ನವದೆಹಲಿ(ಪಿಟಿಐ): ದೇಶದ ಎಂಟು ಪ್ರಮುಖ ಕೈಗಾರಿಕಾ ವಲಯಗಳು ಜುಲೈನಲ್ಲಿ ಕಳಪೆ ಸಾಧನೆ ತೋರಿ ಕೇವಲ ಶೇ 2.7ರಷ್ಟು ಪ್ರಗತಿ ದಾಖಲಿಸಿವೆ. 2013ರ ಜುಲೈನಲ್ಲಿ ಶೇ 5.3ರಷ್ಟು ಪ್ರಗತಿ ದಾಖಲಾಗಿತ್ತು.
ಮೂಲ ಸೌಕರ್ಯ ವಲಯಕ್ಕೆ ಸೇರಿದ ಈ ಎಂಟು ಪ್ರಮುಖ ಕೈಗಾರಿಕಾ ವಿಭಾಗಗಳಿಂದಲೇ ದೇಶದ ಒಟ್ಟಾರೆ ಕೈಗಾರಿಕಾ ಉತ್ಪಾದನೆಯ ಸೂಚ್ಯಂಕಕ್ಕೆ (ಐಐಪಿ) ಶೇ 38ರಷ್ಟು ಕೊಡುಗೆ ಬರುತ್ತದೆ.
ಆದರೆ, ಈ ಬಾರಿ ಕಚ್ಚಾತೈಲ (ಶೇ 1), ನೈಸರ್ಗಿಕ ಅನಿಲ(ಶೇ 9), ಶುದ್ಧೀಕರಿಸಿದ ಉತ್ಪನ್ನಗಳು (ಶೇ 5.5), ರಸಗೊಬ್ಬರ (ಶೇ 4.2) ಮತ್ತು ಉಕ್ಕು (ಶೇ 3.4) ವಿಭಾಗದ ಕೈಗಾರಿಕೆಗಳಲ್ಲಿನ ನಿರಾಶಾದಾಯಕ ಚಟುವಟಿಕೆಯೇ ಪ್ರಮುಖ ಕೈಗಾರಿಕಾ ವಿಭಾಗದಲ್ಲಿನ ಹಿನ್ನಡೆಗೆ ಮೂಲವಾಗಿದೆ. ಇದು ಕಳವಳಕ್ಕೂ ಕಾರಣವಾಗಿದೆ.
ಇರುವುದರಲ್ಲಿಯೇ ಕಲ್ಲಿದ್ದಲು (ಶೇ 6.2), ಸಿಮೆಂಟ್ (ಶೇ 16.5) ಮತ್ತು ವಿದ್ಯುತ್‌ ಉತ್ಪಾದನೆ (ಶೇ 11.2) ವಿಭಾಗದಿಂದ ಉತ್ತಮ ಸಾಧನೆ ಕಂಡುಬಂದಿದೆ.
ಜೂನ್‌ನಲ್ಲಿ ಮಾತ್ರ ಸಿಮೆಂಟ್ ಮತ್ತು ವಿದ್ಯುತ್‌ ಕ್ಷೇತ್ರದ ಅತ್ಯುತ್ತಮ ಕೊಡುಗೆಯಿಂದಾಗಿ ಪ್ರಮುಖ ಕೈಗಾರಿಕೆಗಳ ವಲಯದಲ್ಲಿ ಶೇ 7.3ರಷ್ಟು ಸಾಧನೆಯಾಗಿತ್ತು. ಇದು ಹಿಂದಿನ 9 ತಿಂಗಳಲ್ಲೇ ಗರಿಷ್ಠ ಮಟ್ಟದ ಪ್ರಗತಿಯಾಗಿತ್ತು.
4 ತಿಂಗಳದ್ದು ಯಥಾಸ್ಥಿತಿ
2014ರ ಏಪ್ರಿಲ್ ಜುಲೈ (ನಾಲ್ಕು ತಿಂಗಳು) ಅವಧಿಯಲ್ಲಿ ಸೂಚ್ಯಂಕದಲ್ಲಿ ಶೇ 4.1ರಷ್ಟು ಏರಿಕೆ ಕಂಡುಬಂದಿದೆ.
ಹಿಂದಿನ ವರ್ಷದ ಇದೇ ಅವಧಿಯಲ್ಲಿಯೂ ಇಷ್ಟೇ ಪ್ರಮಾಣದ ಪ್ರಗತಿ ದಾಖಲಾಗಿತ್ತು.
