ತ್ರಿಶೂರು, ಕೇರಳ (ಪಿಟಿಐ): ಪ್ರಸ್ತುತ 112 ವರ್ಷದ ಕುಂಜನ್ನಮ್‌ ಅಂತೋಣಿ ಭಾರತದ ಅತ್ಯಂತ ಹಿರಿಯ ಮಹಿಳೆ ಎಂದು ಲಿಮ್ಕಾ ದಾಖಲೆ ಹೇಳಿದೆ. ಅಮಲಾ ವೈದ್ಯಕೀಯ ಕಾಲೇಜು ಆಸ್ಪತ್ರೆಯಲ್ಲಿ ವಯೋ ಸಹಜ ಅನಾರೋಗ್ಯಗಳಿಗೆ ಚಿಕಿತ್ಸೆ ಪಡೆಯುತ್ತಿರುವ ಕುಂಜನ್ನಮ್‌ ಅವರನ್ನು ಲಿಮ್ಕಾ ದಾಖಲೆಯ ಹಿರಿಯ ಅಧಿಕಾರಿ ಪಿ.ಪಿ. ಪೀಟರ್‌ ಅವರು ಭೇಟಿಯಾಗಿ ಭಾರತದ ಅತ್ಯಂತ ಹಿರಿಯ ಮಹಿಳೆ ಎಂಬ ಪ್ರಮಾಣಪತ್ರವನ್ನು ನೀಡಿದರು.
ತ್ರಿಶೂರು ಸಮೀಪದ ಎರನಮ್ಮಲೂರಿನ ‘ಅವರ್‌ ಲೇಡಿ ಆಫ್ ರೋಸರಿ ಚರ್ಚ್‌’ನಲ್ಲಿ ಕುಂಜನ್ನಮ್‌ ಅವರಿಗೆ 1903ರ ಮೇ 20ರಂದು ನಾಮಕರಣ ಮಾಡಿರುವ ದಾಖಲೆ ತ್ರಿಶೂರು ಕ್ಯಾಥಲಿಕ್‌ ಆರ್ಚ್‌ಡಯೊಸಿಸ್‌ನಲ್ಲಿ ದೊರೆತಿದೆ. ಈ ಆಧಾರದಲ್ಲಿ ಅವರ ವಯಸ್ಸನ್ನು ದೃಢಪಡಿಸಲಾಗಿದೆ.
ಲಿಮ್ಕಾ ದಾಖಲೆ ಪುಸ್ತಕ ಆರಂಭವಾದ 25 ವರ್ಷಗಳಿಂದ ಇದೇ ಮೊದಲ ಬಾರಿಗೆ ಭಾರತದ ಅತ್ಯಂತ ವಯಸ್ಕ ಮಹಿಳೆಯೊಬ್ಬರು ದಾಖಲೆ ಪುಸ್ತಕ ಸೇರಿದ್ದಾರೆ ಎಂದು ಪೀಟರ್‌ ತಿಳಿಸಿದ್ದಾರೆ. ವಳಪಿಳ್ಳಿ ಅಂತೋಣಿ ಮತ್ತು ಅಚ್ಚುಣ್ಣಿ ಅವರ ಪುತ್ರಿಯಾಗಿರುವ ಕುಂಜನ್ನಮ್‌ ಅವಿವಾಹಿತೆ. ಸದ್ಯ ಸೋದರ ಸಂಬಂಧಿಗಳಾದ ಜೋಸ್‌ ಮತ್ತು ಅವರ ಮಕ್ಕಳು ಕುಂಜನ್ನಮ್‌ ಅವರನ್ನು ನೋಡಿಕೊಳ್ಳುತ್ತಿದ್ದಾರೆ.
