ತುಮಕೂರು: ನಗರಪಾಲಿಕೆಯ ವಾಹನಗಳು ಉಪ್ಪಾರಹಳ್ಳಿಗೆ ಕಸ ತಂದು ಸುರಿಯುತ್ತಿರುವುದರಿಂದ ವಾರ್ಡ್ ಸಂಖ್ಯೆ ೨೪ರಲ್ಲಿ ಗಬ್ಬು ನಾತ ಆವರಿಸಿದೆ. ಸೇಕ್ರೆಡ್ ಹಾರ್ಟ್ ಕಾಲೇಜು ಹಿಂಭಾಗ ಹೊಸದಾಗಿ ನಿರ್ಮಿಸಿರುವ ಬಡವಾಣೆಯ ‘ಸಿ.ಎ’ ನಿವೇಶನ ನಗರ ಪಾಲಿಕೆ ಪಾಲಿಗೆ ತ್ಯಾಜ್ಯ ವಿಲೇವಾರಿ ಸ್ಥಳವಾಗಿದೆ.
ಇಲ್ಲಿ ಪ್ರತಿದಿನ ಹತ್ತಾರು ಆಟೊ ಟಿಪ್ಪರ್ಗಳು ಕಸ ತಂದು ಸುರಿಯುತ್ತವೆ. ಯಾದವನಗರ, ಮರಳೂರು ದಿಣ್ಣೆ, ಅಮರಜ್ಯೋತಿ ನಗರ, ಸರಸ್ವತಿಪುರಂ, ಸಪ್ತಗಿರಿ ಬಡಾವಣೆ, ಗೆದ್ದಲಹಳ್ಳಿ ಮುಖ್ಯರಸ್ತೆ, 80 ಅಡಿ ರಸ್ತೆ ಬದಿಯಲ್ಲಿ ಕಸದ ರಾಶಿ ಕಣ್ಣಿಗೆ ರಾಚುತ್ತದೆ. ಕಳೆದ 6 ತಿಂಗಳ ಹಿಂದೆ 2 ಕಾಂಕ್ರಿಟ್ ಕಸದ ತೊಟ್ಟಿಗಳನ್ನು ಪಾಲಿಕೆ ಸಿಬ್ಬಂದಿ ತಂದಿಟ್ಟಿದ್ದರು. ಈ ತೊಟ್ಟಿಗಳಿಗೆ ಆಟೊ ಟಿಪ್ಪರ್ಗಳು ಕಸ ತಂದು ಸುರಿಯುತ್ತಿದ್ದವು. ವಾರಕ್ಕೊಮ್ಮೆ ಲಾರಿ ಮೂಲಕ ಕಸ ಸಾಗಿಸಲಾಗುತಿತ್ತು. ಆದರೆ ಕಳೆದ ೨ ತಿಂಗಳಿಂದ ಆಟೊ ಟಿಪ್ಪರ್ಗಳು ಕಸವನ್ನು ರಸ್ತೆ ಬದಿ, ಚರಂಡಿಯಲ್ಲಿ ಸುರಿಯುತ್ತಿವೆ. ಹಂದಿ, ನಾಯಿಗಳು ಬೀಡು ಬಿಟ್ಟಿವೆ. ವಾಹನ ಸವಾರರು, ಶಾಲಾ ಮಕ್ಕಳು ಮೂಗು ಮುಚ್ಚಿಕೊಂಡು, ಹಂದಿ, ನಾಯಿಗಳಿಗೆ ಹೆದರಿ ಸಂಚರಿಸುವ ಸ್ಥಿತಿ ನಿರ್ಮಾಣವಾಗಿದೆ ಎಂದು ಸ್ಥಳೀಯರು ಅಳಲು ತೋಡಿಕೊಳ್ಳುತ್ತಾರೆ.
ಕೆಟ್ಟ ವಾಸನೆಯಿಂದಾಗಿ ಯಾದವನಗರ, ಮರಳೂರು ದಿಣ್ಣೆ, ಸರ್ಕಾರಿ ರೇಷ್ಮೆ ಬಿತ್ತನೆ ಕೋಠಿ ಹಾಗೂ ಉಪ್ಪಾರಹಳ್ಳಿ ಬಡಾವಣೆಯ ಮಕ್ಕಳು ಶಾಲಾ– ಕಾಲೇಜಿಗೆ ಹೋಗಲು ಬಳಸು ಹಾದಿ ಹಿಡಿದಿದ್ದಾರೆ. ಈ ಪ್ರದೇಶದಲ್ಲಿ ನೊಣ, ಸೊಳ್ಳೆಗಳ ಹಾವಳಿ ಹೆಚ್ಚಾಗಿದೆ. ಸಾಂಕ್ರಾಮಿಕ ರೋಗಗಳು ಕಾಣಿಸಿಕೊಳ್ಳುವ ಭೀತಿ ಎದುರಾಗಿದೆ ಎಂದು ಜನತೆ ದೂರುತ್ತಾರೆ.
ಹಬ್ಬಗಳಲ್ಲಿ ತರಲಾಗುವ ಪ್ರಾಣಿ ತ್ಯಾಜ್ಯವನ್ನೂ ಇಲ್ಲಿಗೇ ತಂದು ಹಾಕಲಾಗಿತ್ತು. ಮಾಂಸ ಕೊಳೆತ ವಾಸನೆ, ಮಳೆ ಬಂದಾಗ ರಸ್ತೆಯ ಮೇಲೆಲ್ಲಾ ಹರಿಯುವ ಮಾಂಸದ ತುಣುಕುಗಳು ಜನರಲ್ಲಿ ಅಸಹ್ಯ ಹುಟ್ಟಿಸಿದೆ. ಮಾಂಸದ ತ್ಯಾಜ್ಯ ತಿಂದು ಕೊಬ್ಬಿರುವ ನಾಯಿಗಳು ಮನುಷ್ಯರನ್ನು ಅಟ್ಟಿಸಿಕೊಂಡು ಬರುತ್ತಿವೆ. ಮಹಾನಗರಪಾಲಿಕೆ ಅಧಿಕಾರಿಗಳು ಈ ಪ್ರದೇಶದಲ್ಲಿರುವ ೪ ಬಿನ್ಗಳನ್ನು ತಕ್ಷಣ ಸ್ಥಳಾಂತರಿಸಬೇಕು. ರಸ್ತೆ, ಚರಂಡಿ ಸ್ವಚ್ಛಗೊಳಿಸಬೇಕು. ಮುಂದಿನ ದಿನಗಳಲ್ಲಿ ಇಲ್ಲಿಗೆ ಕಸ ತಂದು ಹಾಕಬಾರದು ಎಂದು ಸ್ಥಳೀಯರು ಆಗ್ರಹಿಸಿದ್ದಾರೆ.
ದೂರಿನಿಂದಲೂ ಪ್ರಯೋಜನವಿಲ್ಲ
ಉಪ್ಪಾರಹಳ್ಳಿ ಜನರು ಕಸದ ಸಮಸ್ಯೆ ಕುರಿತು ನಗರಪಾಲಿಕೆ ವೆಬ್ಸೈಟ್ನಲ್ಲಿ 10 ದಿನದ ಹಿಂದೆಯೇ ದೂರು ದಾಖಲಿಸಿದ್ದಾರೆ. ಆದರೆ ಯಾವುದೇ ಪ್ರಯೋಜನವಾಗಿಲ್ಲ. ಪಾಲಿಕೆಯ ನಿಯಂತ್ರಣ ಕೊಠಡಿ ಸಂಖ್ಯೆ (18004255888 ಮತ್ತು 0816-2271200/ 2272200) ಕರೆ ಮಾಡಿದರೆ ಯಾರೊಬ್ಬರೂ ಕರೆ ಸ್ವೀಕರಿಸಲಿಲ್ಲ. ಪಾಲಿಕೆ ವೆಬ್ಸೈಟ್ನಲ್ಲಿ ನಮೂದಾಗಿರುವ ಉಪ್ಪಾರಹಳ್ಳಿ ವಾರ್ಡ್ಗೆ ಸಂಬಂಧಿಸಿದ ಆರೋಗ್ಯ ನಿರೀಕ್ಷಕರ ದೂರವಾಣಿ ಸಂಖ್ಯೆಗೆ ಜೀವವೇ ಇಲ್ಲ.
–ಬಿ.ವಿ.ಪ್ರಕಾಶ್, ನಾಗರಿಕರು, ಉಪ್ಪಾರಹಳ್ಳಿ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.