ಪಣಜಿ: ಕರ್ನಾಟಕದ ವಾರ್ತಾ ಸಚಿವ ರೋಷನ್ ಬೇಗ್ ಅವರು ಶನಿವಾರ ಸಂಜೆ ಇಲ್ಲಿನ ಐನಾಕ್ಸ್ ಚಿತ್ರಮಂದಿರ ಸಂಕಿರ್ಣಕ್ಕೆ ಭೇಟಿ 45 ನೇ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ ವ್ಯವಸ್ಥೆಗಳನ್ನು ಪರಿಶೀಲಿಸಿದರು.
ಜನವರಿ 4ರಿಂದ ಬೆಂಗಳೂರಿನಲ್ಲಿ ಆರಂಭವಾಗಲಿರುವ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ ಸಿದ್ಧತೆ ಭಾಗವಾಗಿ ಗೋವಾ ಚಿತ್ರೋತ್ಸವದ ನಿರ್ದೇಶಕ ಶಂಕರ್ ಮೋಹನ್ ಅವರೊಂದಿಗೆ ಅರ್ಧ ತಾಸು ಕಾಲ ಮಾತುಕತೆ ನಡೆಸಿದರು. ಗೋವಾ ಚಿತ್ರೋತ್ಸವದ ಮಾದರಿಯಲ್ಲಿ ನಗರದಲ್ಲೂ ಚಿತ್ರೋತ್ಸವ ನಡೆಸುವ ಉದ್ದೇಶ ತಮ್ಮ ಸರ್ಕಾರಕ್ಕೆ ಇದೆ. ಅದಕ್ಕಾಗಿ ದೇವನಹಳ್ಳಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಬಳಿ ಚಿತ್ರೋತ್ಸವ ಕಾಂಪ್ಲೆಕ್ಸ್ ನಿರ್ಮಿಸುವ ಕುರಿತು ಸರ್ಕಾರ ಚಿಂತನೆ ನಡೆಸಿದೆ ಎಂದು ಅವರು ತಿಳಿಸಿದರು.