ಕಠಿಣ ಕ್ರಮಕ್ಕೆ ಹಿಂಜರಿಯುವುದಿಲ್ಲ

‘ರಿಯೊ ಡಿ ಜನೈರೊ ಒಲಿಂಪಿಕ್ಸ್‌ ಆರಂಭವಾಗಲು ಒಂದು ವರ್ಷವಷ್ಟೇ ಬಾಕಿಯಿದೆ. ಈ ವೇಳೆ ಅಥ್ಲೀಟ್‌ಗಳ ಆತ್ಮ ಸ್ಥೆರ್ಯ ಕುಗ್ಗಿಸುವ ಘಟನೆಗಳು ನಡೆಯ ಬಾರದು. ಪದಕ ಗೆಲ್ಲಬೇಕೆನ್ನುವ ಅವರ ಛಲಕ್ಕೆ ಇಂಥ ವಿಷಯಗಳು ಅಡ್ಡಿಯಾಗ ಬಾರದು’ ಎಂದು ಬಾಕ್‌ ಹೇಳಿದ್ದಾರೆ.

ಕುತೂಹಲ ಮೂಡಿಸಿದ ವಿವಾದ:  ಆಗಸ್ಟ್‌ 22ರಿಂದ 30 ವರೆಗೆ ಬೀಜಿಂಗ್‌ನಲ್ಲಿ ವಿಶ್ವ ಅಥ್ಲೆಟಿಕ್‌ ಚಾಂಪಿಯನ್‌ಷಿಪ್‌ ನಡೆಯ ಲಿದೆ. ಈ ಕ್ರೀಡಾಕೂಟ ಆರಂಭವಾಗಲು ಕೆಲ ದಿನಗಳಷ್ಟೇ ಬಾಕಿ ಇರುವಾಗ  ದತ್ತಾಂಶ ಸೋರಿಕೆ ಯಾಗಿರುವುದು ಕುತೂಹಲ ಮೂಡಿಸಿದೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ಅಂತರರಾಷ್ಟ್ರೀಯ ಅಥ್ಲೆಟಿಕ್‌ ಫೆಡರೇಷನ್‌ (ಐಎಎಎಫ್‌) ಅಧ್ಯಕ್ಷ ಲಾಮಿನಿ ಡಿಯಾಕ್‌, ‘ಈ ಘಟನೆ ಕುರಿತು ಪರಿಶೀಲಿಸುತ್ತೇವೆ. ಫೆಡರೇಷನ್‌ ಸಂಪೂರ್ಣ ಹೊಣೆ ಹೊತ್ತುಕೊಳ್ಳುತ್ತದೆ. ಉದ್ದೀಪನ ಮದ್ದು ಸೇವಿಸಿದವರು ಗೆದ್ದ ಪದಕಗಳನ್ನು ಹಿಂದಕ್ಕೆ ಪಡೆಯಬೇಕು ಎಂದು ಕೆಲವರು ಒತ್ತಡ ಹೇರುತ್ತಿದ್ದಾರೆ’ ಎಂದು ಆರೋಪಿಸಿದ್ದಾರೆ.

‘ವಿಶ್ವ ಅಥ್ಲೆಟಿಕ್ಸ್ ಆರಂಭವಾಗಲು ಕೆಲ ದಿನಗಳಷ್ಟೇ ಬಾಕಿ ಇರುವಾಗ ಘಟನೆ ಬಹಿರಂಗವಾಗಿದೆ. ಅಷ್ಟೇ ಅಲ್ಲ, ಆಗಸ್ಟ್‌ 19ರಂದು ಐಎಎಎಫ್‌ ಅಧ್ಯಕ್ಷ ಸ್ಥಾನಕ್ಕೆ ಚುನಾವಣೆ ನಡೆಯಲಿದೆ. ಇಂಥ ಮಹತ್ವದ ಸಂದರ್ಭದಲ್ಲಿ ದತ್ತಾಂಶ ಸೋರಿಕೆಯಾಗಿರುವುದು ಅಚ್ಚರಿಯೇ ಸರಿ’ ಎಂದು ಡಿಯಾಕ್‌ ನುಡಿದಿದ್ದಾರೆ.

ನೈರೋಬಿ ವರದಿ: ‘ವಿಶ್ವ ಚಾಂಪಿಯ ನ್‌ಷಿಪ್‌ನಲ್ಲಿ ಹೆಚ್ಚು ಪದಕಗಳನ್ನು ಜಯಿಸಲು ನಮ್ಮ ಅಥ್ಲೀಟ್‌ಗಳು ಕಠಿಣ ಅಭ್ಯಾಸ ನಡೆಸಿದ್ದಾರೆ. ಮಾಧ್ಯಮಗಳ ವರದಿಯಿಂದ ಅಥ್ಲೀಟ್‌ಗಳ ಆತ್ಮಸ್ಥೆರ್ಯ ಕುಂದಿದಂತಾಗಿದೆ’ ಎಂದು ಅಥ್ಲೆಟಿಕ್ಸ್ ಕೆನ್ಯಾ ಆಕ್ರೋಶ ವ್ಯಕ್ತಪಡಿಸಿದೆ. ವಿಶ್ವ ಅಥ್ಲೆಟಿಕ್ಸ್‌ಗೆ ಕೆನ್ಯಾ  47 ಅಥ್ಲೀಟ್‌ಗಳ ತಂಡವನ್ನು ಆಯ್ಕೆ ಮಾಡಿದೆ. 

‘ಅಥ್ಲೀಟ್‌ಗಳು ಉದ್ದೀಪನ ಮದ್ದು ಸೇವಿಸುವುದನ್ನು ನಾವು ಒಪ್ಪುವುದಿಲ್ಲ. ಇದನ್ನೂ ಬೆಂಬಲಿಸುವುದೂ ಇಲ್ಲ. ಅಥ್ಲೆಟಿಕ್ಸ್‌ ವಲಯದಲ್ಲಿ ಸಾಕಷ್ಟು ಹಗರಣಗಳು ನಡೆದಿವೆ. ದೊಡ್ಡ ಹುದ್ದೆಯಲ್ಲಿ ಇರುವವರೂ ತಪ್ಪೆಸಗಿದ್ದಾರೆ. ಅದೆಲ್ಲವನ್ನೂ ಬಿಟ್ಟು ಮಾಧ್ಯಮಗಳು ಅಥ್ಲೀಟ್‌ಗಳ ಧೈರ್ಯಗೆಡಿಸುವ ವಿಷಯವನ್ನು ಪ್ರಸಾರ ಮಾಡಿದ್ದು ಸರಿಯಲ್ಲ. ಅಥ್ಲೆಟಿಕ್ಸ್ ಕೆನ್ಯಾದ ಕಾನೂನು ಪರಿಣತರ ತಂಡ ಪ್ರಸಾರವಾದ ವಿಡಿಯೊ ದೃಶ್ಯಗಳನ್ನು ನೋಡಿ ಅಧ್ಯಯನ ಮಾಡಲಿದೆ. ವಾಹಿನಿ ವಿರುದ್ಧ ಕಾನೂನು ಹೋರಾಟ ನಡೆಸಲಾಗುವುದು’
ಎಂದು ಅಥ್ಲೆಟಿಕ್ಸ್ ಕೆನ್ಯಾ ಪ್ರಕಟಣೆಯಲ್ಲಿ ತಿಳಿಸಿದೆ.

ವಿಶ್ವ ಅಥ್ಲೆಟಿಕ್‌ ಚಾಂಪಿಯನ್‌ಷಿಪ್‌ ಆರಂಭಕ್ಕೆ ಕೆಲ ದಿನಗಳಿರುವಾಗ ವರದಿ ಬಹಿರಂಗ ಮಾಡಿದ ಮಾಧ್ಯಮಗಳ ವಿರುದ್ಧ ಆಲ್‌ ರಷ್ಯಾ ಅಥ್ಲೆಟಿಕ್‌ ಫೆಡ ರೇಷನ್‌ ಕೂಡಾ ಆಕ್ರೋಶ ವ್ಯಕ್ತಪಡಿಸಿದೆ. ಮೊಕದ್ದಮೆ ದಾಖಲಿಸಲಾಗುವುದು ಎಂದು ರಷ್ಯಾದ ಕ್ರೀಡಾ ಸಚಿವ ವಿಟಾಲ್‌ ಮುಟ್ಕೊ ಎಚ್ಚರಿಕೆ ನೀಡಿದ್ದಾರೆ.

ರಷ್ಯಾದ ಅಥ್ಲೀಟ್‌ಗಳೇ ಹೆಚ್ಚು ಮದ್ದು ಸೇವನೆ ವಿವಾದದಲ್ಲಿ ಭಾಗಿಯಾಗಿದ್ದಾರೆ ಎಂದು ವರದಿ ಸೋರಿಕೆಯಿಂದ ಬಹಿ ರಂಗವಾಗಿತ್ತು.  ಈ ಕುರಿತು ಐಎಎಎಫ್‌ ಚುರುಕಾಗಿ ತನಿಖೆ ನಡೆಸಬೇಕು ಎಂದು ವಿವಿಧ ಅಥ್ಲೆಟಿಕ್‌ ಫೆಡರೇಷನ್‌ಗಳು ಒತ್ತಾಯಿಸಿವೆ.

ಒಲಿಂಪಿಕ್ಸ್‌ಆತಿಥ್ಯಕ್ಕೆ ಕಸರತ್ತು
2024ರ ಒಲಿಂಪಿಕ್ಸ್‌ಗೆ ಆತಿಥ್ಯ ಪಡೆಯಲು ಬಿಡ್‌ ಸಲ್ಲಿಸುವ ಪ್ರಕ್ರಿಯೆ ಆರಂಭವಾಗಿದ್ದು ಹಲವು ರಾಷ್ಟ್ರಗಳು ಸ್ಪರ್ಧೆಯಲ್ಲಿವೆ. ಪ್ಯಾರಿಸ್‌, ರೋಮ್‌, ಹ್ಯಾಂಬರ್ಗ್‌, ಜರ್ಮನಿ, ಹಂಗರಿ ಮತ್ತು ಬುಡಾಪೆಸ್ಟ್‌ ಬಿಡ್‌ ಸಲ್ಲಿಸಿವೆ.  ಸಾರ್ವಜನಿಕರ ಬೆಂಬಲ ಲಭಿಸದ ಕಾರಣ ಹೋದ ವಾರ ಬಾಸ್ಟನ್‌ ಬಿಡ್ ಸಲ್ಲಿಸುವ ಕೆಲಸದಿಂದ ಹಿಂದೆ ಸರಿದಿತ್ತು. ಅಮೆರಿಕ ಒಲಿಂಪಿಕ್‌ ಸಮಿತಿ ಬಿಡ್‌ ಸಲ್ಲಿಸಲು ಯೋಚಿಸುತ್ತಿದೆ. 2017ರಲ್ಲಿ ಪೆರುವಿನಲ್ಲಿ ನಡೆಯಲಿರುವ 130ನೇ ವರ್ಷದ ಸಭೆಯಲ್ಲಿ ಒಲಿಂಪಿಕ್‌ ಆತಿಥ್ಯ ಯಾರಿಗೆ ನೀಡಬೇಕೆಂದು ಐಒಸಿ ನಿರ್ಧರಿಸಲಿದೆ.
****
ವಿಶ್ವ ಅಥ್ಲೆಟಿಕ್ಸ್‌ ಚಾಂಪಿಯನ್‌ಷಿಪ್‌ ಹಾಗೂ ಐಎಎಎಫ್‌ ಅಧ್ಯಕ್ಷ ಸ್ಥಾನದ ಚುನಾವಣೆಗೆ ಕೆಲ ದಿನಗಳಷ್ಟೇ ಬಾಕಿ ಇರುವಾಗ ಈ ಘಟನೆ ಬಹಿರಂಗ ವಾಗಿರುವುದು ಅಚ್ಚರಿಯಲ್ಲವೇ?
-ಲಾಮಿನಿ ಡಿಯಾಕ್‌, ಐಎಎಎಫ್‌ ಅಧ್ಯಕ್ಷ