ಸಾರ್ವಜನಿಕ ಗ್ರಂಥಾಲಯಗಳಿಗೆ ಯಾವುದೋ ಒಂದು ಸಮಿತಿ ಆಯ್ಕೆ ಮಾಡಿದ ಪುಸ್ತಕಗಳನ್ನು ಸರ್ಕಾರ ಸಗಟಾಗಿ ಕೊಂಡುಕೊಳ್ಳುವುದು, ಒಂದಲ್ಲ ಒಂದು ರೀತಿಯ ಅಹಿತಾಸಕ್ತಿಗೆ ಎಡೆಗೊಡುತ್ತದೆ. ಓದುಗರೇ ಪುಸ್ತಕಗಳನ್ನು ‘ಚುನಾಯಿಸುವುದು’ ಉತ್ತಮ.
ನಾಗರಿಕನೊಬ್ಬ ತನಗೆ ಇಷ್ಟವಾದ ಪುಸ್ತಕವನ್ನು ಕೊಂಡು, ಓದಿದ ಮೇಲೆ ಆ ಪುಸ್ತಕವನ್ನು ಆರು ತಿಂಗಳೊಳಗೆ ತನ್ನ ಊರಿನ ಸರ್ಕಾರಿ ಗ್ರಂಥಾಲಯಕ್ಕೆ ಪುಸ್ತಕದ ಮೂರನೆ ಎರಡರಷ್ಟು ಬೆಲೆಗೆ ಮಾರಬಹುದಾದ ಪದ್ಧತಿಯನ್ನು ಜಾರಿಗೆ ತರಬೇಕು. ಹೀಗಾದರೆ ₨300ರ ಮುಖಬೆಲೆಯ ಪುಸ್ತಕಕ್ಕೆ ಓದುಗ ಕೇವಲ 100 ರೂಪಾಯಿಯನ್ನು ಮತ್ತು ಸರ್ಕಾರ 200 ರೂಪಾಯಿಯನ್ನು ಕೊಡಬೇಕಾಗುತ್ತದೆ.
ಇದರಿಂದ ಓದುಗರು ಹೆಚ್ಚು ಪುಸ್ತಕಗಳನ್ನು ಕೊಂಡು ಓದಲು ಉತ್ತೇಜನ ದೊರೆಯುತ್ತದೆ, ಸರ್ಕಾರಕ್ಕೆ ಹಣ ಉಳಿಯುತ್ತದೆ ಮತ್ತು ಒಳ್ಳೆಯ ಪುಸ್ತಕಗಳು ಹೆಚ್ಚಿನ ಓದಿಗೆ ಒಳಗಾಗುತ್ತವೆ.