ಕಾರ್ಮಿಕ ಕಾನೂನು ತಿದ್ದುಪಡಿ ಮಸೂದೆಗೆ ರಾಜ್ಯಸಭೆ ಅಸ್ತು
ನವದೆಹಲಿ: ಕೆಲವು ಪಕ್ಷಗಳ ತೀವ್ರ ವಿರೋಧದ ನಡುವೆಯೂ ೧೯೯೮ನೇ ಇಸವಿಯ ಕಾರ್ಮಿಕ ಕಾನೂನುಗಳ ತಿದ್ದುಪಡಿ ಮಸೂದೆಯು ರಾಜ್ಯಸಭೆಯಲ್ಲಿ ಮಂಗಳವಾರ ಅಂಗೀಕಾರಗೊಂಡಿತು. ಇದರಿಂದ ೧೦ಕ್ಕಿಂತ ಹೆಚ್ಚು ಹಾಗೂ ಗರಿಷ್ಠ ೪೦ ಸಿಬ್ಬಂದಿಯನ್ನು ಹೊಂದಿರುವ ಸಂಸ್ಥೆಗಳಿಗೆ ಕೆಲವು ಪ್ರಮುಖ ವಿನಾಯಿತಿಗಳು ಸಿಗಲಿವೆ. ಸಿಪಿಎಂ, ಸಿಪಿಐ, ಎಸ್‌ಪಿ ಮತ್ತು ಜೆಡಿಯು ಈ ತಿದ್ದುಪಡಿಯನ್ನು ತೀವ್ರವಾಗಿ ವಿರೋಧಿಸಿದವು.
ಅಂದರೆ, ಈಗ ೧೦ಕ್ಕಿಂತ ಹೆಚ್ಚು ಹಾಗೂ ೪೦ ಸಂಖ್ಯೆಯ ಮಿತಿಯೊಳಗೆ ಸಿಬ್ಬಂದಿ ಹೊಂದಿರುವ ಸಂಸ್ಥೆಗಳು ದಾಖಲಾತಿ ಪುಸ್ತಕ ನಿರ್ವಹಿಸುವುದು ಹಾಗೂ ವರಮಾನ ಲೆಕ್ಕಪತ್ರ ವಿವರ ಸಲ್ಲಿಸಬೇಕಾಗಿಲ್ಲ. ಈ ಮುಂಚೆ, ೧೦ಕ್ಕಿಂತ ಹೆಚ್ಚು ಹಾಗೂ ೧೯ಕ್ಕಿಂತ ಕಡಿಮೆ ಸಿಬ್ಬಂದಿ ಇರುವ ಸಂಸ್ಥೆಗಳಿಗೆ ಈ ವಿನಾಯಿತಿ ಇತ್ತು.
ದಾಖಲಾತಿ ವಿವರವನ್ನು ಕಂಪ್ಯೂಟರ್‌, ಫ್ಲಾಪಿ, ಡಿಸ್ಕೆಟ್‌ ಅಥವಾ ಬೇರೆ ಯಾವುದೇ ಎಲೆಕ್ಟ್ರಾನಿಕ್‌ ಉಪಕರಣದಲ್ಲಿ ನಿರ್ವಹಿಸಲು ತಿದ್ದುಪಡಿಯಾಗಿರುವ ಮಸೂದೆಯಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಅಲ್ಲದೇ ೪೦ ಸಿಬ್ಬಂದಿಗಳಿರುವ ಕಂಪೆನಿಗಳ ಮಾಲೀಕರಿಗೆ ವರಮಾನ ಲೆಕ್ಕಪತ್ರ ವಿವರ ಸಲ್ಲಿಸಲು ಸೂಚಿಸಿದಾಗ ಅದನ್ನು ಕಾರ್ಮಿಕ ಇನ್ಸ್‌ಪೆಕ್ಟರ್‌ ಅವರಿಗೆ ಅಂತರ್ಜಾಲದ ಮೂಲಕವೇ ಸಲ್ಲಿಸಬಹುದು. ಒಂದೊಮ್ಮೆ ಇದನ್ನು ಕಂಪೆನಿ ಕಳುಹಿಸದಿದ್ದರೂ ಅದಕ್ಕಾಡಿ ದಂಡ ವಿಧಿಸುವ ಅಧಿಕಾರ ಇರುವುದಿಲ್ಲ.
ಸಿಪಿಎಂ, ಸಿಪಿಐ ವಿರೋಧ
ದೇಶದಲ್ಲಿರುವ ಶೇ ೭೦ಕ್ಕೂ ಹೆಚ್ಚು ಕಂಪೆನಿಗಳಿಗೆ ಇದರಿಂದ ಅನುಕೂಲವಾಗಿ ಶೇ ೮೦ರಷ್ಟು ಕಾರ್ಮಿಕರು ಈಗಿರುವ ಭದ್ರತೆಯನ್ನು ಕಳೆದುಕೊಳ್ಳಲಿದ್ದಾರೆ ಎಂಬುದು ಸಿಪಿಎಂ, ಸಿಪಿಐ ಮತ್ತಿತರ ಪಕ್ಷಗಳ ಆಕ್ಷೇಪವಾಗಿದೆ. ಸಿಪಿಎಂ ನಾಯಕ ಸೀತಾರಾಂ ಯೆಚೂರಿ ಅವರು ಈ ಪ್ರಸ್ತಾವವನ್ನು ಮತಕ್ಕೆ ಹಾಕಬೇಕು ಎಂದು ಒತ್ತಾಯಿಸಿದರು. ಆದರೆ ಕಾಂಗ್ರೆಸ್‌ ಪಕ್ಷವು ತಿದ್ದುಪಡಿಯನ್ನು ಬೆಂಬಲಿಸಿದ್ದರಿಂದ ಅವುಗಳ ವಿರೋಧಕ್ಕೆ ಬಲ ಬರಲಿಲ್ಲ. ಸಿಪಿಎಂ, ಜೆಡಿಯು ಮತ್ತು ಎಸ್‌ಪಿ ಸದಸ್ಯರು ಇದನ್ನು ವಿರೋಧಿಸಿ ಸದನದಿಂದ ಹೊರನಡೆದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.