ವಿಶ್ವಸಂಸ್ಥೆ: ಇಸ್ಲಾಮಿಕ್ ಸ್ಟೇಟ್ (ಐಎಸ್) ಉಗ್ರರ ಪ್ರಚಾರಕ್ಕೆ ಆಗಿ ಬಳಕೆಯಾಗಿದ್ದ ಆಸ್ಟ್ರಿಯಾ ಮೂಲದ ಬಾಲಕಿ ಸಮ್ರಾ ಕೆಸಿನೊವಿಕ್ ಅವರನ್ನು ಹತ್ಯೆ ಮಾಡಲಾಗಿದೆ ಎಂದು ವಿಶ್ವಸಂಸ್ಥೆ ಮೂಲಗಳು ತಿಳಿಸಿವೆ.
ಐಎಸ್ ಪ್ರಾಬಲ್ಯವಿರುವ ರಖ್ಖಾ ನಗರದಿಂದ ತಪ್ಪಿಸಿಕೊಳ್ಳಲು ಯತ್ನಿಸಿದಾಗ ಅವರನ್ನು ಹೊಡೆದು ಕೊಲ್ಲಲಾ
ಗಿದೆ ಎಂದು ಮೂಲಗಳು ತಿಳಿಸಿವೆ.
17 ವರ್ಷದ ಸಮ್ರಾ ಮತ್ತು ಆಕೆಯ ಗೆಳತಿ ಸಬಿನಾ ಸೆಲಿಮೊವಿಕ್ 2014ರ ಏಪ್ರಿಲ್ನಲ್ಲಿ ಆಸ್ಟ್ರಿಯಾದಿಂದ ಸಿರಿಯಾಕ್ಕೆ ತೆರಳಿದ್ದರು. ಸಿರಿಯಾದಲ್ಲಿ ಅವರು ಜಿಹಾದಿಗಳನ್ನು ಮದುವೆಯಾಗಿದ್ದರು ಎಂದು ‘ದಿ ಇಂಡಿಪೆಂಡೆಂಟ್’ ವರದಿ ಮಾಡಿದೆ.
‘ಆಸ್ಟ್ರಿಯಾ ಮೂಲದ 15 ವರ್ಷದ ಇಬ್ಬರು ಬಾಲಕಿಯರು ಐಎಸ್ ಉಗ್ರರ ಜತೆ ಇದ್ದರು. ಅವರನ್ನು ಐಎಸ್ ನೇಮಿಸಿಕೊಂಡಿತ್ತು. ಅವರಲ್ಲಿ ಒಬ್ಬ ಬಾಲಕಿ ಹತ್ಯೆಯಾಗಿದ್ದರೆ, ಮತ್ತೊಬ್ಬಳು ತಪ್ಪಿಸಿಕೊಂಡಿದ್ದಾಳೆ ಎಂಬ ಮಾಹಿತಿ ಲಭ್ಯವಾಗಿದೆ’ ಎಂದು ವಿಶ್ವ ಸಂಸ್ಥೆಯ ಭಯೋತ್ಪಾದನಾ ನಿಗ್ರಹ ತಜ್ಞ ಡೇವಿಡ್ ಷಾರಿಯಾ ಹೇಳಿದ್ದಾರೆ.