ನವದೆಹಲಿ (ಪಿಟಿಐ, ಐಎಎನ್ಎಸ್): ಜಮ್ಮು–ಕಾಶ್ಮೀರ ಹಾಗೂ ಜಾರ್ಖಂಡ್ ರಾಜ್ಯಗಳ ವಿಧಾನಸಭೆಗಳಿಗೆ ಮಂಗಳವಾರ ನಡೆದ ಮೊದಲ ಹಂತದ ಚುನಾವಣೆಯಲ್ಲಿ ಕ್ರಮವಾಗಿ ದಾಖಲೆಯ ಶೇ 71.28 ಮತ್ತು ಉತ್ತಮ ಎನ್ನಬಹುದಾದ ಶೇ 62ರಷ್ಟು ಶಾಂತಿಯುತ ಮತದಾನವಾಗಿದೆ.
ಜಮ್ಮು, ಕಾಶ್ಮೀರ ಹಾಗೂ ಲಡಾಖ್ ಪ್ರಾಂತ್ಯಗಳಲ್ಲಿ ಇದೇ ಮೊದಲ ಬಾರಿಗೆ ಅತ್ಯಧಿಕ ದಾಖಲೆ ಪ್ರಮಾಣದ ಮತದಾನ ನಡೆದಿದೆ. ಯಾವುದೇ ಹಿಂಸಾತ್ಮಕ ಘಟನೆ ನಡೆದ ವರದಿಯಾಗಿಲ್ಲ.
ಮತದಾರರು ಚಳಿಯನ್ನೂ ಲೆಕ್ಕಿಸದೆ, ಪ್ರತ್ಯೇಕತಾವಾದಿಗಳ ಚುನಾವಣೆ ಬಹಿಷ್ಕಾರ ಕರೆಯನ್ನು ತಿರಸ್ಕರಿಸಿ ಮತದಾನದಲ್ಲಿ ಪಾಲ್ಗೊಂಡಿದ್ದರು.
ಮತದಾನ ನಡೆದ ಏಳು ಜಿಲ್ಲೆಗಳ 15 ಕ್ಷೇತ್ರಗಳಲ್ಲಿ ಕಳೆದ (2008) ವಿಧಾನಸಭಾ ಚುನಾವಣೆಯಲ್ಲಿ ಶೇ 64.97ರಷ್ಟು ಮತ್ತು ಲೋಕಸಭಾ ಚುನಾವಣೆಯಲ್ಲಿ ಶೇ 52.63ರಷ್ಟು ಮತದಾನವಾಗಿತ್ತು. ರಾಜ್ಯದ ರಂಬಾನ್ನಲ್ಲಿ 121 ವರ್ಷದ ವೃದ್ಧೆ ಮತದಾನ ಮಾಡಿರುವುದು ವಿಶೇಷ.
ಜಾರ್ಖಂಡ್ನಲ್ಲಿ ಮಾವೊವಾದಿನಕ್ಸಲರ ಚುನಾವಣೆ ಬಹಿಷ್ಕಾರ ಕರೆಯನ್ನು ಧಿಕ್ಕರಿಸಿ ಮತದಾರರು ತಮ್ಮ ಮತಗಳನ್ನು ಚಲಾಯಿಸಿದರು. ಮತದಾನ ನಡೆದ 13 ಕ್ಷೇತ್ರಗಳಲ್ಲಿ ಕಳೆದ (2009) ವಿಧಾನಸಭೆ ಮತ್ತು ಲೋಕಸಭಾ ಚುನಾವಣೆಗಳಲ್ಲಿ ಶೇ 58ರಷ್ಟು ಮತದಾನವಾಗಿತ್ತು.
ಚುನಾವಣಾ ಆಯೋಗದ ಉಪ ಆಯುಕ್ತರಾದ ವಿನೋದ್ ಜುಟ್ಷಿ ಮತ್ತು ಉಮೇಶ್ ಸಿನ್ಹಾ ಅವರು ಕ್ರಮವಾಗಿ ಜಮ್ಮು–ಕಾಶ್ಮೀರ ಹಾಗೂ ಜಾರ್ಖಂಡ್ ಚುನಾವಣೆಗಳ ಕುರಿತು ಸುದ್ದಿಗಾರರಿಗೆ ಮಾಹಿತಿ ನೀಡಿದರು.