ಬರ್ಲಿನ್ (ಎಎಫ್ಪಿ): ಫ್ರೆಂಚ್ ಆಲ್ಪ್ಸ್ ಪರ್ವತಕ್ಕೆ ಅಪ್ಪಳಿಸಿ, 150 ಜನರನ್ನು ಬಲಿ ತೆಗೆದುಕೊಂಡ ಜರ್ಮನಿಯ ಏರ್ಬಸ್ ಎ320 ವಿಮಾನದ ಸಹ ಪೈಲಟ್ ಆ್ಯಂಡ್ರಿಯಾಸ್ ಲುಬಿಟ್ಜ್ (28) ಮಾನಸಿಕ ಖಿನ್ನತೆಗೆ ಒಳಗಾಗಿದ್ದ ಎಂದು ಮಾಧ್ಯಮ ವರದಿಯೊಂದು ಶುಕ್ರವಾರ ತಿಳಿಸಿದೆ.
ಆರು ವರ್ಷಗಳ ಹಿಂದೆ (2009ರಲ್ಲಿ) ಮಾನಸಿಕ ಖಿನ್ನತೆಗೆ ಒಳಗಾಗಿದ್ದ ಲುಬಿಟ್ಜ್, ಆನಂತರ ನಿರಂತರವಾಗಿ ವೈದ್ಯಕೀಯ ತಪಾಸಣೆ ಮಾಡಿಸಿಕೊಳ್ಳುತ್ತಿದ್ದ. ಈಗಲೂ ಆತ ವೈದ್ಯರ ನೆರವು ಪಡೆಯುತ್ತಿದ್ದ. ಇದಕ್ಕೆ ಪೂರಕ ದಾಖಲುಪತ್ರಗಳು ವಿಮಾನ ನಿಯಂತ್ರಕ ಕಚೇರಿಯಿಂದ ಲಭ್ಯವಾಗಿದೆ. ಇಂತಹ ಪೈಲಟ್ಗೆ ಹೇಗೆ ವಿಮಾನ ಚಾಲನೆ ಮಾಡಲು ಅನುಮತಿ ನೀಡಲಾಯಿತು ಎಂದು ಜರ್ಮನ್ ದೈನಿಕ ‘ಬೈಲ್ಡ್’ ಪ್ರಶ್ನಿಸಿದೆ.
ದಾಖಲೆ ಪರಿಶೀಲಿಸಿದ ತನಿಖಾ ಮೂಲಗಳು ತಿಳಿಸುವಂತೆ, ಲುಬಿಟ್ಜ್ ಮತ್ತು ಆತನ ಗೆಳತಿ ನಡುವಿನ ಸಂಬಂಧದಲ್ಲಿ ಬಿಕ್ಕಟ್ಟು ಉಂಟಾದ ಕಾರಣ ಸಹಪೈಲಟ್ ಮಾನಸಿಕ ಅಸ್ವಸ್ಥತೆಗೆ ಒಳಗಾಗಿದ್ದ ಎನ್ನಲಾಗಿದೆ. ‘ಲುಫ್ತಾನ್ಸಾ’ದ ಸಿಇಒ ಕಾರ್ಸ್ಟನ್ ಸ್ಪಾರ್ಹ್ ಹೇಳುವಂತೆ, 2008ರಲ್ಲಿ ಕೆಲ ಸಮಯ ಲುಬಿಟ್ಜ್ನನ್ನು ಪೈಲಟ್ ತರಬೇತಿಯಿಂದ ಅಮಾನತು ಮಾಡಲಾಗಿತ್ತು.
2013ರಲ್ಲಿ ಏರ್ಬಸ್ ಎ320 ವಿಮಾನ ಚಾಲನೆಗೆ ಅರ್ಹತೆ ಪಡೆಯುವ ಮುನ್ನ ಕೆಲ ಕಾಲ ಅಮಾನತಿನಲ್ಲಿದ್ದ ಎಂದು ತಿಳಿಸಿದ್ದಾರೆ. ಇಂತಹ ಘಟನೆಗಳು ಲುಬಿಟ್ಜ್ ಮೇಲೆ ಪರಿಣಾಮ ಬೀರಿದ್ದ ಕಾರಣ ಖಿನ್ನತೆಗೆ ಒಳಗಾಗಿದ್ದ. ಆನಂತರ ತನ್ನ ಮಾಂಟಬಾರ್ನಲ್ಲಿ ಪೋಷಕರೊಂದಿಗೆ ವಾಸವಿದ್ದ ಎಂದು ಪತ್ರಿಕೆ ಹೇಳಿದೆ.
ಈ ಮಧ್ಯೆ, ಅಪಘಾತಕ್ಕೀಡಾದ ವಿಮಾನದ ಸಹಪೈಲಟ್ ತನಗೆ ಗಂಭೀರ ಮಾನಸಿಕ ಅಸ್ವಸ್ಥತೆ ಇರುವುದನ್ನು ಮುಚ್ಚಿಟ್ಟಿದ್ದ ಎಂದು ಪ್ರಾಸಿಕ್ಯೂಟರ್ಗಳು ತಿಳಿಸಿದ್ದಾರೆ. ತನಿಖಾಧಿಕಾರಿಗಳು ಲುಬಿಟ್ಜ್ ತನ್ನ ಗೆಳತಿಯೊಂದಿಗೆ ವಾಸಿಸಿದ್ದ ಅಪಾರ್ಟ್ಮೆಂಟ್ ಮತ್ತು ಪೋಷಕರ ಮನೆಯಲ್ಲಿ ಶೋಧ ನಡೆಸಿ ಕೆಲವು ದಾಖಲೆಗಳನ್ನು ವಶಪಡಿಸಿಕೊಂಡಿದ್ದಾರೆ. ವೈದ್ಯಕೀಯ ಪ್ರಮಾಣಪತ್ರಗಳನ್ನು ಪರಿಶೀಲಿಸಲಾಗಿದೆ. ಆದರೆ ಗಂಭೀರ ಅಪರಾಧಗಳು ಕಂಡುಬಂದಿಲ್ಲ ಎಂದು ಅವರು ಹೇಳಿದ್ದಾರೆ.
ವಿಮಾನದ ಕಪ್ಪು ಪೆಟ್ಟಿಗೆಯ ಧ್ವನಿ ದಾಖಲೆ ಸಾಧನದಲ್ಲಿರುವ ಮಾಹಿತಿಯ ಪ್ರಕಾರ, ಕಾಕ್ಪಿಟ್ ಹೊರಗಿದ್ದ ಮುಖ್ಯ ಪೈಲಟ್ನನ್ನು ಸಹಪೈಲಟ್ ಒಳಗೆ ಬಿಡದೆ ಬಾಗಿಲು ಮುಚ್ಚಿದ್ದು ಮತ್ತು ಉದ್ದೇಶಪೂರ್ವಕ ಪತನ ಮಾಡಿದ್ದು ಒಂದು ಆತ್ಮಹತ್ಯೆ ಕೃತ್ಯ ಮತ್ತು ಸಾಮೂಹಿಕ ನರಹತ್ಯೆ ಎಂದು ಟೀಕಿಸಿದ್ದಾರೆ. ಫ್ರಾನ್ಸ್ ಪ್ರಧಾನಿ ಮ್ಯಾನ್ಯುಯೆಲ್ ವಾಲ್ಸ್ ಅವರು ಈ ಕೃತ್ಯವನ್ನು ಅಪರಾಧ, ಆತ್ಮಹತ್ಯೆ, ಹುಚ್ಚಿನ ಕ್ರಿಯೆ ಎಂದಿದ್ದಾರೆ.
ಹೊಸ ಸುರಕ್ಷತಾ ನಿಯಮಕ್ಕೆ ಅಸ್ತು
ಜರ್ಮನಿ ವಿಮಾನಯಾನ ಸಂಸ್ಥೆಯು ವಿಮಾನ ಹಾರಾಟದ ಎಲ್ಲ ಅವಧಿಯಲ್ಲೂ ಕಾಕ್ಪಿಟ್ನಲ್ಲಿ ಇಬ್ಬರು ಸಿಬ್ಬಂದಿ ಇರಬೇಕೆಂಬ ಹೊಸ ಸುರಕ್ಷತಾ ನಿಯಮವನ್ನು ಜಾರಿಗೊಳಿಸಲು ಒಪ್ಪಿದೆ ಎಂದು ವಿಮಾನಯಾನ ಸಂಘ ಬಿಡಿಎಲ್ ಶುಕ್ರವಾರ ತಿಳಿಸಿದೆ.
ಏರ್ಬಸ್ ಎ320 ಜರ್ಮನ್ವಿಂಗ್ಸ್ ವಿಮಾನದ ಪೈಲಟ್ನ್ನು ಒಳಗೆ ಬಿಡದೆ ಸಹಪೈಲಟ್ ಅಪಘಾತಕ್ಕೆ ಕಾರಣವಾದ ಘಟನೆ ಕಾರಣ ಸರ್ಕಾರ ಈ ನಿರ್ಧಾರ ಕೈಗೊಂಡಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.