ವಾಷಿಂಗ್ಟನ್(ಎಎಫ್ಪಿ): ಸಿರಿಯಾದ ಕೊಬಾನೆ ಪಟ್ಟಣದಲ್ಲಿ ಇಸ್ಲಾಮಿಕ್ ಸ್ಟೇಟ್ ಉಗ್ರಗಾಮಿಗಳ ವಿರುದ್ಧ ಹೋರಾಟ ನಡೆಸುತ್ತಿರುವ ಕುರ್ದ್ ಹೋರಾಟಗಾರರಿಗೆ ನೆರವಾಗುವ ಉದ್ದೇಶದಿಂದ ಅಮೆರಿಕ ವಿಮಾನದ ಮೂಲಕ ಶಸ್ತ್ರಾಸ್ತ್ರ ಮತ್ತು ಮದ್ದುಗುಂಡುಗಳನ್ನು ಸರಬರಾಜು ಮಾಡಿದೆ.
ಕೊಬಾನೆ ಪಟ್ಟಣದಲ್ಲಿ ಐಎಸ್ ಉಗ್ರರ ವಿರುದ್ಧ ಕುರ್ದ್ ಸಮುದಾಯ ಒಂದು ತಿಂಗಳಿಗೂ ಹೆಚ್ಚು ಸಮಯ ದಿಂದ ಹೋರಾಟ ನಡೆಸುತ್ತಿದೆ.ಶಸ್ತ್ರಾಸ್ತ್ರ ಪೂರೈಸಿದ ಅಮೆರಿಕ ವಿಮಾನಗಳಿಗೆ ಆಕಾಶ, ಭೂಮಿಯಲ್ಲಿ ಯಾವುದೇ ಪ್ರತಿರೋಧ ವ್ಯಕ್ತವಾಗಿಲ್ಲ. ಈ ವಿಮಾನಗಳ ಜತೆ ಇತರೆ ಯುದ್ಧ ವಿಮಾನಗಳು ಇರಲಿಲ್ಲ ಎಂದು ಅಮೆರಿಕದ ಹಿರಿಯ ಅಧಿಕಾರಿ ತಿಳಿದ್ದಾರೆ.
ಐಎಸ್ ಉಗ್ರರನ್ನು ಮಟ್ಟಹಾಕುವ ಉದ್ದೇಶದಿಂದಲೇ ಅಮೆರಿಕ ವಾಯು ಮಾರ್ಗದ ಮೂಲಕ ಕುರ್ದ್ ಹೋರಾಟಗಾರರಿಗೆ ನೆರವಾಗುತ್ತಿದೆ ಎಂದು ಅಮೆರಿಕದ ಸೆಂಟ್ರಲ್ ಕಮಾಂಡ್ ಹೇಳಿದೆ. ಐಎಸ್ ಉಗ್ರರ ವಿರುದ್ಧ ಕುರ್ದ್ ಹೋರಾಟಗಾರರು ನಡೆಸುತ್ತಿರುವ ಯುದ್ಧ ಉತ್ತಮ ಪ್ರಗತಿ ಕಾಣುತ್ತಿದೆ. ಆದರೆ ಕೊಬಾನೆ ಪಟ್ಟಣವನ್ನು ಐಎಸ್ ಉಗ್ರರಿಂದ ಬಿಡಿಸಿಕೊಳ್ಳುವುದು ಸದ್ಯಕ್ಕೆ ಸಾಧ್ಯವಿಲ್ಲ ಎಂದು ಅಮೆರಿಕದ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಈ ಮಧ್ಯೆ, ಕೊಬಾನೆಯಲ್ಲಿ ಹೋರಾಟ ನಡೆಸುತ್ತಿರುವ ಕುರ್ದ್ ಯೋಧರಿಗೆ ನೆರವು ನೀಡಲು ಇರಾಕ್ನ ಕುರ್ದ್ ಸಮುದಾಯದ ಜನರು ಸಿರಿಯಾಕ್ಕೆ ಹೋಗುವುದಕ್ಕೆ ಅಗತ್ಯ ನೆರವು ನೀಡುವುದಾಗಿ ಟರ್ಕಿ ಹೇಳಿದೆ.