ಬಾಲಿವುಡ್‌ನಲ್ಲಿ ‘ಆಯಿಷಾ’ ಸಿನಿಮಾ ನಿರ್ಮಾಣ ಮಾಡುವ ಮೂಲಕ ನಿರ್ಮಾಪಕಿಯಾಗಿ ಬಿ–ಟೌನ್‌ಗೆ ಎಂಟ್ರಿ ಪಡೆದ ನಟ ಅನಿಲ್ ಕಪೂರ್‌ ಅವರ ಪುತ್ರಿ ರಿಯಾ ಕಪೂರ್‌ ಈಗ ಕಿರುತೆರೆಯಲ್ಲೂ ಹಣ ಹೂಡಲು ಕಾತುರರಾಗಿದ್ದಾರೆ.
‘ನಾವು ನಮ್ಮ ಸಂಸ್ಥೆಯನ್ನು ವಿಸ್ತರಿಸುತ್ತಿದ್ದೇವೆ. ಅದಕ್ಕಾಗಿ ಕಿರುತೆರೆಗೂ ಪದಾರ್ಪಣೆ ಮಾಡುವ ಆಲೋಚನೆ ಇದೆ. ಆದರೆ ಕಿರುತೆರೆಗೆ ಎಂಟ್ರಿ ನೀಡಲು ಸಾಕಷ್ಟು ಸಮಯ ಹಾಗೂ ಶಕ್ತಿ ಬೇಕು’ ಎಂದು ಐಎಎನ್ಎಸ್‌ ಸುದ್ದಿ ಸಂಸ್ಥೆಗೆ ನೀಡಿರುವ ಸಂದರ್ಶನದಲ್ಲಿ ಹೇಳಿದ್ದಾರೆ.
‘ಯುಎಸ್‌ ಥ್ರಿಲ್ಲರ್‌ ‘24’ ಕಿರುತೆರೆ ಧಾರಾವಾಹಿಯನ್ನು ಹಿಂದಿಯಲ್ಲಿ ನನ್ನ ತಂದೆ ಅನಿಲ್ ಕಪೂರ್‌ ಅವರೇ ನಿರ್ಮಾಣ ಮಾಡಿ, ಅದರಲ್ಲಿ ಅಭಿನಯಿಸಿದ್ದರು. ‘24’ ಧಾರಾವಾಹಿ ನಿರ್ಮಾಣ ಮಾಡಲು ತುಂಬಾ ಸಮಯ ಬೇಕಾಗಿತ್ತು. ಅಲ್ಲದೆ ನಾವು ಕಿರುತೆರೆಯಲ್ಲಿ ಯಾವುದೇ ಕೆಲಸ ಪ್ರಾರಂಭಿಸಿದರೂ ಅದಕ್ಕೆ ಹೆಚ್ಚಿನ ಸಮಯ ನೀಡಬೇಕು. ಅದಕ್ಕಾಗಿ ಖಂಡಿತವಾಗಿಯೂ ಸ್ವಲ್ಪ ತಾಳ್ಮೆಯಿಂದ ಕಿರುತೆರೆಗೆ ಎಂಟ್ರಿ ಕೊಡುತ್ತೇನೆ’ ಎಂದಿದ್ದಾರೆ ರಿಯಾ.
‘ನಾನು ಮತ್ತು ಸೋನಂ ತುಂಬಾ ಆಪ್ತರು. ಅವರು ಸಾಕಷ್ಟು ರಿಸ್ಕ್‌ ತೆಗೆದುಕೊಂಡು ಈ ಚಿತ್ರದಲ್ಲಿ ಅಭಿನಯಿಸಿದ್ದಾರೆ. ಅವರು ಮಾಡುವ ಸಾಕಷ್ಟು ಕೆಲಸಗಳು ನನಗೆ ಇಷ್ಟವಾಗುತ್ತೆ. ಹಾಗೆಯೇ ಕೆಲವು ನನ್ನನ್ನು ಪ್ರೇರೇಪಿಸುವುದಿಲ್ಲ’ ಎಂದಿದ್ದಾರೆ ಅವರು.
‘ಖೂಬ್‌ಸೂರತ್’ ಸಿನಿಮಾಕ್ಕೆ ಒಳ್ಳೆಯ ಪ್ರಿತಿಕ್ರಿಯೆ ಸಿಕ್ಕಿದೆ. ಈ ರೀತಿ ಪ್ರತಿಕ್ರಿಯೆ ಸಿಗುತ್ತದೆ ಎಂದು ಊಹಿಸಿರಲಿಲ್ಲ. ಈಗ ಸಿಕ್ಕಿರುವ ಪ್ರತಿಕ್ರಿಯೆಯಿಂದ ನನಗೆ ತುಂಬಾ ಖುಷಿಯಾಗಿದೆ. ಇದರಿಂದ ಹೆಣ್ಣು ಮಕ್ಕಳೂ ಸಿನಿಮಾಗಳನ್ನು ನಿರ್ಮಾಣ ಮಾಡಬಹುದು ಎಂದು ಮತ್ತೆ ನಂಬಿಕೆ ಬಂದಿದೆ ಎನ್ನುವುದು ರಿಯಾ ಅಭಿಪ್ರಾಯ.
