ನವದೆಹಲಿ (ಪಿಟಿಐ): ಸ್ವಿಸ್‌ ಬ್ಯಾಂಕ್‌ನಲ್ಲಿ ಬೇನಾಮಿ ಹಣ ಠೇವಣಿ ಮಾಡಿದವರ ಕುರಿತು ಅಂಕಿಸಂಖ್ಯೆ ಮಾಹಿತಿ ನೀಡುವಂತೆ ಭಾರತ ಸರ್ಕಾರದ ಒತ್ತಡದ ಹಿನ್ನೆಲೆಯಲ್ಲಿ ಪ್ರತಿಕ್ರಿಯಿಸಿರುವ ಅಲ್ಲಿನ ಸರ್ಕಾರ, ದ್ವಿಪಕ್ಷೀಯ ತೆರಿಗೆ ಒಪ್ಪಂದವನ್ನು ಮೀರಿದ ಮಾಹಿತಿಯನ್ನು ನೀಡಲು ಆಗುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ.
‘ತೆರಿಗೆ ವಂಚನೆಯನ್ನು ತಡೆಗಟ್ಟಲು ನಿಮಗೆಷ್ಟು ಕಾಳಜಿ ಇದೆಯೋ ನಮಗೂ ಅಷ್ಟೇ ಇದೆ, ಆದರೆ ಇದೇ ಹೊತ್ತಿಗೆ ಉಭಯ ರಾಷ್ಟ್ರಗಳು ತಮ್ಮ ತಮ್ಮ ರಾಷ್ಟ್ರೀಯ ಹಾಗೂ ಅಂತಾರಾಷ್ಟ್ರೀಯ ಕಾನೂನು ನಿರ್ಬಂಧಗಳನ್ನೂ ಪಾಲಿಸಬೇಕಾಗುತ್ತದೆ’ ಎಂದು ಸ್ವಿಟ್ಜರ್‌ಲೆಂಡ್‌ ಸರ್ಕಾರ ಪುನರುಚ್ಚರಿಸಿದೆ.
ಭಾರತೀಯ ಮೂಲದವರು ಎಚ್‌ಎಸ್‌ಬಿಸಿ ಸ್ವಿಸ್‌ ಬ್ಯಾಂಕ್‌ ಶಾಖೆಗಳಲ್ಲಿ ಬೇನಾಮಿ ಮೊತ್ತವನ್ನು ಠೇವಣಿ ಮಾಡಿರುವ ಕುರಿತು ಪೂರ್ಣ ಮಾಹಿತಿ ನೀಡುವಂತೆ ಕೋರಿ ಹಣಕಾಸು ಸಚಿವ ಪಿ. ಚಿದಂಬರಂ ಈಚೆಗೆ ಸ್ವಿಟ್ಜರ್‌ಲೆಂಡ್‌ ಹಣಕಾಸು ಸಚಿವರಿಗೆ ಖಾರವಾಗಿ ಪತ್ರ ಬರೆದ ಹಿನ್ನೆಲೆಯಲ್ಲಿ ಸ್ವಿಸ್‌ ಫೆಡರಲ್‌ ಸರ್ಕಾರದ ಹಣಕಾಸು ಇಲಾಖೆಯ ವಕ್ತಾರರೊಬ್ಬರು ಈ ರೀತಿಯ ಪ್ರತಿಕ್ರಿಯೆ ನೀಡಿದ್ದಾರೆ.
ತೆರಿಗೆ ವಿಷಯಕ್ಕೆ ಸಂಬಂಧಿಸಿದಂತೆ ಎರಡೂ ರಾಷ್ಟ್ರಗಳ ನಡುವೆ ದುಪ್ಪಟ್ಟು ತೆರಿಗೆ ಒಪ್ಪಂದ (ಡಬಲ್‌ ಟ್ಯಾಕ್ಸೇಶನ್‌ ಅಗ್ರೀಮೆಂಟ್‌) ಅನ್ವಯ ಸಹಕಾರ ಏರ್ಪಟ್ಟಿದೆ. ಅಂತಾರಾಷ್ಟ್ರೀಯ ಮಾನದಂಡಕ್ಕೆ ಅನುಗುಣವಾಗಿ ಈ ಒಪ್ಪಂದವನ್ನು 2010ರ ಆಗಸ್‌್ಟನಲ್ಲಿ ತಿದ್ದುಪಡಿಗೆ ಒಳಪಡಿಸಲಾಗಿದೆ. ಈ ಒಪ್ಪಂದದ ಅನ್ವಯ ಬ್ಯಾಂಕಿಂಗ್‌ ಮಾಹಿತಿ ಸೇರಿದಂತೆ ಹಲವು ಮನವಿಗಳನ್ನು ಸ್ವೀಕರಿಸಲಾಗಿದ್ದು ಇವುಗಳಿಗೆಲ್ಲ ಧನಾತ್ಮಕವಾಗಿಯೇ ಉತ್ತರ ನೀಡಲಾಗಿದೆ. ಆದರೆ ಒಪ್ಪಂದ ಮೀರಿದ ಮನವಿಗಳಿಗೆ ಇದೇ ರೀತಿ ಉತ್ತರ ನೀಡಲು ಸಾಧ್ಯವಾಗದು ಎಂದು ಈ ವಕ್ತಾರರು ಸ್ಪಷ್ಟಪಡಿಸಿದರು.
