ನವದೆಹಲಿ (ಪಿಟಿಐ): ಭಟ್ಟಂಗಿ ಸಂಸ್ಕೃತಿ ವಿರುದ್ಧ ಕಿಡಿಕಾರಿರುವ ಪ್ರಧಾನಿ ನರೇಂದ್ರ ಮೋದಿ, ‘ಬಿಜೆಪಿ ಸಂಸದರು ನನ್ನ ಕಾಲಿಗೆರಗಿ ನಮಸ್ಕರಿಸುವುದನ್ನು ಬಿಡಬೇಕು’ ಎಂದು ಹೇಳಿದರು. ತಮ್ಮದು ಮಾತ್ರವಲ್ಲ, ಯಾರದೇ ಕಾಲಿಗೂ ಎರಗಬಾರದು ಎಂದು ಅವರು ಹೇಳಿದರು.
ಸಂಸತ್ತಿನ ಸೆಂಟ್ರಲ್ ಹಾಲ್ನಲ್ಲಿ ಶುಕ್ರವಾರ ನಡೆದ ಬಿಜೆಪಿ ಸಂಸದೀಯ ಪಕ್ಷದ ಸಭೆಯಲ್ಲಿ ನೂತನ ಸಂಸದರಿಗೆ ಕಿವಿಮಾತು ಹೇಳಿದರು.
ಉತ್ತಮ ಸಂಸದೀಯ ಪಟುಗಳಾಗಿ ‘ಪ್ರಜಾಪ್ರಭುತ್ವದ ಮಂದಿರ’ದಲ್ಲಿ ತಮ್ಮ ಕೌಶಲವನ್ನು ಹೆಚ್ಚಿಸಿಕೊಳ್ಳಬೇಕು ಎಂದು ಮೋದಿ ಅವರು ಸಂಸದರಿಗೆ ಸಲಹೆ ಮಾಡಿರುವುದಾಗಿ ಮೂಲಗಳು ತಿಳಿಸಿವೆ.
ಗಾಂಧಿ ಕುಟುಂಬ ಮತ್ತು ಕೆಲ ಪ್ರಾಂತೀಯ ಪಕ್ಷಗಳ ಕುಟುಂಬದವರ ಸುತ್ತ ಭಟ್ಟಂಗಿಗಳೇ ಆವರಿಸಿಕೊಂಡಿದ್ದಾರೆ ಎಂದು ಈ ಹಿಂದೆ ಬಿಜೆಪಿ ಆರೋಪ ಮಾಡಿತ್ತು. ಆ ಕಾರಣಕ್ಕಾಗಿ ಈ ಆಚರಣೆ ನಿಲ್ಲಿಸುವಂತೆ ಪಕ್ಷದ ಸಂಸದರಿಗೆ ಮೋದಿ ಅವರು ಸಲಹೆ ಮಾಡಿದ್ದಾರೆ ಎನ್ನಲಾಗಿದೆ.