ನವದೆಹಲಿ (ಪಿಟಿಐ): ವಿಪ್ರೊ, ಎಚ್ಸಿಎಲ್, ಎಚ್ಡಿಎಫ್ಸಿ ಬ್ಯಾಂಕ್ ಸೇರಿದಂತೆ ಇನ್ನೂ ಕೆಲವು ಕಂಪೆನಿಗಳ 4ನೇ ತ್ರೈಮಾಸಿಕ ಫಲಿತಾಂಶ ಸೋಮವಾರದಿಂದ ಪ್ರಕಟಗೊಳ್ಳಲಿವೆ. ಈ ಫಲಿತಾಂಶಗಳು ವಾರದ ಷೇರುಪೇಟೆ ವಹಿವಾಟಿನ ಮೇಲೆ ಹೆಚ್ಚಿನ ಪ್ರಭಾವ ಬೀರಲಿವೆ ಎಂದು ಪರಿಣತರು ವಿಶ್ಲೇಷಿಸಿದ್ದಾರೆ.
ವಿದೇಶಿ ಹೂಡಿಕೆ ಪ್ರಮಾಣ, ಡಾಲರ್ ಎದುರು ರೂಪಾಯಿ ಮೌಲ್ಯ ವ್ಯತ್ಯಯ ಹಾಗೂ ಕಚ್ಚಾತೈಲ ಬೆಲೆಯೂ ಷೇರು ಮಾರುಕಟ್ಟೆ ವಹಿವಾಟಿನ ದಿಕ್ಕನ್ನು ನಿರ್ಧರಿಸಲಿವೆ ಎಂದು ಅಭಿಪ್ರಾಯ ಪಟ್ಟಿದ್ದಾರೆ.
ಈ ವಾರ ಪ್ರಮುಖ ಕಂಪೆನಿಗಳಾದ ಹಿಂದೂಸ್ತಾನ್ ಜಿಂಕ್, ಎಚ್ಸಿಎಲ್ ಟೆಕ್ನಾಲಜೀಸ್, ವಿಪ್ರೊ ಮತ್ತು ಎಚ್ಡಿ ಎಫ್ಸಿ ಬ್ಯಾಂಕ್ ತ್ರೈಮಾಸಿಕ ಫಲಿತಾಂಶದ ಮೇಲೆ ಮಾರುಕಟ್ಟೆಯು ಬಹಳ ಕುತೂಹಲ ತಳೆದಿದೆ ಎಂದು ರಿಲಯನ್ಸ್ ಸೆಕ್ಯುರಿಟೀಸ್ನ ರಿಟೇಲ್ ವಿಭಾಗದ ಅಧ್ಯಕ್ಷ ಜಯಂತ್ ಮಾಂಗ್ಲಿಕ್ ಹೇಳಿದ್ದಾರೆ.
ಸೋಮವಾರದಿಂದ ಆರಂಭವಾ ಗಲಿರುವ ಸಂಸತ್ ಅಧಿವೇಶನದಲ್ಲಿ ಭೂಸ್ವಾಧೀನ ಮಸೂದೆ, ಸರಕು ಮತ್ತು ಸೇವೆಗಳ ತೆರಿಗೆ (ಜಿಎಸ್ಟಿ) ಮಸೂದೆಗಳಿಗೆ ಅಂಗೀಕಾರ ಸಿಗುವ ಸಾಧ್ಯತೆ ಇದೆ. ಹಾಗಾಗಿಯೇ ಷೇರುಪೇಟೆ ಪಾಲುದಾರರು ಮತ್ತು ಹೂಡಿಕೆದಾರರು ಸಂಸತ್ ಅಧಿವೇಶನವನ್ನು ಸೂಕ್ಷ್ಮವಾಗಿ ಗಮನಿಸಲಿದ್ದಾರೆ ಎಂದು ಅವರು ತಿಳಿಸಿದ್ದಾರೆ.
ರಿಲಯನ್ಸ್ ಫಲಿತಾಂಶ ಪ್ರಭಾವ: ಶುಕ್ರವಾರ ಮಾರುಕಟ್ಟೆ ವಹಿವಾಟು ಅವಧಿ ಮುಗಿದ ಬಳಿಕ ರಿಲಯನ್ಸ್ ತ್ರೈಮಾಸಿಕ ಫಲಿತಾಂಶ ಪ್ರಕಟವಾಗಿದೆ. ಹೀಗಾಗಿ ಸೋಮವಾರದ ವಹಿವಾಟಿನಲ್ಲಿ ರಿಲಯನ್ಸ್ ಷೇರುಗಳ ಮೇಲೆ ಅದರ ಫಲಿತಾಂಶ ಪ್ರಭಾವ ಬೀರಲಿದೆ.
ಮುಂಬೈ ಷೇರು ವಿನಿಮಯ ಕೇಂದ್ರದ (ಬಿಎಸ್ಇ) ಸಂವೇದಿ ಸೂಚ್ಯಂಕ ವಾರದ ವಹಿವಾಟಿನಲ್ಲಿ 437 ಅಂಶಗಳಷ್ಟು ಕುಸಿದು, 28,442 ಅಂಶಗಳಲ್ಲಿ ದಿನದ ವಹಿವಾಟು ಅಂತ್ಯಗೊಳಿಸಿದೆ.
4ನೇ ತ್ರೈಮಾಸಿಕ ಫಲಿತಾಂಶದಲ್ಲಿ ಟಿಸಿಎಸ್ ಲಾಭ ಶೇ 27ರಷ್ಟು ಕುಸಿತ ಕಂಡಿದ್ದರಿಂದ ಗುರುವಾರ ಷೇರುಪೇಟೆ ವಹಿವಾಟು ಇಳಿಕೆಯಾಗಿತ್ತು.
ಜನವರಿ–ಮಾರ್ಚ್ ಅವಧಿಯ ಕಂಪೆನಿ ಗಳ ತ್ರೈಮಾಸಿಕ ಫಲಿತಾಂಶಗಳನ್ನು ಆಧರಿಸಿ ಈ ವಾರದ ವಹಿವಾಟು ಏರಿಳಿತ ಕಾಣಲಿದೆ
ಹಿತೇಶ್ ಅಗರ್ವಾಲ್, ರಿಲಯನ್ಸ್ ಸೆಕ್ಯುರಿಟೀಸ್