ಕಪ್ಪು ನಾಡಿನ ಭಿನ್ನ ಬಣ್ಣಗಳು

ಜನದಟ್ಟಣೆ ಕಡಿಮೆ ಇರುವ  ನಮೀಬಿಯಾ ವಿಶಾಲ ರಸ್ತೆಗಳನ್ನು ಹೊಂದಿದೆ. ಕಾರುಗಳೇ ಹೆಚ್ಚಿರುವ ಈ ನಗರದಲ್ಲಿ ಶಿಸ್ತುಬದ್ಧ ಸಂಚಾರ ವ್ಯವಸ್ಥೆಯೂ ಇದೆ. ಆದರೆ ವಿಂಡುಕ್‌ನಲ್ಲಿ ಸಂಜೆ 6ರ ವೇಳೆಗೆ ಅಂಗಡಿ ಮುಂಗಟ್ಟುಗಳು ಬಂದಾಗಿ ಬಿಡುತ್ತವೆ. ಈ ದೇಶವನ್ನಾಳಿದವರ ಭಾಷೆಗಳಾದ ಜರ್ಮನಿ ಹಾಗೂ ಇಂಗ್ಲಿಷ್ ಶಾಲಾ ಶಿಕ್ಷಣದಲ್ಲಿ ಮಿಳಿತವಾಗಿವೆ. ಸಾರ್ವಜನಿಕ ವ್ಯವಹಾರಗಳಲ್ಲಿ ಇಂಗ್ಲಿಷ್ ಜೊತೆಗೆ ಸ್ಥಳೀಯ ಭಾಷೆಗಳ ಬಳಕೆಯೂ ಇದೆ.

ಬಿಳಿಯರಿಂದ ‘ಗುಲಾಮರ ವ್ಯಾಪಾರ’ದ ದೌರ್ಜನ್ಯಗಳ ಕರಾಳ ಇತಿಹಾಸಗಳ ನೋವುಗಳನ್ನು ಆಫ್ರಿಕಾದ ರಾಷ್ಟ್ರಗಳು ಒಡಲಲ್ಲಿರಿಸಿಕೊಂಡಿವೆ. ವಸಾಹತುಶಾಹಿಯಿಂದ ಬಿಡುಗಡೆಗೊಂಡರೂ ಆಂತರಿಕವಾಗಿ ರಾಜಕೀಯ ತಳಮಳಗಳು ಆಫ್ರಿಕಾದ ಅನೇಕ ರಾಷ್ಟ್ರಗಳನ್ನು ಕಾಡಿವೆ. ಇಂತಹ ಸಂದರ್ಭದಲ್ಲಿ 1992ರಿಂದ ರಾಜಕೀಯ ಸ್ಥಿರತೆಯನ್ನು ಸಾಧಿಸಿಕೊಂಡು ಬಂದಿರುವ ಘಾನಾದಲ್ಲಿ ಈವರೆಗೆ ಐದು ಪ್ರಜಾಸತ್ತಾತ್ಮಕ ಚುನಾವಣೆಗಳು ನಡೆದಿವೆ ಎಂಬುದೇ ಹೆಗ್ಗಳಿಕೆ.

‘ಗೋಲ್ಡ್ ಕೋಸ್ಟ್’ ಎಂದು ಈ ಹಿಂದೆ ಕರೆಯಲಾಗುತ್ತಿದ್ದ ಈ ಪಶ್ಚಿಮ ಆಫ್ರಿಕಾ ರಾಷ್ಟ್ರವಾದ ಘಾನಾದ ಸ್ವಾತಂತ್ರ್ಯ ಚಳವಳಿಯ ಮುಖ್ಯಶಿಲ್ಪಿ ಕ್ವಾಮೆ ನಕ್ರುಮಾ. ಘಾನಾ ರಾಜಧಾನಿ ಆಕ್ರಾದಲ್ಲಿ ಕ್ವಾಮೆ ನಕ್ರುಮಾ ಸ್ಮಾರಕವಿದೆ. ಭವಿಷ್ಯದ ದಾರಿಯತ್ತ ಕೈಮಾಡಿ ನಿಂತಂತೆ ಕಾಣುವ ಅವರ ಕಂಚಿನ ಪುತ್ಥಳಿ ಇಲ್ಲಿದೆ. ಈ ಜಾಗದಲ್ಲೇ ಕ್ವಾಮೆ ನಕ್ರುಮಾ ಅವರು 1957ರ ಮಾರ್ಚ್ 6 ರಂದು ಘಾನಾ ಸ್ವಾತಂತ್ರ್ಯವನ್ನು ಘೋಷಿಸಿದ್ದರು.

‘ಆಫ್ರಿಕಾದ ಪೂರ್ಣ ವಿಮೋಚನೆ ಆಗದಿದ್ದಲ್ಲಿ ಘಾನಾ ಸ್ವಾತಂತ್ರ್ಯ ಅರ್ಥಹೀನ’ ಎಂದು ನಕ್ರುಮಾ ಹೇಳಿದ್ದರು. ಕ್ವಾಮೆ ನಕ್ರುಮಾ ಸ್ಮಾರಕದ ವಸ್ತುಸಂಗ್ರಹಾಲಯದಲ್ಲಿ ಛಾಯಾಚಿತ್ರಗಳು, ಪತ್ರಿಕಾ ಲೇಖನಗಳಲ್ಲದೆ ಘಾನಾ ಇತಿಹಾಸ ಸಾರುವ ದಾಖಲೆಗಳಿವೆ. ಜೊತೆಗೆ ತಮ್ಮ ಜೀವಿತಾವಧಿಯಲ್ಲಿ ನಕ್ರುಮಾ ಬಳಸಿದ ಸಣ್ಣ ಪುಟ್ಟ ವಸ್ತುಗಳಿವೆ.

ಭಾರತದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರೂ ಜೊತೆ ನಕ್ರುಮಾ ಅವರು ಇರುವ ಛಾಯಾಚಿತ್ರವೂ ಇಲ್ಲಿದೆ. ನೆಹರೂ ಜೊತೆ ನಕ್ರುಮಾ ಅವರದ್ದು ವಿಶೇಷ ಸ್ನೇಹ.

ತೃತೀಯ ಜಗತ್ತಿನ ಹಿತ ಕಾಯುವಂತಹ ‘ಅಲಿಪ್ತ ಆಂದೋಲನ’ವನ್ನು ರೂಪಿಸುವಲ್ಲಿ 1961ರಲ್ಲಿ ಈ ಇಬ್ಬರು ನಾಯಕರೂ ಸಕ್ರಿಯರಾಗಿದ್ದರು, ದುರಂತದ ಸಂಗತಿ ಎಂದರೆ, 1966ರಲ್ಲಿ ಘಾನಾದಲ್ಲಿ ನಡೆದ ಕ್ಷಿಪ್ರ ಕ್ರಾಂತಿಯಲ್ಲಿ ನಕ್ರುಮಾ ಅವರನ್ನು ಪದಚ್ಯುತಗೊಳಿಸಲಾಯಿತು. ಆಗ ಅವರು ಗಿನಿಯಾಗೆ ದೇಶಾಂತರ ಹೋದರು. ಅಲ್ಲಿ, ಗಿನಿಯಾದ ಸಹ ಅಧ್ಯಕ್ಷರಾಗುವ ಗೌರವವನ್ನೂ ಪಡೆದುಕೊಂಡಿದ್ದು ಅವರ ವ್ಯಕ್ತಿತ್ವದ ಹಿರಿಮೆ. ನಂತರ ಘಾನಾಗೆ ಅವರೆಂದೂ ಜೀವಂತವಾಗಿ ಹಿಂದಿರುಗಲಿಲ್ಲ. ನಕ್ರಮಾ ಅವರನ್ನು ‘ಘಾನಾದ ಜಾರ್ಜ್ ವಾಷಿಂಗ್ಟನ್’ ಎಂದು ಬಣ್ಣಿಸಲಾಗುತ್ತದೆ.

ಇದೇ ಸಂದರ್ಭದಲ್ಲಿ ಇಂದಿನ ‘ಐರೋಪ್ಯ ಒಕ್ಕೂಟ’ದಿಂದ ಬ್ರಿಟನ್ ನಿರ್ಗಮನದ ‘ಬ್ರೆಕ್ಸಿಟ್’ ವಿದ್ಯಮಾನದ ನಡುವೆ, ಆಫ್ರಿಕನ್ನರನ್ನು ಒಗ್ಗೂಡಿಸಬಲ್ಲಂತಹ ‘ಪ್ಯಾನ್ ಆಫ್ರಿಕನಿಸಂ’ ತಾತ್ವಿಕತೆ ನೆನಪಾಗುತ್ತದೆ. ‘ಪ್ಯಾನ್ ಆಫ್ರಿಕನ್ ತಾತ್ವಿಕತೆ’ಯನ್ನು ತೀವ್ರವಾಗಿ ಪ್ರತಿಪಾದಿಸಿದವರು ಘಾನಾದ ನಕ್ರುಮಾ. ಆಫ್ರಿಕಾ ಮೂಲದ ಜನರ ನಡುವಿನ ಬಾಂಧವ್ಯ ಬಲಪಡಿಸುವ, ಉತ್ತೇಜಿಸುವ ವಿಶ್ವವ್ಯಾಪಕ ಬೌದ್ಧಿಕ ಚಳವಳಿ ಇದು.  

‘ನಾವು ಸ್ವತಂತ್ರರಾಗಿ ಇರಬೇಕಾದರೆ, ಆಫ್ರಿಕಾ ಸಂಪನ್ಮೂಲಗಳ ಪೂರ್ಣ ಪ್ರಯೋಜನಗಳನ್ನು ಅನುಭವಿಸಬೇಕಾದರೆ, ನಮ್ಮೆಲ್ಲಾ ಜನರ ಪೂರ್ಣ ಹಿತಕ್ಕಾಗಿ, ನಮ್ಮೆಲ್ಲಾ ವಸ್ತು ಹಾಗೂ ಮಾನವ ಸಂಪನ್ಮೂಲಗಳ ಪೂರ್ಣ ಬಳಕೆ ಹಾಗೂ ರಕ್ಷಣೆಗಾಗಿ ಯೋಜನೆಗಳನ್ನು ರೂಪಿಸಲು ಒಟ್ಟಾಗಬೇಕು’ ಎಂಬಂಥ ಕರೆಯನ್ನು ಕ್ವಾಮೆ ನಕ್ರುಮಾ ನೀಡಿದ್ದರು. ಏಕಾಂಗಿಯಾಗಿ ನಿಲ್ಲುವುದು ನಮ್ಮ ನಿರೀಕ್ಷೆಗಳಿಗೆ ಮಿತಿ ಹಾಕಿದಂತೆ ಹಾಗೂ ಸ್ವಾತಂತ್ರ್ಯಕ್ಕೂ ಬೆದರಿಕೆ ಒಡ್ಡುತ್ತದೆ ಎಂಬ ಅವರ ಮಾತು ಈಗಲೂ ಪ್ರಸ್ತುತ. 

ಆಕ್ರಾದಲ್ಲಿರುವ ಭವ್ಯವಾದ ಘಾನಾ ಅಧ್ಯಕ್ಷರ ಭವನ ‘ಫ್ಲ್ಯಾಗ್‌ಸ್ಟಾಫ್ ಹೌಸ್’ ಅನ್ನು ಕಳೆದ ದಶಕದಲ್ಲಷ್ಟೇ ಭಾರತದ ಸಾಲದ ನೆರವಿನೊಂದಿಗೆ ನಿರ್ಮಿಸಲಾಗಿದೆ. ಇಡೀ ಆಫ್ರಿಕಾ ಖಂಡದಲ್ಲಿ ಸ್ವಾತಂತ್ರ್ಯ ಗಳಿಸಿದ ಮೊದಲ ಆಫ್ರಿಕನ್ ದೇಶವಾದ ಘಾನಾದಲ್ಲಿ ನಮ್ಮ ಕೊಡಗಿನ ಸಿ.ಬಿ. ಮುತ್ತಮ್ಮ ಅವರು ಭಾರತದ  ಹೈ ಕಮಿಷನರ್ ಆಗಿ ಸೇವೆ ಸಲ್ಲಿಸಿದ್ದರು ಎಂಬುದನ್ನು ಮರೆಯಲಾದೀತೆ?

ಅದೂ ಮಹಿಳೆ ವಿರುದ್ಧದ ಪೂರ್ವಗ್ರಹಗಳು ಆವರಿಸಿಕೊಂಡಿದ್ದ ಕಾಲದಲ್ಲಿ ಮೊದಲ ಮಹಿಳಾ ಐಎಫ್‍ಎಸ್ ಅಧಿಕಾರಿಯಾಗಿ 1949ರಲ್ಲಿ ಭಾರತೀಯ ವಿದೇಶಾಂಗ ಸೇವೆಗೆ ಸೇರಿ ಇತಿಹಾಸ ನಿರ್ಮಿಸಿದ್ದ ಮುತ್ತಮ್ಮ ಅವರು ನಿವೃತ್ತಿ ನಂತರ ಬೆಂಗಳೂರಿನಲ್ಲೇ ನೆಲೆಸಿದ್ದು 2009ರಲ್ಲಿ ತೀರಿಕೊಂಡಿದ್ದನ್ನು ಈ ಸಂದರ್ಭದಲ್ಲಿ ಸ್ಮರಿಸಿಕೊಳ್ಳಬಹುದು.

ಫ್ರೆಂಚರ ವಸಾಹತು ಆಗಿದ್ದು 1960ರಲ್ಲಿ ವಿಮೋಚನೆಗೊಂಡರೂ ರಾಜಕೀಯ ಅಸ್ಥಿರತೆಗಳಲ್ಲಿ ನಲುಗಿದ ನಾಡು ಐವರಿ ಕೋಸ್ಟ್.   ದಶಕಗಳ ರಾಜಕೀಯ ಅಸ್ಥಿರತೆ, ಸಶಸ್ತ್ರ ಸಂಘರ್ಷಗಳ ನಂತರ ಅಲಾಸಾನೆ ಕ್ವಟ್ಟಾರಾ ಅವರು 2011ರಿಂದ ಐವರಿ ಕೋಸ್ಟ್‌ನ ಅಧ್ಯಕ್ಷರಾಗಿದ್ದಾರೆ. 2010ರ ಅಧ್ಯಕ್ಷೀಯ ಚುನಾವಣೆ ನಂತರ ಹಿಂಸಾಚಾರಗಳಿಂದ ಕೂಡಿದ ಬಿಕ್ಕಟ್ಟು ಮತ್ತೆ ಈ ರಾಷ್ಟ್ರದಲ್ಲಿ ಸೃಷ್ಟಿಯಾಗಿತ್ತು. ಇದರಿಂದ ಬೃಹತ್ ಪ್ರಮಾಣದ ಜನಸಂಖ್ಯೆ ನೆಲೆ ಕಳೆದುಕೊಂಡು ಸ್ಥಳಾಂತರಗೊಂಡಿದ್ದಾರೆ.

ಬಹಳಷ್ಟು ಜನರು, ವಿಶೇಷವಾಗಿ ಮಹಿಳೆಯರು ಅನಕ್ಷರಸ್ಥರು. 6ರಿಂದ 10ನೇ ವಯಸ್ಸಿನ ಅನೇಕ ಮಕ್ಕಳು ಶಾಲೆಯ ಮುಖ ಕಂಡಿಲ್ಲದ ಸ್ಥಿತಿಯೂ ಇದೆ.  ಆದರೆ ರಾಜಕೀಯ ನಾಯಕರ ಐಷಾರಾಮಿ ಲಿಮೊಸಿನ್ ಕಾರುಗಳು ಕಣ್ಣು ಕುಕ್ಕುವಂತಿದ್ದವು. ನೈಸರ್ಗಿಕ ಸೌಂದರ್ಯದ ಈ ಸ್ವಚ್ಛ ರಾಷ್ಟ್ರದಲ್ಲಿ ವಿಶಾಲ ರಸ್ತೆಗಳು ಮನಮೋಹಕ. ಹಾಗೆಯೇ ಪ್ರವಾಸೋದ್ಯಮದ ಬೆಳವಣಿಗೆಗೆ ಪೂರಕವಾದ ಐಷಾರಾಮಿ ಹೋಟೆಲುಗಳ ಆಡಂಬರಗಳೂ ಗಮನ ಸೆಳೆಯುವಂತಿದ್ದವು.

ಆದರೆ ಐವರಿ ಕೋಸ್ಟ್‌ನ ಹೆಚ್ಚಿನ ಜನ ಈಗಲೂ ಅವಲಂಬಿಸಿರುವುದು ಕೃಷಿಯನ್ನೇ.  ಕೋಕೊ ಹಾಗೂ ಕಾಫಿಯ ಪ್ರಮುಖ ರಫ್ತುದಾರ ರಾಷ್ಟ್ರ ಇದು. ಫ್ರೆಂಚ್ ವಸಾಹತು ಆಗಿದ್ದ ಈ ರಾಷ್ಟ್ರದಲ್ಲಿ ಫ್ರೆಂಚ್ ಅಧಿಕೃತ ಭಾಷೆ.  ರಾಷ್ಟ್ರದ ಅಧಿಕೃತ ಹೆಸರು ಫ್ರೆಂಚ್ನಲ್ಲಿ ‘ಕೋಟ್ ಡಿ ವಾರ್’. ಇಂಗ್ಲಿಷ್ ಹೆಚ್ಚು ಬಳಕೆ ಇಲ್ಲದಿರುವುದರಿಂದ ಜನರೊಂದಿಗೆ ಸಂವಹನ ಕಷ್ಟ.

ಇಂತಹ ರಾಷ್ಟ್ರದಲ್ಲಿ ‘ಸ್ವಲ್ಪ ಅಡ್ಜಸ್ಟ್ ಮಾಡಿ’,  ‘ಊಟ ಆಯಿತಾ’ ಎಂಬಂತಹ ಕನ್ನಡ ಪದಗಳನ್ನು ಬಳಸಿ ಅಬಿದ್‌ಜಾನ್‌ನ ಭಾರತೀಯ ರಾಯಭಾರ ಕಚೇರಿಯಲ್ಲಿ ಕೆಲಸ ಮಾಡುತ್ತಿರುವ ಡೆಲಿ ಆರ್ಮಂದ್ ಮಾತನಾಡಿದಾಗ ಅಚ್ಚರಿಯಾಯಿತು. ಭಾರತ ಸರ್ಕಾರ ನೀಡುವ ವಿದ್ಯಾರ್ಥಿ ವೇತನದ ನೆರವಿನೊಂದಿಗೆ ಬೆಂಗಳೂರಿನಲ್ಲೇ ತಾವು ಬಿ.ಸಿಎ ಮಾಡಿರುವುದಾಗಿ ಅವರು  ಹೇಳಿಕೊಂಡರು. ಜೊತೆಗೆ ಐವರಿ ಕೋಸ್ಟ್‌ನಲ್ಲಿ ಭಾರತದ ರಾಯಭಾರಿಯಾಗಿರುವ ಆರ್. ರವೀಂದ್ರ ಅವರೂ ಕನ್ನಡಿಗರು.

ಈಗಲೂ ಅಮೆರಿಕ, ಯುರೋಪ್, ಆಸ್ಟ್ರೇಲಿಯಾಗಳಿಗೆ ಹೋಗುವುದು ಎಂದರೆ ಅದು ಪ್ರತಿಷ್ಠಿತ ಸಂಗತಿ. ಆದರೆ ಆಫ್ರಿಕಾಗೆ  ಹೋಗುವುದು ಎಂದರೆ ಅದಕ್ಕೆ ಆ ಮಟ್ಟಿನ ಪ್ರತಿಷ್ಠೆ ದಕ್ಕಿಲ್ಲ. ಆದರೆ ಪ್ರವಾಸೋದ್ಯಮ ಸುಧಾರಣೆಗೆ ಈ ರಾಷ್ಟ್ರಗಳಲ್ಲಿ ಗಮನಾರ್ಹ ಪ್ರಯತ್ನಗಳಂತೂ ನಡೆದಿವೆ. ಪಶ್ಚಿಮ ಆಫ್ರಿಕಾ ರಾಷ್ಟ್ರಗಳಿಗೆ ಹೋಗಲು ‘ಎಲ್ಲೋ ಫಿವರ್’ ವ್ಯಾಕ್ಸಿನೇಷನ್ ಬೇರೆ ಹಾಕಿಸಿಕೊಳ್ಳಬೇಕು.  ಈ ರಾಷ್ಟ್ರಗಳಿಗೆ ಭೇಟಿ ನೀಡುವ 10 ದಿನಗಳ ಮುಂಚೆ ಈ ವ್ಯಾಕ್ಸಿನೇಷನ್ ಹಾಕಿಸಿಕೊಂಡಿರಬೇಕು.

ಒಮ್ಮೆ ಈ ಲಸಿಕೆ ಹಾಕಿಸಿಕೊಂಡರೆ 10 ವರ್ಷಗಳವರೆಗೆ ಮತ್ತೆ ಹಾಕಿಸಿಕೊಳ್ಳಬೇಕಿಲ್ಲ. ಬೆಂಗಳೂರಿನಲ್ಲಿ ಶೇಷಾದ್ರಿ ರಸ್ತೆಯಲ್ಲಿರುವ ‘ಪಬ್ಲಿಕ್ ಹೆಲ್ತ್  ಇನ್ಸ್ಟಿಟ್ಯೂಟ್’ನಲ್ಲಿ  ವಾರಕ್ಕೆ ಒಂದು ದಿನ ಮಾತ್ರ ಈ ಲಸಿಕೆ ಹಾಕಲಾಗುತ್ತದೆ. ಹೀಗಾಗಿ ಮೊದಲೇ ಸಮಯವನ್ನು ನಿಗದಿಪಡಿಸಿಕೊಳ್ಳಬೇಕು. ಈಚಿನ ದಿನಗಳಲ್ಲಿ ಕೆಲವು ಖಾಸಗಿ ಆಸ್ಪತ್ರೆಗಳಲ್ಲೂ ಈಗ ಈ ಲಸಿಕೆ ಲಭ್ಯ, ಆದರೆ ಇದಕ್ಕೆ ದುಬಾರಿ ಶುಲ್ಕ ತೆರಬೇಕಾಗುತ್ತದೆ.

1960ರ ದಶಕದಿಂದಲೂ ಭಾರತದ ಶಿಕ್ಷಕರು, ವಿಜ್ಞಾನಿಗಳು, ವೈದ್ಯರು, ತಂತ್ರಜ್ಞಾನ ಹಾಗೂ ಮಿಲಿಟರಿ ತಂತ್ರಜ್ಞರು ಆಫ್ರಿಕಾ ರಾಷ್ಟ್ರಗಳ ಒಂದು ಪೀಳಿಗೆಯನ್ನೇ ತರಬೇತುಗೊಳಿಸಿದಂತಹ ಇತಿಹಾಸ ಭಾರತದ ಬೆನ್ನಿಗಿದೆ. ನಮ್ಮ ಕನ್ನಡ ಸಾಹಿತ್ಯಲೋಕದ ಬಿ.ಸಿ. ರಾಮಚಂದ್ರ ಶರ್ಮ, ಸಿ.ಎನ್. ರಾಮಚಂದ್ರನ್ ಹಾಗೂ ಕೆ.ಟಿ. ಗಟ್ಟಿ ಅವರು ಆಫ್ರಿಕನ್ ರಾಷ್ಟ್ರಗಳಲ್ಲಿ ಇಂಗ್ಲಿಷ್ ಕಲಿಸಿದವರು ಎಂಬುದೂ ನೆನಪಾಗುತ್ತದೆ.

ಜಗತ್ತಿನ ದಕ್ಷಿಣ ಭಾಗದ ರಾಷ್ಟ್ರಗಳು ಅಥವಾ ಅಭಿವೃದ್ಧಿಶೀಲ ರಾಷ್ಟ್ರಗಳ ನಡುವಿನ ‘ದಕ್ಷಿಣ – ದಕ್ಷಿಣ ಸಹಕಾರ’ಕ್ಕೆ ಆಫ್ರಿಕಾ ರಾಷ್ಟ್ರಗಳೊಂದಿಗೆ ನಮ್ಮ ಬಾಂಧವ್ಯ ಮಾದರಿ ಆಗಬೇಕಿದೆ. ಆದರೆ ಈಗಾಗಲೇ ಈ ದಕ್ಷಿಣ – ದಕ್ಷಿಣ ಸಹಕಾರದ ಮಾದರಿಯನ್ನು ಆಫ್ರಿಕಾ ಖಂಡದ ರಾಷ್ಟ್ರಗಳಲ್ಲಿ ಸಾಧಿಸಲಾಗಿದೆ ಎಂದು ಚೀನಾ ಚೀರಿ ಹೇಳುತ್ತಿದೆ.

ಆದರೆ ಮಾನವ ಸಂಪನ್ಮೂಲ, ಸಾಮಾಜಿಕ ವಲಯ ಹಾಗೂ ಪ್ರಜಾಸತ್ತೆ ಆಯಾಮಗಳ ವಿಚಾರಗಳಿಗೆ ಸಂಬಂಧಿಸಿದಂತೆ ಆಫ್ರಿಕಾ ರಾಷ್ಟ್ರಗಳಲ್ಲಿ ಭಾರತದ ಸಹಕಾರದ ಮಾದರಿ ಚೀನಾವನ್ನು ಮೀರಿಸುವಂತಹದ್ದು. ಹೀಗಾಗಿ ಆರ್ಥಿಕ ಸಹಕಾರದ ಜೊತೆಜೊತೆಗೇ ಈ ಬಾಂಧವ್ಯದ ಮಾದರಿಯನ್ನು ಬಲಪಡಿಸುವುದು ಅಗತ್ಯ. ರಾಷ್ಟ್ರಪತಿಯವರ ಆಫ್ರಿಕಾದ ಪ್ರವಾಸದ ಉದ್ದೇಶವೂ ಇದೇ. ಈಗ ಮುಕ್ತಾಯ ಹಂತದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿಯವರ ಆಫ್ರಿಕಾದ ಐದು ರಾಷ್ಟ್ರಗಳ ಭೇಟಿಯ ಗುರಿ ಕೂಡ ಇದೇ.