ನವದೆಹಲಿ (ಪಿಟಿಐ): ಜಾರ್ಖಂಡ್ ಮತ್ತು ಜಮ್ಮು ಕಾಶ್ಮೀರದ ಬಹು ಹಂತಗಳ ಚುನಾವಣೆ ಶನಿವಾರ ಮುಕ್ತಾಯಗೊಂಡಿತು. 81 ಸದಸ್ಯ ಬಲದ ಜಾರ್ಖಂಡ್ನಲ್ಲಿ ಬಿಜೆಪಿಗೆ ಬಹುಮತ ದೊರೆಯಲಿದೆ; ಆದರೆ ಜಮ್ಮು ಕಾಶ್ಮೀರದಲ್ಲಿ ಅತಂತ್ರ ಸ್ಥಿತಿ ನಿರ್ಮಾಣವಾಗುವ ಸಾಧ್ಯತೆಗಳು ಇವೆ ಎಂದು ಮತಗಟ್ಟೆ ಸಮೀಕ್ಷೆಗಳು ಅಂದಾಜಿಸಿವೆ.
ಜಮ್ಮು ಕಾಶ್ಮೀರದಲ್ಲಿ ಮುಫ್ತಿ ಮಹಮ್ಮದ್ ಸಯೀದ್ ಅವರ ಪಿಡಿಪಿ ಅತಿ ದೊಡ್ಡ ಪಕ್ಷವಾಗಿ ಹೊರಹೊಮ್ಮಿದರೂ ಯಾರಿಗೂ ನಿಚ್ಚಳ ಬಹುಮತ ದೊರೆಯುವುದಿಲ್ಲ ಎಂಬುದು ಎರಡು ಪ್ರತ್ಯೇಕ ಸಮೀಕ್ಷೆಗಳ ಲೆಕ್ಕಾಚಾರ.
ಕಳೆದ ಚುನಾವಣೆಯಲ್ಲಿ ಜಾರ್ಖಂಡ್ನಲ್ಲಿ ಬಿಜೆಪಿ ಮತ್ತು ಜೆಎಂಎಂ ತಲಾ 18ಮತ್ತು ಕಾಂಗ್ರೆಸ್ 14 ಕಡೆ ಗೆದ್ದಿದ್ದವು. ಹೀಗಾಗಿ ಪದೇ ಪದೇ ಸರ್ಕಾರ ಬದಲಾಗಿತ್ತು.
ಹೋದ ಸಲ11 ಕ್ಷೇತ್ರಗಳನ್ನು ಗೆದ್ದಿದ್ದ ಜೆವಿಎಂ ಈ ಬಾರಿ ಕಳಪೆ ಸಾಧನೆ ಮಾಡಬಹುದು ಎಂದೂ ಅಂದಾಜಿಸಲಾಗಿದೆ.
ಕಣಿವೆ ರಾಜ್ಯದಲ್ಲಿ: 87 ಸದಸ್ಯ ಬಲದ ಜಮ್ಮ ಕಾಶ್ಮೀರದಲ್ಲಿ ಸ್ವಂತ ಬಲದ ಮೇಲೆ ಸರ್ಕಾರ ರಚಿಸುವ ಬಿಜೆಪಿಯು ‘ಮಿಷನ್– 44’ ಗುರಿ ಈಡೇರುವ ಸೂಚನೆಗಳು ಇಲ್ಲ.
ಇಲ್ಲಿ ಬಿಜೆಪಿ 27–33 ಸ್ಥಾನಗಳನ್ನಷ್ಟೇ ಪಡೆಯಬಹುದು. ಈ ಪೈಕಿ ಜಮ್ಮು ವಲಯದಲ್ಲೇ 25 ರಿಂದ 31 ಕಡೆ ಗೆಲ್ಲಬಹುದು ಎಂಬುದು ಇಂಡಿಯಾ ಟಿ.ವಿ ಅಂದಾಜು.
ರಾಜ್ಯದಲ್ಲಿ ಈಗ ಅಧಿಕಾರ ನಡೆಸುತ್ತಿರುವ ಒಮರ್ ಅಬ್ದುಲ್ಲಾ ಅವರ ನ್ಯಾಷನಲ್ ಕಾನ್ಫರೆನ್ಸ್ ಪಕ್ಷವು ಶೋಚನೀಯ ಸ್ಥಿತಿ ಕಂಡು ಮೂರನೇ ಸ್ಥಾನಕ್ಕೆ ಕುಸಿಯಬಹುದು ಎಂದೂ ಅದು ಹೇಳಿದೆ. ಕಾಶ್ಮೀರ ಕಣಿವೆಯಲ್ಲಿ ಭಾರಿ ಸಾಧನೆ ಮಾಡಲಿರುವ ಪಿಡಿಯು ಈ ವಲಯದಲ್ಲಿ 29 ರಿಂದ 35 ಸ್ಥಾನಗಳಲ್ಲಿ ವಿಜಯಿಯಾಗಬಹುದು. ಇಲ್ಲಿರುವ ಒಟ್ಟು ಸ್ಥಾನಗಳ ಬಲ 46. ನ್ಯಾಷನಲ್ ಕಾನ್ಫರೆನ್್ಸ 7–13 ಸ್ಥಾನಗಳಲ್ಲಿ ಗೆದ್ದರೆ ಕಾಂಗ್ರೆಸ್ ಹೆಚ್ಚೆಂದರೆ 2 ಸ್ಥಾನಗಳನ್ನಷ್ಟೇ ಗೆಲ್ಲಬಹುದು.
ಪ್ರಧಾನಿ ನರೇಂದ್ರ ಮೋದಿ ಅವರು ಕಾಶ್ಮೀರ ಕಣಿವೆಯಲ್ಲಿ ಭಾರಿ ಪ್ರಚಾರ ನಡೆಸಿದ್ದರೂ ಅಲ್ಲಿ ಪಕ್ಷವು ಶೂನ್ಯ ಸಂಪಾದನೆಯನ್ನಷ್ಟೇ ಮಾಡಬಹುದು; ಹೆಚ್ಚೆಂದರೆ, ಅದು ಒಂದು ಕ್ಷೇತ್ರದಲ್ಲಷ್ಟೇ ಗೆಲುವಿನ ರುಚಿ ಸವಿಯಬಹುದು ಎಂದು ಸಮೀಕ್ಷೆ ತಿಳಿಸಿದೆ.
2008ರಚುನಾವಣೆಯಲ್ಲಿ ನ್ಯಾಷನಲ್ ಕಾನ್ಫರೆನ್ಸ್ 28, ಪಿಡಿಪಿ 21, ಕಾಂಗ್ರೆಸ್ 17 ಮತ್ತು ಬಿಜೆಪಿ 11 ಸ್ಥಾನಗಳಲ್ಲಿ ಗೆಲುವು ದಾಖಲಿಸಿದ್ದವು. ಇತರೆ ಅಭ್ಯರ್ಥಿಗಳು 10 ಕಡೆ ವಿಜಯದ ನಗೆ ಬೀರಿದ್ದರು.
ದಾಖಲೆ
ಜಮ್ಮು ಕಾಶ್ಮೀರದಲ್ಲಿ 25 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಸರಾಸರಿ ಮತದಾನ ಶೇ 65ರಷ್ಟಾಗಿದೆ. ಜಾರ್ಖಂಡ್ ನಲ್ಲಿಯೂ ಐದು ಹಂತಗಳ ಸರಾಸರಿ ಮತದಾನ ಶೇ 66ರಷ್ಟಾಗಿದೆ. ಇದು ‘ಐತಿಹಾಸಿಕ ಹಾಗೂ ಅನಿರೀಕ್ಷಿತ’ ಎಂದು ಚುನಾವಣಾ ಆಯೋಗ ಬಣ್ಣಿಸಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.