ಗೋಕಾಕ: ಮಾರ್ಕಂಡೇಯ ನದಿ ಹಿನ್ನೀರು ಹಾಗೂ ಬೆಳಗಾವಿ ತಾಲ್ಲೂಕಿನಾದ್ಯಂತ ಕಳೆದೆರಡು ದಿನಗಳಿಂದ ಸುರಿಯುತ್ತಿರುವ ಧಾರಾಕಾರ ಮಳೆಯಿಂದಾಗಿ ತಾಲ್ಲೂಕಿನ ಗೊಡಚಿನಮಲ್ಕಿ ಜಲಪಾತ ಮೈದುಂಬಿ ಹರಿಯುತ್ತಿದ್ದು ಪ್ರವಾಸಿಗರನ್ನು ಆಕರ್ಷಿಸುತ್ತಿದೆ.
ಜಲಪಾತವನ್ನು ವಿಕ್ಷೀಸಲು ಬರುವ ಪ್ರವಾಸಿಗರು ಗೋಕಾಕ ನಗರದಿಂದ ಸುಮಾರು 11 ಕಿ.ಮೀ., ಗೋಕಾಕ–ರೋಡ್‌ ರೈಲು ನಿಲ್ದಾಣದಿಂದ ಸುಮಾರು 5 ಕಿ. ಮೀ. ದೂರ ಕ್ರಮಿಸಬೇಕು. ಎರಡು ಕಡೆಯಿಂದಲೂ ಬಸ್‌ ಸಂಚಾರ ವ್ಯವಸ್ಥೆ ಇದೆ.
ನಗರದಿಂದ ಮೇಲ್ಮಟ್ಟಿ ಗ್ರಾಮದ ಮುಖಾಂತರ ಪಾಶ್ಚಾಪುರಕ್ಕೆ ತೆರಳುವ ಎಲ್ಲ ಬಸ್‌ ಮತ್ತು ಮ್ಯಾಕ್ಸಿಕ್ಯಾಬ್‌ಗಳು ಗೊಡಚಿನಮಲ್ಕಿ ಜಲಪಾತಕ್ಕೆ ತೆರಳುವ ಮಾರ್ಗದಲ್ಲಿ ನಿಲುಗಡೆ ಹೊಂದಿವೆ. ಈ ನಿಲುಗಡೆಯಿಂದ ಸುಮಾರು ಎರಡು ಕಿ.ಮೀ. ದೂರವನ್ನು ಕಾಲ್ನಡಿಗೆ ಅಥವಾ ಸ್ವಂತ ವಾಹನವಿದ್ದರೆ ಜಲಪಾತದ ಸನಿಹವೇ ತಲುಪಬಹುದು.
ಇನ್ನು ಗೋಕಾಕ–ರೋಡ್‌ ರೈಲ್ವೆ ನಿಲ್ದಾಣದಿಂದ ಗೊಡಚಿನಮಲ್ಕಿ ತಲುಪ ಬಯಸುವವರು ಮರಡೀಮಠ–ಕ್ರಾಸ್‌ ನಿಂದ ದಕ್ಷಿಣ ದಿಕ್ಕಿನತ್ತ ಮೇಲ್ಮಟ್ಟಿ ಮಾರ್ಗವಾಗಿ ಸುಮಾರು 5 ಕಿ.ಮೀ. ದೂರವನ್ನು ಕ್ರಮಿಸಿದರೆ ಜಲಪಾತವನ್ನು ತಲುಪಬಹುದು.
ಇಲ್ಲಿ ಯಾವುದೇ ವ್ಯವಸ್ಥಿತ ಹೋಟೆಲ್‌ ಅಥವಾ ಅಂಗಡಿಗಳಿಲ್ಲದಿರುವುದರಿಂದ ಬರುವ ಪ್ರವಾಸಿಗರು ಮನೆಯಿಂದಲೇ ತಿಂಡಿ–ತಿನಿಸು ತೆಗೆದುಕೊಂಡು ಬಂದರೆ ಒಳ್ಳೆಯದು. ಇದಕ್ಕಾಗಿ ಸ್ವಯಂ ತಯಾರಿ ಮಾಡಿಕೊಂಡು ಬಂದರೆ ಮಾತ್ರ ಇದೊಂದು ಕಣ್ಣಿಗೆ ರಸದೌತಣ ನೀಡುವ ಪ್ರವಾಸಿ ತಾಣ ಎನ್ನುವುದರಲ್ಲಿ ಎರಡು ಮಾತಿಲ್ಲ.
