ಚೆನ್ನೈ (ಐಎಎನ್‌ಎಸ್‌): ತಮಿಳುನಾಡು ಮಾಜಿ ಮುಖ್ಯಮಂತ್ರಿ ಜಯಲಲಿತಾ ಅವರು ಜೈಲಿನಲ್ಲಿರುವುದನ್ನು ಪ್ರತಿಭಟಿಸಿ ತಮಿಳು ನಟಿ ಮಾಯಾ ಬುಧವಾರ ಚೆನ್ನೈ ಪೊಲೀಸ್‌ ಆಯುಕ್ತರ ಕಚೇರಿ ಮುಂದೆ ಆತ್ಮಹತ್ಯೆಗೆ ಯತ್ನಿಸಿದರು.
‘ಮಾಯಾ ತಮ್ಮ ಪುತ್ರಿಯೊಂದಿಗೆ ಸೀಮೆ ಎಣ್ಣೆ ಡಬ್ಬ ಹಿಡಿದು ಬಂದಿದ್ದರು. ಇಬ್ಬರೂ ಮೈಮೇಲೆ ಸೀಮೆ ಎಣ್ಣೆ ಸುರಿದು ಬೆಂಕಿ ಹಚ್ಚಿಕೊಳ್ಳಲು ಯತ್ನಿಸಿದರು. ಅದನ್ನು ಕರ್ತವ್ಯದಲ್ಲಿದ್ದ ಅಧಿಕಾರಿಗಳು ತಡೆದರು’ ಎಂದು ಪೊಲೀಸರು ತಿಳಿಸಿದ್ದಾರೆ.
ಅಕ್ರಮ ಆಸ್ತಿ ಪ್ರಕರಣದಲ್ಲಿ ಜಯಲಲಿತಾ ಅವರು ನಾಲ್ಕು ವರ್ಷಗಳ ಜೈಲು ಮತ್ತು ₨ ನೂರು ಕೋಟಿ ದಂಡದ ಶಿಕ್ಷೆಗೆ ಒಳಗಾಗಿದ್ದಾರೆ.
ಮಾಯಾ ಮತ್ತು ಅವರ ಪುತ್ರಿಯನ್ನು ಪೊಲೀಸರು ವಶಕ್ಕೆ ಪಡೆದು ತನಿಖೆ ನಡೆಸಿದರು.
‘ಜಯಲಲಿತಾ ಅವರಿಗಾಗಿ ನಾನು ಮತ್ತು ನನ್ನ ಮಗಳು ಜೀವವನ್ನೇ ತ್ಯಜಿಸಲು ನಿರ್ಧರಿಸಿದ್ದೇವೆ’ ಎಂದು ತನಿಖೆ ವೇಳೆ ಮಾಯಾ ಹೇಳಿದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಅಷ್ಟೊಂದು ಜನಪ್ರಿಯ ನಟಿಯಲ್ಲದ ಮಾಯಾ, ‘ಗರ್ಜನೈ’, ‘ಅಮರಕಾವಿಯಂ’ ಮುಂತಾದ ಸಿನಿಮಾಗಳಲ್ಲಿ ನಟಿಸಿದ್ದಾರೆ.
