ಇಸ್ಲಾಮಾಬಾದ್ (ಐಎಎನ್ಎಸ್): ಕಾಶ್ಮೀರ ಪಾಕಿಸ್ತಾನದ ಅಂಗ ಎಂದು ಪಾಕಿಸ್ತಾನ್ ಪೀಪಲ್ಸ್ ಪಕ್ಷದ (ಪಿಪಿಪಿ) ಅಧ್ಯಕ್ಷ ಬಿಲಾವಲ್ ಭುಟ್ಟೊ ಹೇಳಿದ್ದಾರೆಂದು ‘ಜಿಯೊ ನ್ಯೂಸ್’ ವಾಹಿನಿ ವರದಿ ಮಾಡಿದೆ.
ಸಾವಿರಾರು ಜನರು ಭಾಗವಹಿಸಿದ್ದ ಕರಾಚಿಯ ಬಾಗ್–ಎ–ಜಿನ್ನಾ ಉದ್ಯಾನದಲ್ಲಿ ಶನಿವಾರ ನಡೆದ ರ್್ಯಾಲಿಯಲ್ಲಿ ಮಾತನಾಡಿದ ಅವರು, ‘ಕಾಶ್ಮೀರ ವಿವಾದವನ್ನು ಒತ್ತೆ ಇರಿಸಿ ಈ ವಿಷಯ ಕುರಿತು ಪಾಕ್ ಮತ್ತು ಭಾರತಗಳ ಮಾತುಕತೆಗೆ ನಾವು ಅವಕಾಶ ನೀಡುವುದಿಲ್ಲ. ಭುಟ್ಟೊ ಸಿದ್ಧಾಂತವನ್ನು ಇಡೀ ವಿಶ್ವ ಮಾನ್ಯ ಮಾಡಿರುವುದರಿಂದ ಭಾರತದ ಮಾಧ್ಯಮಗಳು ನನ್ನ ವಿರುದ್ಧ ಅಪಪ್ರಚಾರ ಮಾಡುತ್ತಿವೆ’ ಎಂದು ದೂರಿದ್ದಾರೆ.
ಭಾಷಣದಲ್ಲಿ ತಮ್ಮ ತಾಯಿ ಬೆನಜೀರ್ ಭುಟ್ಟೊ ಅವರನ್ನು ಸ್ಮರಿಸಿದ ಬಿಲಾವಲ್, ‘ದೇಶವನ್ನಾಳಿದ ಮೊದಲ ಮಹಿಳೆಯನ್ನು ಬರ್ಬರವಾಗಿ ಹತ್ಯೆ ಮಾಡಲಾಯಿತು. ಈ ಕೃತ್ಯ ಎಸಗಿದವರು ಶಸ್ತ್ರಗಳಿಂದ ನಮ್ಮನ್ನು ಮಣಿಸಬಹುದು ಎಂದುಕೊಂಡಿದ್ದಾರೆ. ಆದರೆ, ಭುಟ್ಟೊ ಕುಟುಂಬ ಇಂತಹದ್ದಕ್ಕೆಲ್ಲಾ ಹೆದರುವುದಿಲ್ಲ’ ಎಂದರು.
ಸೆಪ್ಟೆಂಬರ್ 20ರಂದು ಮುಲ್ತಾನ್ ಪ್ರಾಂತ್ಯದಲ್ಲಿ ನಡೆದ ರ್ಯಾಲಿಯಲ್ಲೂ ಕಾಶ್ಮೀರ ಪಾಕಿಸ್ತಾನದ ಅಂಗ ಎಂದಿದ್ದ ಬಿಲಾವಲ್, ‘ಒಂದಂಗುಲವೂ ಬಿಡದಂತೆ ಇಡೀ ಕಾಶ್ಮೀರವನ್ನು ಪಾಕ್ಗೆ ಸೇರಿಸುವೆ’ ಎಂದಿದ್ದರು.