ಕರಾವಳಿ ಸೊಗಡಿನ ಸಂಭ್ರಮ; ನಮ್ಮೂರ ಹಬ್ಬ

ಕರಾವಳಿಯಿಂದ ಬೆಂಗಳೂರಿಗೆ ಜನರು ವಲಸೆ ಬರುತ್ತಿರುವುದು ಹೊಸ ವಿಷಯವೇನಲ್ಲ. ಹಾಗೆ ವಲಸೆ ಬಂದ ಎಷ್ಟೋ ಜನರು ಬೆಂಗಳೂರಿಗರೇ ಆಗಿಬಿಟ್ಟಿದ್ದಾರೆ. ಆದರೆ ಮೂಲದ ಕೊಂಡಿ ಕಳಚಿಕೊಳ್ಳುವುದು ಅಷ್ಟು ಸುಲಭವಲ್ಲ. ನಮ್ಮ ಭಾಷೆ, ಆಚರಣೆ, ತಿಂಡಿಗಳನ್ನು ಮರೆಯುವುದು ಸಾಧ್ಯವಿಲ್ಲ. ನಗರದ ಜಂಜಡದ ನಡುವೆಯೇ ಊರು ನೆನಪಾಗುತ್ತಲೇ ಇರುತ್ತದೆ. ಹಾಗೆಂದು ನೆನಪಾದಾಗಲೆಲ್ಲ ಊರಿಗೆ ಹೋಗಲು ಸಾಧ್ಯವೂ ಆಗುವುದಿಲ್ಲವಲ್ಲ.
ಈ ಕಾರಣಕ್ಕಾಗಿಯೇ ಒಂದೇ ಮೂಲದಿಂದ ಬಂದ ಜನರು ತಮ್ಮದೇ ಸಂಘಟನೆಗಳನ್ನು ಮಾಡಿಕೊಂಡು ಊರ ನೆನಪುಗಳನ್ನು ಮೆಲುಕುಹಾಕುವುದೂ ಆಗೀಗ ನಡೆಯುತ್ತಿರುತ್ತದೆ.

ಇದೇ ಉದ್ದೇಶದಿಂದ ಕಳೆದ ಮೂರು ವರ್ಷಗಳಿಂದ ‘ನಮ್ಮೂರ ಹಬ್ಬ’ ಎಂಬ ಹೆಸರಿನಲ್ಲಿ ಇಂಥದ್ದೇ ಒಂದು ಸಂಭ್ರಮದ ಉತ್ಸವವನ್ನು ಅಭಿನಂದನ ಸಾಂಸ್ಕೃತಿಕ ಟ್ರಸ್ಟ್‌ ಆಯೋಜಿಸಿಕೊಂಡು ಬಂದಿದೆ. ಈ ವರ್ಷದ ‘ನಮ್ಮೂರ ಹಬ್ಬ’ ಈ ವಾರಾಂತ್ಯ (ಫೆ.13 ಮತ್ತು 14) ಎರಡು ದಿನ ಜಯನಗರದಲ್ಲಿ ನಡೆಯಲಿದೆ.

‘ಕರಾವಳಿ ಮೂಲದಿಂದ ಬಂದ ಜನರು ಧರ್ಮ, ಜಾತಿ, ಸಮುದಾಯಗಳ ಆಧಾರದ ಮೇಲೆ ಮಾಡಿಕೊಂಡ ಸಾಕಷ್ಟು ಸಂಘಟನೆಗಳು ಬೆಂಗಳೂರಿನಲ್ಲಿ ಸಕ್ರಿಯವಾಗಿವೆ. ಆದರೆ ಈ ಜಾತಿ ಧರ್ಮಗಳನ್ನೆಲ್ಲ ಮೀರಿ ಕರಾವಳಿ ಮೂಲದವರೆಲ್ಲ ಒಂದು ಕಡೆ ಸೇರಿ ನಮ್ಮೂರಿನ ಖಾದ್ಯ, ನಮ್ಮೂರಿನ ಜನಪದ ಆಚರಣೆಗಳನ್ನು ಸಂಭ್ರಮಿಸಿದರೆ ಹೇಗೆ ಎಂಬ ಆಲೋಚನೆಯಿಂದ ‘ನಮ್ಮೂರ ಹಬ್ಬ’ ಹುಟ್ಟಿಕೊಂಡಿದೆ. ಕಾಸರಗೋಡಿನಿಂದ ಕಾರವಾರದವರೆಗಿನ ಕರಾವಳಿಯ ಮನಸ್ಸುಗಳು ಜಾತಿ–ಭಾಷೆಗಳನ್ನು ಮೀರಿ ಸೇರುವ ಅಪೂರ್ವ ಕಾರ್ಯಕ್ರಮ ಇದು’ ಎನ್ನುತ್ತಾರೆ ಅಭಿನಂದನ ಸಾಂಸ್ಕೃತಿಕ ಟ್ರಸ್ಟ್‌ನ ಭಾಸ್ಕರ ಬಂಗೇರ.

ಈ ಹಬ್ಬದಲ್ಲಿ ಸಾಂಸ್ಕೃತಿಕ ಸಡಗರ, ಜನಪದ ಆಟಗಳ ಸ್ಪರ್ಧೆಗಳು, ಸಾಧಕರಿಗೆ ಸನ್ಮಾನ, ಖಾದ್ಯಗಳು ಹೀಗೆ ವಿವಿಧ ರೀತಿಯಲ್ಲಿ ಕಾರ್ಯಕ್ರಮಗಳನ್ನು ಸಂಘಟಿಸಲಾಗಿದೆ. ಸಾಂಸ್ಕೃತಿಕ ಸಡಗರದಲ್ಲಿ ಕರಾವಳಿಯ ವಿಶೇಷ ಕಲೆಯಾದ ಭೂತಾರಾಧನೆ, ಯಕ್ಷಗಾನ, ಹುಲಿವೇಷ, ಗಾಯನ, ಸಂಗೀತ, ನೃತ್ಯ, ಫ್ಯಾಷನ್‌ ಷೋ ಹೀಗೆ ವಿವಿಧ ಕಾರ್ಯಕ್ರಮಗಳು ನಡೆಯಲಿವೆ. ಜತೆಗೆ ಖ್ಯಾತ ಗಾಯಕರು ಎರಡೂ ದಿನ ಸಂಜೆ ಸಂಗೀತ ಕಾರ್ಯಕ್ರಮ ನಡೆಸಿಕೊಡಲಿದ್ದಾರೆ. ಯಕ್ಷಗಾನಗಳ ಭಿನ್ನ ವೇಷಗಳು ಒಂದೇ ವೇದಿಕೆಯಲ್ಲಿ ಬರುವ ‘ಯಕ್ಷವೈಭವ’ ಕಾರ್ಯಕ್ರಮ ಇರಲಿದೆ.

ಉಡುಪಿಯ ಕಿಶೋರ್‌ರಾಜ್‌ ಕಾಡಬೆಟ್ಟು ಅವರ ತಂಡದಿಂದ ಎರಡೂ ದಿನ ಹುಲಿವೇಷ ಪ್ರದರ್ಶನ ಇರುತ್ತದೆ. ಕರಾವಳಿ ಜನಪದ  ಡೋಲು ತಂಡವೂ ಕಾರ್ಯಕ್ರಮ ನೀಡಲಿದೆ. ಅಂತರರಾಷ್ಟ್ರೀಯ ಮಟ್ಟದ ಚಿತ್ರಕಲಾವಿದ ವಿಲಾಸ್‌ ನಾಯಕ್‌ ಅವರಿಂದ ವಿಶೇಷ ಪ್ರದರ್ಶನ ಈ ಹಬ್ಬದ ವಿಶೇಷತೆಗಳಲ್ಲಿ ಒಂದು. ಹಾಗೆಯೇ ಕರಾವಳಿ ಉಡುಗೆ–ತೊಡುಗೆಗಳ ಫ್ಯಾಷನ್‌ ಷೋ ‘ಕರಾವಳಿ ಕೂಡ’ ಆಯೋಜಿಸಲಾಗಿದೆ.

ಆಟದ ಕೂಟ
ಸಾಂಸ್ಕೃತಿಕ ಕಾರ್ಯಕ್ರಮಗಳ ಜತೆಯಲ್ಲಿ ಹಲವು ಸ್ಪರ್ಧೆಗಳನ್ನೂ ಆಯೋಜಿಸಲಾಗಿದೆ. ‘ನಮ್ಮ ಗ್ರಾಮೀಣ ಆಟಗಳಾದ ಚಿನ್ನಿದಾಂಡು, ಸೈಕಲ್‌ ಟೈರ್‌ ಓಡಿಸುವುದು, ಅಡಿಕೆ ಹಾಳೆ ಎಳೆಯುವುದು, ಲಗೋರಿ, ಹಗ್ಗ ಜಗ್ಗಾಟ ಹೀಗೆ ವಿವಿಧ ಆಟಗಳಿಗೆ ಆಧುನಿಕ ಸ್ಪರ್ಶ ನೀಡಿ ಆಯೋಜಿಸಲಾಗಿದೆ’ ಎನ್ನುತ್ತಾರೆ ಭಾಸ್ಕರ್‌.

ಆಡಿ ಹಸಿದರೆ ಊಟದ ಸವಿಯುಂಟು
ಕರಾವಳಿ ತಿನಿಸುಗಳ ಪ್ರಿಯರು ಖುಷಿಪಡಲು ಇಲ್ಲಿ ಸಾಕಷ್ಟು ಅವಕಾಶವಿದೆ. ‘ನಮ್ಮೂರ ಹೋಟೆಲ್‌’ ಎಂಬ ಹೆಸರಿನ ದೇಸಿ ಆಹಾರೋತ್ಸವದಲ್ಲಿ 200ಕ್ಕೂ ಹೆಚ್ಚಿನ ಬಗೆಯ ಕರಾವಳಿ ಖಾದ್ಯಗಳು ಈ ಹಬ್ಬದಲ್ಲಿ ಇರಲಿವೆ. ಸಸ್ಯಾಹಾರಿ, ಮಾಂಸಾಹಾರಿ ಎರಡೂ ಬಗೆಯ ತಿನಿಸು ಪ್ರಿಯರ ರಸಾಸ್ವಾದಕ್ಕೂ ಇಲ್ಲಿ ಸಾಕಷ್ಟು ಅವಕಾಶವಿದೆ.

ಕರಾವಳಿಯಿಂದ ಬಂದ ನುರಿತ ಬಾಣಸಿಗರು ಸ್ಥಳದಲ್ಲೇ ತಯಾರಿಸುವ ನೀರ್‌ದೋಸೆ, ಹಾಲುಬಾಯಿ, ಕಾಯಿ ಕಡುಬು, ಗೋಲಿಬಜೆ, ಪತ್ರೊಡೆ, ಉದ್ದಿನ ದೋಸೆ, ಕಡಲ ಏಡಿಯ ಸುಕ್ಕ, ಕೋರಿ ರೊಟ್ಟಿ, ಮೀನು ಹಾಗೂ ಸಿಗಡಿ ಬಳಸಿ ತಯಾರಿಸಿದ ಖಾದ್ಯಗಳು ಕರಾವಳಿಯ ಅಡುಗೆ ಮನೆಯನ್ನು ಸಾಕ್ಷಾತ್ಕರಿಸಲಿವೆ. ಇದರ ಜತೆಗೆ ಕರಾವಳಿಯಿಂದ ತಂದ ತಾಜಾ ತರಕಾರಿಗಳ ಮಾರಾಟದ ಜೊತೆಗೆ ಇನ್ನಿತರ ವಿಶೇಷ ವಸ್ತುಗಳಾದ ಮಂಡೆ ಹಾಳೆ, ಓಲೆ, ಕಡ್ಡಿ ಚಾಪೆ ಇರುತ್ತವೆ. ಬಾಯಲ್ಲಿ ನೀರೂರಿಸಲು ಓಲೆ ಬೆಲ್ಲವೂ ಉಂಟು.

ಸಾಧಕರಿಗೆ ಗೌರವ
ಸಾಂಸ್ಕೃತಿಕ ಕಾರ್ಯಕ್ರಮಗಳೊಟ್ಟಿಗೆ ಕರಾವಳಿ ಮೂಲದಿಂದ ಬಂದು ವಿಶೇಷ ಸಾಧನೆ ಮಾಡಿದ ವ್ಯಕ್ತಿ ಮತ್ತು ಸಂಸ್ಥೆಗಳನ್ನು ಸನ್ಮಾನಿಸುವ ಕಾರ್ಯಕ್ರಮವನ್ನೂ ಹಮ್ಮಿಕೊಳ್ಳಲಾಗಿದೆ. ಅಂತರರಾಷ್ಟ್ರೀಯ ಪ್ಯಾರಾ ಅಥ್ಲೀಟ್‌ ಮಾಲತಿ ಹೊಳ್ಳ ಮತ್ತು ಹೋಟೆಲ್ ಉದ್ದಿಮೆದಾರರ ಸಹಕಾರ ಬ್ಯಾಂಕ್ ನಿಯಮಿತ ಸಂಸ್ಥೆಗೆ ‘ಕಿರೀಟ’ ಪ್ರಶಸ್ತಿ ಕೊಟ್ಟು ಗೌರವಿಸಲಾಗುವುದು.

‘ಕಳೆದ ವರ್ಷ ಎರಡೂ ದಿನ ಸೇರಿ ಸುಮಾರು ನಲ್ವತ್ತರಿಂದ ನಲ್ವತ್ತೈದು ಸಾವಿರ ಜನ ಬಂದಿದ್ದರು. ಈ ವರ್ಷ ಅದು ಎಪ್ಪತ್ತು ಸಾವಿರ ಮೀರುವ ನಿರೀಕ್ಷೆ ಇದೆ’ ಎನ್ನುತ್ತಾರೆ ಭಾಸ್ಕರ್‌.