ವ್ಯಾಟಿಕನ್‌ನ ಸೇಂಟ್‌ ಪೀಟರ್ಸ್‌ ಸ್ಕ್ವೇರ್‌ನಲ್ಲಿ ನಡೆದ ವಿಶೇಷ ಸಾಮೂಹಿಕ ಪ್ರಾರ್ಥನೆಯಲ್ಲಿ ಪೋಪ್‌ ಅವರು ಬೇರೆ ಬೇರೆ ದೇಶಗಳ ಒಟ್ಟು ಆರು ಮಂದಿಗೆ ಸಂತ ಪದವಿ ಪ್ರದಾನ ಮಾಡಿದರು. ಇವರಲ್ಲಿ ಇಬ್ಬರು ಭಾರತೀಯರು ಎನ್ನುವುದು ವಿಶೇಷ. ಈ ಮೂಲಕ ಸೀರೊ ಮಲಬಾರ್‌ ಕ್ಯಾಥೊಲಿಕ್‌ ಚರ್ಚ್‌ನ ಇತಿಹಾಸದಲ್ಲಿ ಸಂತ ಪದವಿ ಪಡೆದವರ ಸಂಖ್ಯೆ ಮೂರಕ್ಕೆ ಏರಿಕೆಯಾಗಿದೆ. 2008ರಲ್ಲಿ ಸಿಸ್ಟರ್‌ ಅಲ್ಫೊನ್ಸಾ ಅವರಿಗೆ ಸಂತ ಪದವಿ ನೀಡಲಾಗಿತ್ತು.
ಕೇರಳದಿಂದ ಆಗಮಿಸಿದ್ದ ಸಾವಿರಾರು ಕ್ಯಾಥೋಲಿಕರು ಭಾನುವಾರ ವ್ಯಾಟಿಕನ್‌ನ ಸೇಂಟ್‌ ಪೀಟರ್ಸ್‌ ಸ್ಕ್ವೇರ್‌ನಲ್ಲಿ ನಡೆದ ಈ ವಿಶೇಷ ಕ್ಷಣಕ್ಕೆ ಸಾಕ್ಷಿಯಾದರು. ಭಾನುವಾರ ಕೇರಳದ ವಿವಿಧೆಡೆ ಚರ್ಚ್‌ಗಳಲ್ಲಿ ಫಾದರ್‌ ಕುರಿಯಾಕೋಸ್‌ ಚಾವರ, ಸಿಸ್ಟರ್‌ ಯುಫ್ರೇಸಿಯಾ ಅವರ ಹೆಸರಿನಲ್ಲಿ ವಿಶೇಷ ಪ್ರಾರ್ಥನೆಗಳು ನಡೆದವು.
