ದೂಳು ಹಿಡಿಯುತಿದೆ ಹಳ್ಳಿ ಲೈಬ್ರರಿ

ಗ್ರಂಥಾಲಯಕ್ಕೆ ಅನುವಾದವರು
ಅನೇಕ ಜನ ಗ್ರಂಥಾಲಯದ ಅಭಿವೃದ್ಧಿಗೆ ನೆರವಾಗಿದ್ದಾರೆ. ಜ್ಞಾನೋದಯ ವಾಚನಾಲಯದ ಮೊದಲ ಗೌರವ ಕಾರ್ಯದರ್ಶಿಗಳಾಗಿದ್ದ ಪು.ರಾ. ಜಾಕೋಜಿ ಮಾಸ್ತರ ತಮ್ಮ ವೇತನದ ಕೆಲ ಭಾಗವನ್ನು ವಾಚನಾಲಯಕ್ಕೆ ಮೀಸಲಾಗಿಟ್ಟಿದ್ದರು. ಶಾಲೆಯನ್ನು ಬಿಟ್ಟರೆ ತಮ್ಮ ಜೀವನದ ಹೆಚ್ಚು ಕಾಲವನ್ನು ಅವರು ಕಳೆದದ್ದು ಈ ವಾಚನಾಲಯದಲ್ಲಿಯೇ. ಅನೇಕ ಮಂದಿ ಶಿಕ್ಷಕರು ಸೇರಿದಂತೆ ನೂರಾರು ಮಂದಿ ಇದಕ್ಕಾಗಿ ಶ್ರಮಿಸಿದರು.

ವಾಚನಾಲಯಕ್ಕೆ ನಿರಂತರ ಬಂಡವಾಳ ಬೇಕು. ಆದರೆ ಅದರ ಆದಾಯ ಶೂನ್ಯವಾಗಿತ್ತು. ಇದರಿಂದಾಗಿ 1966ರಲ್ಲಿ ವಾಚನಾಲಯ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿತ್ತು. ಆ ವರ್ಷ ಮಳೆ ಬೆಳೆ ಚೆನ್ನಾಗಿತ್ತು. ಜೋಳದ ಫಸಲು ಬಂಪರ್ ಆಗಿತ್ತು. ಆ ಸಮಯದಲ್ಲಿ ಅಲ್ಲಿಯ ಕೆಲವು ಮುಖಂಡರು ಜೋಳಿಗೆ ಹಾಕಲು ನಿರ್ಧರಿಸಿದರು. ಗ್ರಂಥಾಲಯ ಉಳಿಸುವ ಪಣತೊಟ್ಟು ಮನೆ ಮನೆ ಸುತ್ತಿ ಜೋಳ ಸಂಗ್ರಹಿಸಿದರು.

ಚೀಲಕ್ಕೆ 80 ರೂಪಾಯಿಯಂತೆ ಸಂಗ್ರಹಿಸಿದ ಜೋಳ ಮಾರಿ 10 ಸಾವಿರ ರೂಪಾಯಿ ಸಂಗ್ರಹಿಸಿದ್ದರು. ಆ ಹಣದಿಂದ ಅದೇ ವರ್ಷ ವಾಚನಾಲಯದ ಮೇಲಿನ ಅಂತಸ್ತಿನ ಕಟ್ಟಡ ಕಟ್ಟಿಸಿ ಕೆಳಗಿನ ಕಟ್ಟಡವನ್ನು ಬ್ಯಾಂಕ್‌ ಒಂದಕ್ಕೆ 300ರೂ ಬಾಡಿಗೆ ನೀಡಿದರು. ಆ ಹಣದಿಂದ ವಾಚನಾಲಯ ನಿರಂತರ ನಡೆಯಬೇಕೆಂಬುದು ಅವರ ಆಶಯವಾಗಿತ್ತು. ನಿರಂತರ ಪ್ರಯತ್ನದ ನಂತರ 1970ರಲ್ಲಿ ಸರ್ಕಾರದಿಂದ 300 ರೂಪಾಯಿ ಅನುದಾನ ದೊರೆಯಿತು.

ಅಪರೂಪದ ಪತ್ರಿಕೆಗಳ ಸಂಗ್ರಹ
ನಾಲ್ಕು ಸಾವಿರಕ್ಕಿಂತಲೂ ಹೆಚ್ಚು ಅಪರೂಪದ ಪುಸ್ತಕ, ಪತ್ರಿಕೆಗಳು ಈ ವಾಚನಾಲಯದಲ್ಲಿವೆ. ಹಳೆಯ ಮಾಸಪತ್ರಿಕೆಗಳ ಸಂಗ್ರಹವೇ ಇಲ್ಲಿದೆ. ಹಲವಾರು ಪತ್ರಿಕಾ ಸಂಪಾದಕರು ತಮ್ಮ ಹಳೆಯ ಪತ್ರಿಕೆಗಳಿಗಾಗಿ ಈ ಗ್ರಂಥಾಲಯ ಸಂಪರ್ಕಿಸಿ ಪಡೆದುಕೊಂಡಿದ್ದಾರೆ. ಹಾಗೇ ಕರ್ನಾಟಕ ಸರ್ಕಾರ ಗ್ರಂಥಾಲಯ ಕಾನೂನುಗಳನ್ನು ಜಾರಿ ತರುವಾಗ, ಶುಲ್ಕ ಹೇರುವಾಗ ಈ ಗ್ರಂಥಾಲಯದ ಅಭಿಪ್ರಾಯ ಸಂಗ್ರಹಿಸಿದ್ದು ಇಲ್ಲಿನ ಪದ್ಧತಿಗಳನ್ನು ಅಭ್ಯಸಿಸಿದ್ದೂ ವಿಶೇಷ.

ವಾಚನಾಲಯದ ಸ್ಥಿತಿಗತಿ
ಜನರ ಬೌದ್ಧಿಕ ಮಟ್ಟ ಹೆಚ್ಚಿಸುವಲ್ಲಿ, ಜ್ಞಾನದ ಆಂದೋಲನ ರೂಪಿಸುವಲ್ಲಿ ಕಾರಣವಾಗಿದ್ದ ವಾಚನಾಲಯದ ಇಂದಿನ ಸ್ಥಿತಿ ಶೋಚನೀಯ. 2013 ರಲ್ಲಿ ಜಿಲ್ಲಾ ಪಂಚಾಯಿತಿ  ಅಧ್ಯಕ್ಷರಾಗಿದ್ದ ಅಡಿವೆಪ್ಪ ಮನಮಿಯವರು ಜಿಲ್ಲಾ ಪಂಚಾಯಿತಿ ಅನುದಾನದಲ್ಲಿ
1 ಲಕ್ಷ ನೀಡಿದ ಮೇಲೆ ಇದು ಹೊಸ ಪೀಠೋಪಕರಣಗಳನ್ನು ಕಂಡಿದೆ. ಆದರೆ ಕಟ್ಟಡಕ್ಕೆ ಜೀರ್ಣೋದ್ಧಾರದ ಅವಶ್ಯಕತೆ ಇದೆ.

ಸರ್ಕಾರದಿಂದ ಬರುತ್ತಿದ್ದ ರೂ. 10 ಸಾವಿರ ವಾರ್ಷಿಕ ಅನುದಾನವೂ ಎರಡು ವರ್ಷಗಳಿಂದ ನಿಂತು ಹೋಗಿದೆ.
ಗೆಳೆಯರ ಬಳಗದ ಕುಮಶೀಕರ ಮಾಸ್ತರ, ಹೂಲಿಯವರು, ಗದಿಗೆಪ್ಪಗೌಡ್ರು, ಭಾಂಡಲಕರವರು ಇಳಿವಯಸ್ಸಿನಲ್ಲಿದ್ದು, ಉಳಿದವರು ಈಗಿಲ್ಲ. ಇನ್ನು ಯುವಕರು ಗ್ರಂಥಾಲಯ ರಕ್ಷಣೆಗೆ ಮುಂದೆ ಬರುತ್ತಿಲ್ಲ.

ಸಾಲದು ಎಂಬುದಕ್ಕೆ ಸರ್ಕಾರ ಇದೇ ಗ್ರಂಥಾಲಯದ ಕೂಗಳತೆಯಲ್ಲಿ ಮತ್ತೊಂದು ಗ್ರಂಥಾಲಯ ಮಂಜೂರು ಮಾಡಿದ್ದು ಈ ಗ್ರಂಥಾಲಯವನ್ನು ಯಾರೂ ಕೇಳದಂತಾಗಿದೆ. 2 ದಿನಪತ್ರಿಕೆಗಳು, 3 ವಾರಪತ್ರಿಕೆಗಳು, 5 ಮಾಸಪತ್ರಿಕೆಗಳು ಮಾತ್ರ ಈ ಗ್ರಂಥಾಲಯಕ್ಕೆ ನಿರಂತರ ಬರುತ್ತಿವೆ. ಗ್ರಂಥಪಾಲಕನ ವೇತನ, ನಿರ್ವಹಣಾ ವೆಚ್ಚಕ್ಕೆ ಕೆಳಗಿನ ಕಟ್ಟಡದ ಬಾಡಿಗೆ ಹಣ ರೂ. 3ಸಾವಿರವನ್ನು ನೆಚ್ಚಿಕೊಳ್ಳುವಂತಾಗಿದೆ. ಗ್ರಂಥಪಾಲಕರಾದ ದೇವರಡ್ಡಿ ಕಿತ್ತೂರ ಕಡಿಮೆ ವೇತನದಲ್ಲೂ ಗ್ರಂಥಾಲಯ ಉಳಿಸಿಕೊಳ್ಳುವಲ್ಲಿ ಹೆಣಗುತ್ತಿದ್ದಾರೆ. ಈ ಎಲ್ಲ ಸಂದಿಗ್ಧ ಪರಿಸ್ಥಿತಿ ನಡುವೆಯೂ ಗ್ರಂಥಾಲಯದ ರೂ. 62 ಸಾವಿರ ರೂಪಾಯಿಗಳನ್ನು ಭದ್ರತಾ ಠೇವಣಿಯಾಗಿ ಇಟ್ಟಿದ್ದಾರೆ.

ಸರ್ಕಾರ ಈ ಪುರಾತನ, ಐತಿಹಾಸಿಕ ಗ್ರಂಥಾಲಯ ವನ್ನು ಕಣ್ತೆರೆದು ನೋಡಬೇಕಿದೆ. ಗ್ರಾಮಸ್ವರಾಜ್ಯ ರೂಪಿಸುವಲ್ಲಿ ಮಹತ್ತರ ಪಾತ್ರ ವಹಿಸಿದ್ದ ಈ ಗ್ರಂಥಾಲಯವನ್ನು ಸಂರಕ್ಷಿಸುವಲ್ಲಿ ಕ್ರಮ ಕೈಗೊಳ್ಳಬೇಕಿದೆ.