ಲುಸಾಕಾ (ಐಎಎನ್ಎಸ್): ಜಾಂಬಿಯಾದ ಅಧ್ಯಕ್ಷ ಮೈಕೆಲ್ ಸತಾ ಅವರು (77) ಲಂಡನ್ನ ಆಸ್ಪತ್ರೆಯಲ್ಲಿ ಮೃತಪಟ್ಟಿರುವುದಾಗಿ ಮಾಧ್ಯಮ ವರದಿಗಳು ಬುಧವಾರ ತಿಳಿಸಿದ್ದು, ಸರ್ಕಾರ ಕೂಡ ಇದನ್ನು ಖಚಿತಪಡಿಸಿದೆ.
ಸತಾ ಅವರು ಮಂಗಳವಾರ ರಾತ್ರಿ ಲಂಡನ್ನ 7ನೇ ಕಿಂಗ್ ಎಡ್ವರ್ಡ್ ಆಸ್ಪತ್ರೆಯಲ್ಲಿ ಅಸುನೀಗಿರುವುದಾಗಿ ಜಾಂಬಿಯಾದ ಖಾಸಗಿ ಟಿವಿ ಕೇಂದ್ರ ಮುಝಿ ಮತ್ತು ಜಾಂಬಿಯನ್ ವಾಚ್ಡಾಗ್ ವೆಬ್ಸೈಟ್ ವರದಿ ಮಾಡಿರುವುದಾಗಿ ಕ್ಸಿನ್ಹುವಾ ಹೇಳಿದೆ. ಜಾಂಬಿಯಾ ಸಚಿವ ಸಂಪುಟ ಮತ್ತು ಸರ್ಕಾರಿ ವಕ್ತಾರರು ಅಧ್ಯಕ್ಷರ ಸಾವನ್ನು ದೃಢಪಡಿಸಿರುವುದಾಗಿ ‘ಜಾಂಬಿಯಾ ಡೈಲಿ ಮೇಲ್’ ಸುದ್ದಿ ಪ್ರಕಟಿಸಿದೆ.
ಹಂಗಾಮಿ ಅಧ್ಯಕ್ಷ: ಜಾಂಬಿಯಾದ ಉಪಾಧ್ಯಕ್ಷ, ಶ್ವೇತ ವರ್ಣೀಯ ಗೈ ಸ್ಕಾಟ್ ಅವರನ್ನು ಹಂಗಾಮಿ ಅಧ್ಯಕ್ಷರಾಗಿ ನೇಮಿಸಲಾಗಿದೆ. ಅಧ್ಯಕ್ಷ ಸ್ಥಾನಕ್ಕೆ ಉಪ ಚುನಾವಣೆಯು 90 ದಿನಗಳೊಳಗೆ ನಡೆಯುವ ಸಾಧ್ಯತೆ ಇದೆ ಎಂದು ರಕ್ಷಣಾ ಸಚಿವ ಎಡ್ಗರ್ ಲುಂಗು ಹೇಳಿದ್ದಾರೆ. ಸತಾ ಅವರನ್ನು ಈ ತಿಂಗಳ 19ರಂದು ವಿಶೇಷ ಚಿಕಿತ್ಸೆಗಾಗಿ ವಿದೇಶಕ್ಕೆ ಕರೆದೊಯ್ದಿದ್ದು, ಅವರ ಪತ್ನಿ ಕ್ರಿಸ್ಟಿನ್ ಕಸೆಬಾ ಸತಾ ಮತ್ತು ಕುಟುಂಬದ ಸದಸ್ಯರು ಜತೆಗಿದ್ದರು. ಅವರಿಗೆ ಯಾವ ಕಾಯಿಲೆ ಇತ್ತು ಎಂಬುದನ್ನು ಬಹಿರಂಗಪಡಿಸಿಲ್ಲ. ಆದರೆ ಮಂಗಳವಾರ ಸಂಜೆ ದಿಢೀರ್ ಹೃದಯ ಬಡಿತ ಹೆಚ್ಚಾಗಿತ್ತು.
ಸತಾ ಅವರು ಕಳೆದ ಜೂನ್ನಿಂದ ಮೂರು ತಿಂಗಳ ಕಾಲ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳದಿದ್ದ ಕಾರಣ ಅವರ ಆರೋಗ್ಯದ ಬಗ್ಗೆ ಸಾಕಷ್ಟು ಚರ್ಚೆ ನಡೆದಿತ್ತು. ಅವರು ಇಸ್ರೇಲ್ಗೆ ವಿಶೇಷ ಚಿಕಿತ್ಸೆ ಪಡೆಯಲು ಹೋಗಿದ್ದಾರೆ ಎಂಬ ವದಂತಿಗಳ ಮಧ್ಯೆ ಸರ್ಕಾರವು ರಜೆ ಮೇಲೆ ತೆರಳಿರುವುದಾಗಿ ಹೇಳುತ್ತಿತ್ತು.
ಆದರೆ ಕಳೆದ ತಿಂಗಳು ವಿಶ್ವಸಂಸ್ಥೆಯ ಮಹಾಸಭೆ ಅಧಿವೇಶನದಲ್ಲಿ ಪಾಲ್ಗೊಂಡಿದ್ದಾಗ ಸತಾ ಕುಸಿದು ಬಿದ್ದ ವರದಿ ಬಂದಾಗ, ಜಾಂಬಿಯಾದಲ್ಲಿ ಆತಂಕ ಮೂಡಿತ್ತು. 2011ರ ಚುನಾವಣೆಯಲ್ಲಿ ಜಯಗಳಿಸಿದ ನಂತರ ಸತಾ ಅವರು ಜಾಂಬಿಯಾ ಅಧ್ಯಕ್ಷರಾಗಿದ್ದರು.
ಲಂಡನ್ ರೈಲ್ವೆ ಪ್ಲ್ಯಾಟ್ಫಾರ್ಮ್ ಶುಚಿಗೊಳಿಸುವ ಕೆಲಸದಿಂದ ಜಾಂಬಿಯಾದ ಅಧ್ಯಕ್ಷರಾಗುವ ತನಕ ಉನ್ನತ ಹುದ್ದೆಗೆ ಏರಿದ ಅವರು, ರಾಜಕೀಯ ವೈರತ್ವದ ನಡುವೆಯೂ ದೇಶದಲ್ಲಿ ಭ್ರಷ್ಟಾಚಾರ ನಿರ್ಮೂಲನೆಗಾಗಿ ಶ್ರಮಿಸಿ, ‘ಕಿಂಗ್ ಕೋಬ್ರಾ’ ಎಂಬ ಬಿರುದು ಪಡೆದಿದ್ದರು. 1937ರಲ್ಲಿ ಉತ್ತರ ರೊಡೇಸಿಯಾದ ಬ್ರಿಟಿಷ್ ಕಾಲೋನಿಯಲ್ಲಿ ಜನಿಸಿದ ಅವರು 1963ರಲ್ಲಿ ರಾಜಕೀಯ ಸೇರುವ ಮುಂಚೆ ಪೊಲೀಸ್ ಅಧಿಕಾರಿ, ರೈಲ್ವೆ ನೌಕರ ಹಾಗೂ ಕಾರ್ಮಿಕ ಸಂಘದ ನಾಯಕರಾಗಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.