ಉಪಗ್ರಹವನ್ನು ಉಡಾವಣೆಯಾದ 20 ನಿಮಿಷದ ನಂತರ ಅದರ ಕಕ್ಷೆಗೆ ತಲುಪಿಸಲಿದೆ. ಬಹು ನಿರೀಕ್ಷೆಯ ಈ ಯೋಜನೆಯು ಯಶಸ್ವಿಯಾಗಲಿದೆ ಎಂದು ‘ಇಸ್ರೊ’ ಅಧಿಕಾರಿಗಳು ಹೇಳಿದ್ದಾರೆ.
ಇದಕ್ಕೂ ಮೊದಲು ‘ಐಆರ್ಎನ್ಎಸ್ಎಸ್’ ಯೋಜನೆ ಬಗ್ಗೆ ಸುದ್ದಿಸಂಸ್ಥೆಗೆ ಮಾಹಿತಿ ನೀಡಿದ ‘ಇಸ್ರೊ’ ಅಧ್ಯಕ್ಷ ಕೆ. ರಾಧಾಕೃಷ್ಣನ್, ‘ಇದು ಏಳು ಉಪಗ್ರಹಗಳ ಯೋಜನೆಯಾಗಿದೆ. ಈ ವರ್ಷದ ಅಂತ್ಯದ ಹೊತ್ತಿಗೆ ಈ ಸರಣಿಯ ಇನ್ನೂ ಎರಡು ಉಪಗ್ರಹಗಳನ್ನು ಉಡಾವಣೆ ಮಾಡಲಾಗುವುದು. 2013ರ ಜುಲೈನಲ್ಲಿ ಸರಣಿಯ ಮೊದಲ ಉಪಗ್ರಹ ‘ಐಆರ್ಎನ್ಎಸ್ಎಸ್–1ಎ’ ಉಡಾವಣೆ ಮಾಡಲಾಗಿತ್ತು’ ಎಂದರು.
ನಕ್ಷತ್ರಗಳತ್ತ ‘ಇಸ್ರೊ’ ಕಣ್ಣು
ಶ್ರೀಹರಿಕೋಟಾ (ಪಿಟಿಐ): ನಕ್ಷತ್ರಗಳು ಮತ್ತು ಇನ್ನಿತರ ಆಕಾಶ ಕಾಯಗಳತ್ತ ದೃಷ್ಟಿ ನೆಟ್ಟಿರುವ ‘ಇಸ್ರೊ’, ಈ ನಿಟ್ಟಿನಲ್ಲಿ ‘ಹಬಲ್‘ ದೂರದರ್ಶಕ ಹೋಲುವ ಕಡಿಮೆ ಸಾಮರ್ಥ್ಯದ ಗಗನನೌಕೆ ಹೊಂದಲು ಚಿಂತಿಸಿದೆ.
‘ವಿಶಿಷ್ಟವಾಗಿ ರೂಪುಗೊಳ್ಳುತ್ತಿರುವ ಈ ಗಗನನೌಕೆಯು 2015ರ ಹೊತ್ತಿಗೆ ಸಿದ್ಧಗೊಳ್ಳಲಿದೆ. ಅತಿನೇರಳೆ ಕಿರಣ, ಕಣ್ಣಿಗೆ ಕಾಣುವ ಕಿರಣಗಳು ಮತ್ತು ಎಕ್ಸ್–ರೇ ಈ ಮೂರನ್ನೂ ದೃಷ್ಟಿಸುವಂತಹ ಮಸೂರವನ್ನು ಇದು ಹೊಂದಿರುತ್ತದೆ. ಬೃಹತ್ ದೂರದರ್ಶಕವಾದ ‘ಹಬಲ್’ನಲ್ಲೂ ಇಂತಹ ಮಸೂರ ಇಲ್ಲ’ ಎಂದು ಅಹಮದಾಬಾದ್ನ ‘ಇಸ್ರೊ’ ಬಾಹ್ಯಾಕಾಶ ಆನ್ವಯಿಕ ಕೇಂದ್ರದ ನಿರ್ದೇಶಕ ಕಿರಣ್ ಕುಮಾರ್ ತಿಳಿಸಿದರು.
‘ಬೃಹತ್ ದೂರದರ್ಶಕ ‘ಹಬಲ್’ 2.4 ಮೀಟರ್ ವ್ಯಾಸದ ಮಸೂರ ಹೊಂದಿದ್ದರೆ, ಉದ್ದೇಶಿತ ಗಗನನೌಕೆಯಲ್ಲಿ 300 ಮಿ.ಮೀ. ವ್ಯಾಸದ ಮಸೂರ ಅಳವಡಿಸಲಾಗುತ್ತದೆ’ ಎಂದರು. ಈ ಸಂದರ್ಭದಲ್ಲಿ ‘ಇಸ್ರೊ’ ಅಧ್ಯಕ್ಷ ಕೆ. ರಾಧಾಕೃಷ್ಣನ್ ಮತ್ತು ಇನ್ನಿತರ ಹಿರಿಯ ವಿಜ್ಞಾನಿಗಳು ಕಿರಣ್ ಕುಮಾರ್ ಅವರ ಜೊತೆಗೆ ಇದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.