ಮುಂಬೈ/ನವದೆಹಲಿ (ಪಿಟಿಐ): ಮುಂಬೈ ಚಿನಿವಾರ ಪೇಟೆಯಲ್ಲಿ ಕಳೆದ ನಾಲ್ಕು ವಹಿವಾಟು ಅವಧಿಯಲ್ಲಿ ಇಳಿಮುಖವಾಗಿದ್ದ ಬಂಗಾರದ ಧಾರಣೆ ಶನಿವಾರ ಚೇತರಿಕೆ ಹಾದಿಗೆ ಮರಳಿತು.
10ಗ್ರಾಂಗೆ ₹450ರಷ್ಟು ಏರಿಕೆಯಾಗಿ, ₹26,230ರಂತೆ ವಹಿವಾಟು ನಡೆಸಿತು. ಗುರುವಾರ ₹10 ಗ್ರಾಂಗೆ ₹220
ರಷ್ಟು ಕರಗಿ, ₹25,780ಕ್ಕೆ ಇಳಿಕೆಯಾಗಿತ್ತು. ಈ ಮೂಲಕ ಒಂದೂವರೆ ತಿಂಗಳ ಕನಿಷ್ಠ ಮಟ್ಟಕ್ಕೆ ತಲುಪಿತ್ತು.
ಹಬ್ಬದ ದಿನಗಳು ಹತ್ತಿರದಲ್ಲೇ ಇರುವುದರಿಂದ ದೇಶದ ಚಿನ್ನ ಸಂಗ್ರಹಕಾರರು ಮತ್ತು ಚಿನ್ನಾಭರಣ ಮಾರಾಟಗಾರರು ಹೆಚ್ಚಿನ ಖರೀದಿ ನಡೆಸಿದರು. ಇದರಿಂದ ಚಿನ್ನದ ಬೆಲೆ ಮತ್ತೆ ₹26 ಸಾವಿರದ ಗಡಿ ದಾಟಿತು ಎಂದು ವರ್ತಕರು ಹೇಳಿದ್ದಾರೆ.
ಬೆಳ್ಳಿ ಸಹ ಕೆ.ಜಿಗೆ ₹1,145ರಷ್ಟು ಭಾರಿ ಏರಿಕೆ ಕಂಡು, ₹36,070ರಂತೆ ಮಾರಾಟವಾಯಿತು.
ಮುಂಬೈ ಧಾರಣೆ: 10ಗ್ರಾಂ ಸ್ಟ್ಯಾಂಡರ್ಡ್‌ ಚಿನ್ನ ₹26,230ರಂತೆ, ಅಪರಂಜಿ ಚಿನ್ನ ₹26,380ರಂತೆ, ಶುದ್ಧ ಬೆಳ್ಳಿ ಕೆ.ಜಿಗೆ ₹36,070ರಂತೆ ವಹಿವಾಟು ನಡೆಸಿತು.
ಜಾಗತಿಕ ಮಟ್ಟದಲ್ಲಿ, ಡಿಸೆಂಬರ್‌ನಲ್ಲಿ ಪೂರೈಕೆಯಾಗುವ ಬಂಗಾರದ ಧಾರಣೆ 22.90 ಡಾಲರ್‌ಗಳಷ್ಟು ಏರಿಕೆಯಾಗಿ, ಒಂದು ಔನ್ಸ್‌ಗೆ 1,137 ಡಾಲರ್‌ಗಳಂತೆ ವಹಿವಾಟು ನಡೆಸಿತು.
ದೆಹಲಿಯಲ್ಲಿ ₹660ರಷ್ಟು ಜಿಗಿತ: ದೆಹಲಿಯಲ್ಲಿ ಚಿನ್ನದ ಧಾರಣೆ ಶನಿವಾರ ₹660ರಷ್ಟು ಭಾರಿ ಏರಿಕೆ ಕಂಡುಕೊಂಡು, 10ಗ್ರಾಂಗೆ ₹26,810ರಂತೆ ಮಾರಾಟವಾಯಿತು.
ಬೆಳ್ಳಿ ಸಹ ₹1,20ರಷ್ಟು ಏರಿಕೆಯಾಗಿ ಕೆ.ಜಿಗೆ ₹35,800ರಂತೆ ವಹಿವಾಟು ನಡೆಸಿತು.
ದೆಹಲಿ ಧಾರಣೆ: 10ಗ್ರಾಂ ಸ್ಟ್ಯಾಂಡರ್ಡ್‌ ಚಿನ್ನ ₹26,660, ಅಪರಂಜಿ ಚಿನ್ನ ₹26,810, ಶುದ್ಧ ಬೆಳ್ಳಿ ಕೆ.ಜಿಗೆ ₹35,800ರಂತೆ ಮಾರಾಟವಾಯಿತು.
