ಭಾರತದಲ್ಲಿ ವ್ಯಾಪಕವಾಗುತ್ತಿರುವ ಡೆಂಗೆ ಜ್ವರಕ್ಕೆ ಸಂಬಂಧಿಸಿದಂತೆ ಅಮೆರಿಕದ ವೈದ್ಯಕೀಯ ನಿಯತಕಾಲಿಕವೊಂದು ಪ್ರಕಟಿಸಿರುವ ಸಮೀಕ್ಷಾ ವರದಿ ನಾಗರಿಕರನ್ನು ಬೆಚ್ಚಿಬೀಳಿಸುವಂತಿದೆ. ನಮ್ಮ ಆರೋಗ್ಯ ಇಲಾಖೆಗಳು ತೋರಿಸುತ್ತಿರುವ ಡೆಂಗೆ ಜ್ವರ ಪ್ರಕರಣಗಳ ಅಧಿಕೃತ ಅಂಕಿಸಂಖ್ಯೆಗೂ ಈ ವರದಿಯಲ್ಲಿರುವ ಅಂಕಿಸಂಖ್ಯೆಗೂ ಅಜಗಜಾಂತರ ಕಂಡುಬಂದಿದೆ.
2006 ರಿಂದ 2012ರವರೆಗೆ ದೇಶದಲ್ಲಿ ವರ್ಷಂಪ್ರತಿ ಸುಮಾರು 60 ಲಕ್ಷ ಮಂದಿಯಲ್ಲಿ ಡೆಂಗೆ ಕಾಣಿಸಿಕೊಂಡಿದೆ ಎಂದು ನಿಯತಕಾಲಿಕ ಎಚ್ಚರಿಸಿದೆ. ಇದು ಸರ್ಕಾರ ಅಂದಾಜಿಸಿರುವ ಅಂಕಿಸಂಖ್ಯೆಗಿಂತ 282 ಪಟ್ಟು ಅಧಿಕ! ಇದರಿಂದ ಸಾಮಾಜಿಕ ಹಾನಿ ಮಾತ್ರವಲ್ಲದೆ ನೂರಾರು ಕೋಟಿ ರೂಪಾಯಿ ಆರ್ಥಿಕ ಹೊರೆಯೂ ಉಂಟಾಗುತ್ತಿದೆ ಎಂದು ವರದಿ ಹೇಳಿದೆ. ಆದರೆ ಹೇಳಿಕೇಳಿ ಈ ಸಮೀಕ್ಷೆಯನ್ನು ಔಷಧ ತಯಾರಿಕಾ ಕಂಪೆನಿಯೊಂದು ಪ್ರಾಯೋಜಿಸಿದ್ದು, ಅದು ವರದಿಯ ಮೇಲೆ ಪ್ರಭಾವ ಬೀರಿದೆ ಎಂದು ಆರೋಗ್ಯ ಅಧಿಕಾರಿಗಳು ಸಮಜಾಯಿಷಿ ನೀಡಿದ್ದಾರೆ. ಇದನ್ನು ತಳ್ಳಿಹಾಕಿರುವ ಸಂಶೋಧಕರು, ಸಮೀಕ್ಷೆಯ ಮೇಲೆ ಕಂಪೆನಿ ಯಾವ ನಿಯಂತ್ರಣವನ್ನೂ ಹೇರಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿಗೆ ಸೇರಿದ ಮದುರೆಯ ಕೀಟವೈದ್ಯಕೀಯ ಸಂಶೋಧನಾ ಕೇಂದ್ರ ಒಳಗೊಂಡು ಅಮೆರಿಕ ಮತ್ತು ಭಾರತದ ಪ್ರಮುಖ ಸಂಸ್ಥೆಗಳ ಸಂಶೋಧಕರು ಈ ಸಮೀಕ್ಷೆಗೆ ಕೈಜೋಡಿಸಿದ್ದಾರೆ. ಹೀಗಾಗಿ ವರದಿಯನ್ನು ಸಾರಾಸಗಟಾಗಿ ತಳ್ಳಿಹಾಕಲು ಸಾಧ್ಯವಾಗದು. ಯಾರೇ ವರದಿ ಸಿದ್ಧಪಡಿಸಿದ್ದರೂ ವಸ್ತುಸ್ಥಿತಿ ಏನಿದೆ ಎಂಬುದು ಇಲ್ಲಿ ಮುಖ್ಯ. ಇದು ಸಾರ್ವಜನಿಕರ ಆರೋಗ್ಯದಂತಹ ಪ್ರಮುಖ ವಿಷಯವಾದ್ದರಿಂದ ವರದಿಯ ಸತ್ಯಾಸತ್ಯತೆಯನ್ನು ಒರೆಗೆ ಹಚ್ಚಬೇಕಾದುದು ಸರ್ಕಾರದ ಆದ್ಯ ಕರ್ತವ್ಯ.
ನಮ್ಮ ಆರೋಗ್ಯ ವ್ಯವಸ್ಥೆಯ ದುಃಸ್ಥಿತಿಯನ್ನು ಕಂಡವರಿಗೆ ಸರ್ಕಾರದ ಅಂಕಿಸಂಖ್ಯೆಯ ಮೇಲೇ ಶಂಕೆ ಮೂಡುವುದು ಸಹಜ. ಒಂದು ವೇಳೆ ವರದಿಯಲ್ಲಿರುವುದೇ ಸತ್ಯ ಎನ್ನುವುದಾದರೆ, ಮಾರಣಾಂತಿಕವಾದ ಈ ಸಾಂಕ್ರಾಮಿಕ ರೋಗವನ್ನು ಎದುರಿಸಲು ಸರ್ಕಾರ ವಿಶೇಷ ನಿಧಿಯನ್ನೇ ಮುಡುಪಾಗಿಟ್ಟು, ಸಮರೋಪಾದಿಯಲ್ಲಿ ನಿಯಂತ್ರಣ ಕ್ರಮಗಳನ್ನು ಕೈಗೊಳ್ಳಬೇಕಾಗುತ್ತದೆ. ಹಾಗಿಲ್ಲದೆ ವರದಿಯನ್ನು ಲಘುವಾಗಿ ಪರಿಗಣಿಸಿ ವಸ್ತುಸ್ಥಿತಿ ಭೀಕರವಾದರೆ, ಅದಕ್ಕೆ ತಕ್ಕ ಬೆಲೆಯನ್ನು ತೆರಬೇಕಾಗುತ್ತದೆ.
1996ರಲ್ಲಿ ದೇಶದಲ್ಲಿ ಮೊದಲ ಬಾರಿ ಡೆಂಗೆ ಕಾಣಿಸಿಕೊಂಡಾಗಿನಿಂದ ಈವರೆಗೆ ನೂರಾರು ಜನರ ಬಲಿ ಪಡೆದಿದೆ. ಇದರ ನಿಯಂತ್ರಣದ ಬಗ್ಗೆ ಜನರಲ್ಲಿರುವ ಮಾಹಿತಿ ಕೊರತೆಯೂ ರೋಗ ಉಲ್ಬಣಕ್ಕೆ ಕಾರಣ. ರಾತ್ರಿ ವೇಳೆ ಸೊಳ್ಳೆ ಕಡಿತದಿಂದ ತಪ್ಪಿಸಿಕೊಂಡರೆ ಡೆಂಗೆಯಿಂದ ಪಾರಾಗಬಹುದು ಎಂದು ಜನ ಭಾವಿಸಿದ್ದಾರೆ. ಆದರೆ ಡೆಂಗೆ ಜ್ವರಕ್ಕೆ ಕಾರಣವಾಗುವ ಈಡಿಸ್ ಈಜಿಪ್ಟಿ ಎಂಬ ಸೊಳ್ಳೆ ಕಚ್ಚುವುದೇ ಹಗಲಿನಲ್ಲಿ. ಈ ಬಗ್ಗೆ ಜಾಗೃತಿ ಮೂಡಿಸುವುದು ಅಗತ್ಯ. ಸಾರ್ವಜನಿಕ ಆರೋಗ್ಯ ಸುಧಾರಣಾ ಕ್ರಮಗಳೂ ತೀವ್ರಗೊಳ್ಳಬೇಕಿವೆ. ಅಷ್ಟಕ್ಕೂ ಸರ್ಕಾರದ ಅಂಕಿಸಂಖ್ಯೆಯೇ ಸರಿ ಎನ್ನುವುದು ಸಾಬೀತಾದರೆ, ಅಂತಿಮವಾಗಿ ಈ ಸಂಸ್ಥೆಗಳ ವಿರುದ್ಧ ಕಾನೂನು ಅಸ್ತ್ರ ಪ್ರಯೋಗಿಸುವ ಅಧಿಕಾರವಂತೂ ಸರ್ಕಾರಕ್ಕೆ ಇದ್ದೇ ಇರುತ್ತದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.