ನವದೆಹಲಿ(ಪಿಟಿಐ): ಜಾಗತಿಕ ಮಟ್ಟದಲ್ಲಿ ಚಿನ್ನ ಧಾರಣೆ ಇಳಿಕೆ ಆಗುತ್ತಿರುವುದು ಮತ್ತು ಹಬ್ಬದ ಸಂದರ್ಭದಲ್ಲಿನ ಬೇಡಿಕೆಯಿಂದಾಗಿ ದೇಶದ ಚಿನ್ನ ಆಮದು ಐದು ಪಟ್ಟು ಹೆಚ್ಚಿದೆ. ಸೆಪ್ಟೆಂಬರ್‌ನಲ್ಲಿ ಚಿನ್ನದ ಆಮದು ಪ್ರಮಾಣ 95 ಟನ್‌ಗಳಿಗೆ ಏರಿಕೆ ಆಗಿದೆ ಎಂದು ಅಖಿಲ ಭಾರತ ಚಿನ್ನಾಭರಣ ವರ್ತಕರ ಒಕ್ಕೂಟದ ನಿರ್ದೇಶಕ ಬಚ್ಚರಾಜ್‌ ಬಮಲ್‌ವಾಲಾ ಹೇಳಿದ್ದಾರೆ.
ಕಳೆದ ವರ್ಷ ಇದೇ ಅವಧಿಯಲ್ಲಿ ಚಿನ್ನ ಆಮದು 20 ಟನ್‌ಗಳಷ್ಟಿತ್ತು. ಸರ್ಕಾರ ಚಾಲ್ತಿ ಖಾತೆ ಕೊರತೆ ನಿಯಂತ್ರಿಸುವ ಸಲುವಾಗಿ ಕೆಲವು ನಿರ್ಬಂಧ ವಿಧಿಸಿದ್ದ ರಿಂದ ಚಿನ್ನದ ಆಮದು ತಗ್ಗಿತ್ತು. ಇದರಿಂದ ಹಬ್ಬದ ಸಂದರ್ಭದಲ್ಲಿ ಕೊರತೆ ಎದುರಿಸು ವಂತಾಯಿತು ಎಂದು ಅವರು ಸುದ್ದಿಗಾರರಿಗೆ ಮಾಹಿತಿ ನೀಡಿದ್ದಾರೆ.
ಸೆಪ್ಟೆಂಬರ್‌ನಲ್ಲಿ 2.28 ಕೋಟಿ ಮೌಲ್ಯದ ಚಿನ್ನ ಆಮದು ಮಾಡಿಕೊಳ್ಳ ಲಾಗಿದೆ ಎಂದು ಸರ್ಕಾರ ಮಾಹಿತಿ ನೀಡಿದೆ. ಸೆಪ್ಟೆಂಬರ್‌ನಲ್ಲಿ ಸಾಕಷ್ಟು ಪ್ರಮಾಣದ ಚಿನ್ನ ಸಂಗ್ರಹ ಇದ್ದಿದ್ದರಿಂದ ಕಳವು ಪ್ರಮಾಣವೂ ತಗ್ಗಿದೆ ಎಂದು ಬಮಲ್‌ವಾಲಾ ಹೇಳಿದ್ದಾರೆ.
ಹಬ್ಬದಲ್ಲಿ ಮಾರಾಟ ಮಾಡಲು ಆಮದಾಗಿರುವ ಚಿನ್ನದಿಂದ ವರ್ತಕರು ಈಗಾಗಲೇ ಚಿನ್ನಾಭರಣ ತಯಾರಿಸಿದ್ದಾರೆ. ಅಕ್ಟೋಬರ್ ಮತ್ತು ನವೆಂಬರ್‌ನಲ್ಲಿ ಹೆಚ್ಚಿನ ಚಿನ್ನಾಭರಣ ಖರೀದಿ ನಡೆಯಲಿದೆ. ಈ ಅವಧಿಯಲ್ಲಿ ವರ್ತಕರು ಮಾರಾಟ ವಹಿವಾಟಿನ ಗಳಿಕೆಯಿಂದಲೇ ಹೆಚ್ಚಿನ ಚಿನ್ನ ಖರೀದಿ ಸುತ್ತಾರೆ. ಹೀಗಾಗಿ ಅಕ್ಟೋಬರ್– ನವೆಂಬರ್‌ ಅವಧಿಯಲ್ಲಿ 150 ಟನ್‌ ಚಿನ್ನ ಆಮದು ನಿರೀಕ್ಷಿಸಲಾಗಿದೆ.
